ଡେରାଡୁନ: ବିଜୁଳି କିମ୍ବା ଟେଲିଫୋନ୍ ନେଟଓ୍ବାର୍କ ନଥିବା ଚୀନ ସୀମାବର୍ତ୍ତୀ ଦୁର୍ଗମ ପାହାଡିଆ ଗାଁରେ ରାତି ବିତାଇବା ପରେ ଦୀର୍ଘ ୧୬ ଘଣ୍ଟା ପରେ ଉଦ୍ଧାର ହେଲେ ମୁଖ୍ୟ ନିର୍ବାଚନ କମିଶନର ରାଜୀବ କୁମାର ଓ ତାଙ୍କ ଟିମ୍ । ଚୀନ୍ ସୀମାନ୍ତ ତିବ୍ବତ ନିକଟବର୍ତ୍ତୀ ଉତ୍ତରାଖଣ୍ଡ ପିଥୋରଗଡର ଏକ ଦୁର୍ଗମ ଅଞ୍ଚଳରେ ଗତକାଲି (ବୁଧବାର) ରାଜୀବଙ୍କୁ ନେଇ ଯାଉଥିବା ହେଲିକପ୍ଟର ଏମରଜେନ୍ସି ଲ୍ୟାଣ୍ଡିଂ କରିଥିଲା । ହିମାଳୟ ପାର୍ବତ୍ୟାଞ୍ଚଳର ଏକ ପାହାଡିଆ ଗ୍ରାମରେ ରାତି କାଟିବା ପରେ ଆଜି ତାଙ୍କ ହେଲିକପ୍ଟର ସୁରକ୍ଷିତ ଉଡାଣ ଭରି ମୁନସ୍ୟାରୀରେ ଲ୍ୟାଣ୍ଡ କରିଛି ।
‘ସିଇସି’ ରାଜୀବ କୁମାରଙ୍କ ସହ ଉକ୍ତ ହେଲିକପ୍ଟରରେ ଉତ୍ତରାଖଣ୍ଡ ମୁଖ୍ୟ ନିର୍ବାଚନ ଅଧିକାରୀ (ସିଇଓ) ବିଜୟ କୁମାର, ସିଇସିଙ୍କ ବ୍ୟକ୍ତିଗତ ସୁରକ୍ଷା ଅଧିକାରୀ ନବୀନ କୁମାର, ହେଲିକପ୍ଟରର ପାଇଲଟ ଓ ଅନ୍ୟ କିଛି ଅଧିକାରୀ ମଧ୍ୟ ଥିଲେ । ଖରାପ ପାଗ କାରଣରୁ ହେଲିକପ୍ଟରଟି ଜରୁରୀ ଅବତରଣ କରିଥିଲା ।
- ହଠାତ ବିଗିଡିଥିଲା ପାଗ
ଉତ୍ତରାଖଣ୍ଡର ମିଲମ ଗ୍ଲେସିୟର ଅଭିମୁଖେ ଉଡାଣ ଭରିଥିଲେ ମୁଖ୍ୟ ଆୟୁକ୍ତ ରାଜୀବ କୁମାର ଓ ତାଙ୍କ ଟିମ୍ । ଗତକାଲି (ବୁଧବାର) ଅପରାହ୍ନରେ ହଠାତ ପାଗରେ ପରିବର୍ତ୍ତନ ଦେଖାଯାଇଥିଲା । ପ୍ରବଳ ବର୍ଷା ଓ ଲୋ-ଭିଜିବିଲିଟି କାରଣରୁ ରାଜୀବ କୁମାରଙ୍କ ହେଲିକପ୍ଟର ଅପରାହ୍ନ ପ୍ରାୟ ୨ଟା ବେଳେ ମୁନସ୍ୟାରୀରୁ ପ୍ରାୟ ୩୦ କି.ମି ଦୂର ରାଲାମ ଗ୍ରାମର ନିକଟରେ ଲ୍ୟାଣ୍ଡିଂ କରିଥିଲା । ଏହି କ୍ଷେତ୍ରଟି ଚୀନ ସୀମାନ୍ତବର୍ତ୍ତୀ ଅଞ୍ଚଳ । ଏହି ଅଞ୍ଚଳରେ ସୀମାପାର ଅନୁପ୍ରବେଶ ଗତିବିଧି ମଧ୍ୟ ରହିଛି । ହିମାଳୟ ପାହାଡି କ୍ଷେତ୍ରରେ ଥିବା ଏହି ଦୁର୍ଗମ ଗ୍ରାମରେ ମୁଖ୍ୟ ନିର୍ବାଚନ ଆୟୁକ୍ତ ଓ ତାଙ୍କ ସହ ଥିବା ଅଧିକାରୀ ରାତି ବିତାଇବାକୁ ବାଧ୍ୟ ହୋଇଥିଲେ ।
