ପାଟନା: 'ସାପ' ନାଁ ଶୁଣୁ ଶୁଣୁ ମନ ଭିତରକୁ ଭୟ ଚାଲିଆସେ । ଆପଣମାନେ ଅନେକ ପ୍ରଜାତିର ସାପ ଦେଖଥିବେ ଓ ସେମାନଙ୍କ ବିଷୟରେ ଜାଣିଥିବେ । ହେଲେ ଆପଣମାନେ କେବେ ଉଡନ୍ତା ସାପ ବିଷୟରେ ଶୁଣିଛନ୍ତ କିମ୍ବା ଦେଖିଛନ୍ତି କି ? ସାପ ପୁଣି ଉଡ଼ିବ କେମିତି । ଶୁଣିବା ବେଳକୁ କଥାଟା ଆଶ୍ଚର୍ଯ୍ୟ ଲାଗୁଥିଲେ ବି ଏହା ସତ । କାହିଁକି ନାଁ ଉଡ଼ନ୍ତା ସାପ ଅଛନ୍ତି । ଏହି ଉଡ଼ନ୍ତା ସାପକୁ ତକ୍ଷକ ନାଗ ବୋଲି କୁହାଯାଏ । ଏହି ସାପଙ୍କ ରହସ୍ୟ ପୌରାଣିକ ମହାଭାରତ ସହ ଜଡ଼ିତ ରହିଛି । ଏବେ ଏହି ସାପ ବିହାରର ବଗହା ଠାରେ ଦେଖିବାକୁ ମିଳିଛି । ଆଉ ଏହି ସାପ ଗୋଟିଏ ସ୍ଥାନରୁ ଅନ୍ୟ ଏକ ସ୍ଥାନକୁ ଉଡ଼ିପାରେ ବୋଲି ଦାବି ହେଉଛି । ତେବେ କ'ଣ ଏହି ଉଡନ୍ତା ସାପ ? କ'ଣ ସତରେ ସାପ ଉଡ଼ିପାରନ୍ତି ? ଏହା ପଛରେ କ'ଣ ରହିଛି ରହସ୍ୟ ? ଏନେଇ ବିଶେଷଜ୍ଞମାନେ କ'ଣ କହୁଛନ୍ତି ଆସନ୍ତୁ ଜାଣିବା....
ଉଡ଼ନ୍ତା ସାପର ରହସ୍ୟ:
ଅନେକ ସମୟରେ ଆମେ ଉଡନ୍ତା ସାପ ବିଷୟରେ ଶୁଣିଛେ । ବିନା ଡେଣାରେ ସାପ ଉଡ଼ୁଥିବା ବିଷୟରେ ଆମେ ଅନେକ ବାର ଶୁଣିବାକୁ ପାଇଛେ । ଆଉ ତକ୍ଷକ ନାଗ ବିଷୟରେ ଅଳ୍ପେ ବହୁତେ ଶୁଣିଛେ । ମାତ୍ର ଏନେଇ ବିଶେଷଜ୍ଞମାନେ କହିଛନ୍ତି ଯେ, ତକ୍ଷକ ନାଗ ଉଡ଼ିପାରେ ନାହିଁ । ତକ୍ଷକ ନାଗ ଗୋଟିଏ ସ୍ଥାନରୁ ଅନ୍ୟ ଏକ ସ୍ଥାନକୁ ଲମ୍ଫ ମାରିଥାଏ । ଅର୍ଥାତ ଗୋଟିଏ ସ୍ଥାନରୁ ଅନ୍ୟ ଏକ ସ୍ଥାନକୁ ଡେଇଁପଡେ । ବିଶେଷଜ୍ଞ ଏହା ମଧ୍ୟ କହିଛନ୍ତି ଯେ, ଏହି ସାପ ଗୁଡ଼ିକ ଉପରୁ ତଳକୁ ଲମ୍ଫ ମାରି ପାରନ୍ତି କିନ୍ତୁ ତଳୁ ଉପରକୁ ଡେଉଁ ପାରନ୍ତିନାହିଁ ।
ସାପ ଉଡ଼ିପାରେ ନାହିଁ ବରଂ ଲମ୍ଫ ମାରିଥାଏ : ନ୍ୟୁଜ ଏନଭାରମେଣ୍ଟ ଆଣ୍ଡ ୱାଇଡ୍ ଲାଇଫ ସୋସାୟିଟି ( NEWS) ସଂସ୍ଥାର ପ୍ରୋଜେକ୍ଟ ମ୍ୟାନେଜର ଅଭିଷେକ ଏନେଇ ସୂଚନା ଦେଇ କହିଛନ୍ତି ଯେ, ତକ୍ଷକ ନାଗକୁ ଅନେକ ନାମରେ ଜଣାଯାଏ । ଯେପରିକୁ ଏହାକୁ ଆର୍ନେଟର ଫ୍ଲାଇଂ ସ୍ନେକ, ଟକ୍କା ନାଗ, କ୍ରାଅସୋପେଲିୟା ଆର୍ନେଟା କିମ୍ବା ଗ୍ଲାଇଡିଂ ସାପ କୁହାଯାଏ । ଏହି ତକ୍ଷକ ସାପ ନିଜ ଶରୀରରକୁ S ଆକାର ଧାରଣ କରି ସ୍ପ୍ରିଙ୍ଗ ପରି ଗୋଟିଏ ସ୍ଥାନରୁ ଅନ୍ୟ ଏକ ସ୍ଥାନକୁ ଡେଇଁ ପଡ଼ିଥାଏ । ଏଥିରେ ମାଧ୍ୟାକର୍ଷଣର ଶକ୍ତି ଏକ ପ୍ରମୁଖ ଭୂମିକା ଗ୍ରହଣ କରିଥାଏ । ଏହି ସାପଟି ତଳୁ ଉପରକୁ ଉଡିଥିବାର ଦେଖାଯାଏ ନାହିଁ । ଯେବେ ବି ଏହା ଉଡୁଥିବାର ଦେଖାଯାଏ, ଏହା ଏକ ବଡ଼ ଗଛରୁ ତଳକୁ କିମ୍ବା ଗୋଟିଏ ସ୍ଥାନରୁ ଅନ୍ୟ ଏକ ସ୍ଥାନକୁ ଡେଉଁଥାଏ । ଏଥିପାଇଁ ଏମାନେ ସାଧାରଣତଃ 12ରୁ 15 ଫୁଟ ଉଚ୍ଚ ବଡ଼ ବଡ଼ ଗଛରେ ବାସ କରିଥାନ୍ତି ।
ଏନେଇ ବନ୍ୟଜନ୍ତୁ ବିଶେଷଜ୍ଞ ବିଡି ସଞ୍ଜି କହିଛନ୍ତି, "ତକ୍ଷକ ସାପ ସାଧାରଣତଃ 3ରୁ 4 ଫୁଟ ଲମ୍ବର ହୋଇଥାନ୍ତି । ଏହି ସାପ ବଡ଼ବଡ଼ ଗଛରେ ରହିଥାନ୍ତି । ତକ୍ଷକ ସାପ ଗୋଟିଏ ଗଛର ଡାଳରୁ ଅନ୍ୟ ଏକ ଗଛକୁ ଲମ୍ଫ ମାରିଥନ୍ତି । ଏଥିପାଇଁ ସାପଗୁଡ଼ିକ ନିଜ ଶରରୀରୁ ଏକ ବିଶେଷ ଆକାର ଧାରଣ କରିଥାନ୍ତି । ଏଗୁଡ଼ିକ ଉପରୁ ତଳକୁ ଉଡ଼ିଥାନ୍ତି ।"
ଉଡ଼ୁଥିବା ସାପର ରହସ୍ୟ, କଣ କହୁଛି ଜର୍ଣ୍ଣାଲ : ଜର୍ଣ୍ଣାଲ ଅଫ ଏନଭାରମେଣ୍ଟାଲ ବାୟୋଲୋଜି ଅନୁସାରେ, ସାପ ଉଡ଼ୁଥିବା ଜୀବ ନୁହେଁ । ଯେତେବେଳେ ସାପ ଗୋଟିଏ ସ୍ଥାନରୁ ଅନ୍ୟ ଏକ ସ୍ଥାନକୁ ଗତି କରେ, ସେତେବେଳେ ସାପର ଶରୀରରେ ପରିବର୍ତ୍ତନ ଆସିଥାଏ । ଅର୍ଥାତ୍ ସାପ ଏରୋଡାଇନାମିକ୍ ଶକ୍ତି ସୃଷ୍ଟି କରିଥାଏ । ଯାହା ଏକ ବିମାନର ଡେଣା ପରି ହୋଇଥାଏ । ତେଣୁ ଶାରୀରିକ ପରିବର୍ତ୍ତନ ହେତୁ ଏହା ଉଡ଼ିବାରେ ସଫଳ ହୋଇଥାଏ ।
