ଶ୍ରୀନଗର: କାଶ୍ମୀରର ଅନନ୍ତନାଗରେ ମର୍ମନ୍ତୁଦ ସଡକ ଦୁର୍ଘଟଣା । ଏକ କାର ଖାଇକୁ ଖସିପଡିବା ଫଳରେ ଗୋଟିଏ ପରିବାରର 8ଜଣଙ୍କ ମୃତ୍ୟୁ ହୋଇଛି । ମୃତକଙ୍କ ମଧ୍ୟରେ 5ଜଣ 18ବର୍ଷରୁ କମ ବୟସର ରହିଛନ୍ତି । ଅନନ୍ତନାଗ ଜିଲ୍ଲାର ଡାକସୁମରେ ଆଜି ପୂର୍ବାହ୍ନରେ ଏହି ଦୁର୍ଘଟଣା ଘଟିଛି । ସ୍ଥାନୀୟ ଲୋକେ ଉଦ୍ଧାର ପ୍ରକ୍ରିୟା ଆରମ୍ଭ କରିବା ସହ ସ୍ଥାନୀୟ ପୋଲିସକୁ ସୂଚନା ଦେଇଥିଲେ । ଆମ୍ବୁଲାନ୍ସ ଟିମ ସହ ପୋଲିସ ଓ ପ୍ରଶାସନିକ ଅଧିକାରୀଙ୍କ ଟିମ ପହଞ୍ଚି ରେସ୍କ୍ୟୁ ଅପରେସନ ଆରମ୍ଭ କରିଥିଲା । ଏଥିରେ 8ଜଣଙ୍କ ମୃତ୍ୟୁ ହୋଇଥିବା ପ୍ରାଥମିକ ଭାବେ ସ୍ପଷ୍ଟ ହୋଇଛି । ମୃତକଙ୍କ ପରିଚୟ ସମ୍ପର୍କରେ ପୋଲିସ କୌଣସି ସୂଚନା ସ୍ପଷ୍ଟ କରିନି । ସେମାନଙ୍କୁ ଚିହ୍ନଟ ପ୍ରକ୍ରିୟା ଜାରି ରହିଛି ।
#WATCH | Jammu and Kashmir: People of the same family met with a car accident in the Daksum area of Anantnag district. Further details awaited. pic.twitter.com/zDoU7eJqXv
— ANI (@ANI) July 27, 2024
ମୃତକଙ୍କ ମଧ୍ୟରେ 5 ନାବାଳକ: -
ସୂଚନା ଅନୁସାରେ, ମୃତକମାନେ ଏକ କାରରେ କିସ୍ତାଓ୍ବାରରୁ ଆସୁଥିଲା । କାରଟି ଡାକସୁମ ଏରିଆରେ ଏକ ଗଭୀର ଖାଇକୁ ଖସିପଡିଥିଲା । ଦୁର୍ଘଟଣାର କାରଣ ସ୍ପଷ୍ଟ ହୋଇନଥିଲେ ସୁଦ୍ଧା କୌଣସି କାରଣରୁ ଗାଡିଟି ଭାରସାମ୍ୟ ହରାଇ ଖସିପଡିଥିବା ସନ୍ଦେହ କରାଯାଉଛି । ଉଦ୍ଧାରକାରୀ ଟିମ ଘଟଣାସ୍ଥଳରେ ପହଞ୍ଚିବା ପରେ ସମସ୍ତଙ୍କୁ ଉଦ୍ଧାର କରାଯାଇ ସ୍ଥାନୀୟ ହସ୍ପିଟାଲକୁ ପଠାଯାଇଥିଲା । ହେଲେ ଉଦ୍ଧାର ବେଳକୁ ସେମାନଙ୍କ ମୃତ୍ୟୁ ହୋଇସାରିଥିଲା । ଏଥିରେ ଡ୍ରାଇଭର ସମେତ 8ଜଣଙ୍କ ମୃତ୍ୟୁ ଘଟିଛି । ମୃତକଙ୍କ ମଧ୍ୟରେ ତିନି ପୁରୁଷ ଓ ମହିଳାଙ୍କ ବ୍ୟତୀତ 5 ଜଣ ବୟସ 5ରୁ 15 ବର୍ଷ ମଧ୍ୟରେ ହେବା ନେଇ ଗଣମାଧ୍ୟମ ସୂତ୍ରରୁ ସୂଚନା ମିଳିଛି ।
ନିକଟରେ ସିରିଜ ଦୁର୍ଘଟଣା ନେଇଥିଲା 6 ଜୀବନ:-
21ତାରିଖରେ ଘାଟିରେ ଦୁଇଟି ସିରିଜ ଦୁର୍ଘଟଣା ଘଟିଥିଲା । ଏଥିରେ 6ଜଣ ପ୍ରାଣ ହରାଇଥିଲେ । ରଜୌରୀରେ ଏକ ଟାକ୍ସି ଭାରସାମ୍ୟ ହରାଇ ଖାଇକୁ ଖସି ପଡିଥିଲା । ଏଥିରେ 8ଜଣ ଯାତ୍ରୀ ଥିବା ବେଳେ 3ଜଣଙ୍କର ଘଟଣାସ୍ଥଳରେ ମୃତ୍ୟୁ ହୋଇଥିଲା । ଅନ୍ୟ ତିନି ଗୁରୁତର ଅବସ୍ଥାରେ ହସ୍ପିଟାଲକୁ ସ୍ଥାନାନ୍ତରିତ ହୋଇଥିଲେ । ସେହିଦିନ ରିଆସି ଜିଲ୍ଲାରେ ମଧ୍ୟ ଏକ କାର ଖାଇକୁ ଖସିପଡିଥିଲା । ଏଥିରେ ମଧ୍ୟ 3ଜଣଙ୍କ ପ୍ରାଣହାନୀ ଘଟିଥିଲା । ଆଜି ପୁଣି ଏକ ମର୍ମନ୍ତୁଦ ସଡକ ଦୁର୍ଘଟଣାରେ ଗୋଟିଏ ପରିବାରର 8 ଜଣଙ୍କ ଜୀବନ ଯାଇଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