- ଗାଁରେ ନଥିଲା ବିଜୁଳ ଓ ଫୋନ ସୁବିଧା:-
ଏହି ଗ୍ରାମରେ ଯୋଗାଯୋଗ ଓ ସଂଯୋଗୀକରଣର କୌଣସି ବ୍ୟବସ୍ଥା ନଥିଲା । ଏପରିକି ବିଜୁଳି କିମ୍ବା ଟେଲିଫୋନ୍ ସୁବିଧା ମଧ୍ୟ ନଥିଲା । ଏହାର କିଛି ଘଣ୍ଟା ପରେ ସ୍ଥାନୀୟ ପ୍ରଶାସନ ‘ସିଇସି’ଙ୍କ ହେଲିକପ୍ଟରର ଜରୁରୀ ଅବତରଣ ସମ୍ପର୍କରେ ଜାଣିବାକୁ ପାଇଲା । ପରେ ସ୍ଥାନୀୟ ମଣ୍ଡଳ ଆୟୁକ୍ତ ଦୀପକ କୁମାର ଓ ଜିଲ୍ଲାଧିକାରୀ ବିନୋଦ ଗିରିଶ ‘ସିଇସି’ଙ୍କ ସମେତ ଅନ୍ୟ ଅଧିକାରୀଙ୍କ ସୁରକ୍ଷା ଓ ରାତ୍ରିରହଣୀ ପାଇଁ ସମସ୍ତ ବ୍ୟବସ୍ଥା କରିବାକୁ ନିର୍ଦ୍ଦେଶ ଦେଇଥିଲେ ।
ଏହା ମଧ୍ୟ ପଢନ୍ତୁ;-ଜମ୍ମୁ କାଶ୍ମୀର ନିର୍ବାଚନକୁ ନେଇ ବଡ଼ ଅପଡେଟ, ଆସିଲା ମୁଖ୍ୟମନ୍ତ୍ରୀଙ୍କ ନାଁ ଜମ୍ମୁ-କାଶ୍ମୀର ଓ ହରିୟାଣାରେ ଭୋଟ ଗଣତି ଜାରି; ଖାତା ଖୋଲିଲା କଂଗ୍ରେସ, ଜୁଲାନା ଆସନରୁ ବାଜି ମାରିଲେ ଭିନେଶ ଫୋଗତ |
- ଆଜି ସକାଳେ ପହଞ୍ଚିଲେ ମୁନସ୍ୟାରୀ
ଆଜି ପାଗରେ ସୁଧାର ଆସିବା ପରେ ‘ସିଇସି’ଙ୍କ ହେଲିକପ୍ଟର ପୁଣି ମୁନସ୍ୟାରୀ ଅଭିମୁଖେ ଉଡାଣ ଭରିଥିଲା । ସକାଳ ପ୍ରାୟ ସାଢେ ୬ଟାରେ ହେଲିକପ୍ଟରଟି ମୁନସ୍ୟାରୀ ହେଲିପ୍ୟାଡରେ ସୁରକ୍ଷିତ ଅବତରଣ କରିଛି । ସ୍ଥାନୀୟ ପ୍ରଶାସନର ଅଧିକାରୀ ଓ ଡାକ୍ତରୀ ଟିମ୍ ପୂର୍ବରୁ ପ୍ରସ୍ତୁତ ହୋଇ ରହିଥିଲେ । କେନ୍ଦ୍ରୀୟ ଫୋର୍ସର ଯବାନମାନେ ମଧ୍ୟ ହେଲିପ୍ୟାଡରେ ନିୟୋଜିତ ହୋଇଥିଲେ । ‘ସିଇସି’ଙ୍କ ସମେତ ଅନ୍ୟ ଅଧିକାରୀଙ୍କ ପ୍ରାଥମିକ ସ୍ବାସ୍ଥ୍ୟ ପରୀକ୍ଷା ମଧ୍ୟ କରାଯାଇଛି । ପରେ ନିର୍ବାଚନ ଆୟୁକ୍ତଙ୍କ ଟିମ୍ ‘ଆଇଟିବିପି’ କ୍ୟାମ୍ପ ଅଭିମୁଖେ ଯାଇଛନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ
