ହାଇଦ୍ରାବାଦ: ଏବେ ଦେଶରେ କୃଷକ ଆନ୍ଦୋଳନ ତେଜୁଥିବା ବେଳେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ବିଦେଶ ଗସ୍ତରେ ଅଛନ୍ତି । ଯାହାକୁ ନେଇ ବରିଷ୍ଠ ବିଜେପି ନେତା ତଥା ପୂର୍ବତନ କେନ୍ଦ୍ରମନ୍ତ୍ରୀ ସୁବ୍ରମଣ୍ୟମ ସ୍ବାମୀ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ସମାଲୋଚନା କରିଛନ୍ତି । ସବୁବେଳେ ନିଜ ଦଳକୁ ସମାଲୋଚନା କରି ଚର୍ଚ୍ଚାରେ ରହୁଥିବା ସ୍ବାମୀ କହିଛନ୍ତି, ପ୍ରଧାନମନ୍ତ୍ରୀଙ୍କ ପ୍ରାଥମିକତା କ'ଣ, ତାହା ନରେନ୍ଦ୍ର ମୋଦି ଜାଣିବା ଉଚିତ ।
ଭାରତୀୟ ଜନତା ପାର୍ଟିର ଏହି ବରିଷ୍ଠ ନେତା ସ୍ବାମୀ ‘ବିରାଟ ହିନ୍ଦୁସ୍ଥାନ ସଙ୍ଗମ’ ସଂଗଠନର ସଭାପତି ମଧ୍ୟ ଅଛନ୍ତି । ସ୍ବାମୀ କହିଛନ୍ତି, ‘‘ଏବେ ଦେଶରେ କେବଳ ସାଧାରଣ ନିର୍ବାଚନ ନିକଟତର ହୋଇନି ବରଂ ଉତ୍ତର ଭାରତରେ ପଞ୍ଜାବ ଓ ହରିୟାଣାରେ ବ୍ୟାପକ କୃଷକ ଆନ୍ଦୋଳନ ମଧ୍ୟ ଜାରି ରହିଛି । ଏହି ଆନ୍ଦୋଳନ ଆହୁରି ବ୍ୟାପକ ରୂପ ନେଇପାରେ, ହିଂସା ମଧ୍ୟ ଘଟିବାର ଆଶଙ୍କା ରହିଛି । ଏପରି ସମୟରେ ପ୍ରଧାନମନ୍ତ୍ରୀ କ'ଣ ଦେଶରେ ଅନୁପସ୍ଥିତ ରହିବା ଉଚିତ କି ? ଜଣେ ପ୍ରଧାନମନ୍ତ୍ରୀଙ୍କର ପ୍ରାଥମିକତା କ'ଣ ରହିବା ଉଚିତ, ସେକଥା ନରେନ୍ଦ୍ର ମୋଦି ଜାଣିବା ଉଚିତ ।’’
ତେବେ ଏହି କୃଷକ ଆନ୍ଦୋଳନ ପ୍ରସଙ୍ଗରେ ପୂର୍ବାହ୍ନରେ ମଧ୍ୟ ସ୍ବାମୀଙ୍କର ଏକ ବୟାନ ସାମ୍ନାକୁ ଆସିଥିଲା । ସେ କହିଥିଲେ କୃଷକଙ୍କ ବିରୋଧରେ ମୋଦି ସରକାର ଡ୍ରୋନ ବ୍ୟବହାର କରୁଥିବା ଶୁଣିବାକୁ ମିଳୁଛି । ଯଦି କଥା ସତ୍ୟ ହୋଇଥାଏ, ତେବେ ଏହା ଜାତିସଂଘର ମାନବାଧିକାର ନିୟମାବଳୀର ବିରୁଦ୍ଧାଚରଣ କରୁଛି ।
ଭାରତୀୟ ଜନତା ପାର୍ଟିର ଏହି ବରିଷ୍ଠ ନେତା ନିଜ ଦଳ ଓ ପ୍ରଧାନମନ୍ତ୍ରୀ ମୋଦିଙ୍କୁ ସିଧା ସମାଲୋଚନା କରି ବୟାନ ଦେବା ପ୍ରଥମ ଘଟଣା ନୁହେଁ । ସେ ପୂର୍ବରୁ ମଧ୍ୟ ଏକାଧିକ ପ୍ରସଙ୍ଗରେ ସିଧାସଳଖ ପ୍ରଧାନମନ୍ତ୍ରୀଙ୍କ ନିଷ୍ପତ୍ତି ଓ ନିଜ ଦଳର ଶାସନ ନୀତିକୁ ଖୋଲା ସମାଲୋଚନା କରିବାର ଏକାଧିକ ଉଦାହରଣ ରହିଛି । ପୂର୍ବ-ଲଦାଖରେ ଚୀନର ଅନୁପ୍ରବେଶ ପ୍ରସଙ୍ଗ, ଅର୍ଥନୀତି ଓ ମୁଦ୍ରାସ୍ଫିତୀ ପରି ମାମଲାରେ ସେ ମୋଦି ସରକାରଙ୍କ ନୀତିକୁ ସମାଲୋଚନା କରିଛନ୍ତି । ଅର୍ଥନୀତିରେ ମୋଦି ସରକାର ସମ୍ପୂର୍ଣ୍ଣ ଫେଲ୍ ବୋଲି ସ୍ବାମୀଙ୍କ ମନ୍ତବ୍ୟ ଗଣମାଧ୍ୟମରେ ଚର୍ଚ୍ଚା ସୃଷ୍ଟି କରିଥିଲା । ନିଜର ଲଗାମଛଡା ବୟାନବାଜି ପାଇଁ ଜଣାଶୁଣା ସ୍ବାମୀଙ୍କ ବିରୋଧରେ କୌଣସି ଦଳୀୟ ଶୃଙ୍ଖଳାଗତ କାର୍ଯ୍ୟାନୁଷ୍ଠାନର ନଜିର ମଧ୍ୟ ନାହିଁ ।
ଏଠାରେ ଉଲ୍ଲେଖଯୋଗ୍ୟ ଯେ, ଉତ୍ତର ଭାରତରେ ଚାଷୀ ଆନ୍ଦୋଳନ ମଙ୍ଗଳବାରଠାରୁ ବ୍ୟାପକ ହେବାରେ ଲାଗିଛି । କେନ୍ଦ୍ର ସରକାର ଓ କୃଷକ ସଂଗଠନ ମଧ୍ୟରେ ଆଲୋଚନା ବିଫଳ ହୋଇଛି । ହରିୟାଣା- ପଞ୍ଜାବ ସୀମାରେ ପୋଲିସ ଓ କୃଷକଙ୍କ ମଧ୍ୟରେ ଗତ 48 ଘଣ୍ଟା ଧରି ସଂଘର୍ଷ ଜାରି ରହିଛି । ଅନ୍ୟପଟେ ପ୍ରଧାନମନ୍ତ୍ରୀ ଏବେ ଦୁଇଦିନିଆ ୟୁଏଇ ଓ କତାର ଗସ୍ତରେ ଅଛନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ
