ନୂଆଦିଲ୍ଲୀ: ମୁଣ୍ଡ ଉପରେ ବିଧାନସଭା ନିର୍ବାଚନ । ନିର୍ବାଚନର 5 ଦିନ ପୂର୍ବରୁ ଆମ ଆଦମୀ ପାର୍ଟିକୁ ଲାଗିଛି ବଡ଼ଧରଣର ଝଟ୍କା । କେଜ୍ରିୱାଲଙ୍କ ହାତ ଛାଡିଛନ୍ତି 7 ବିଧାୟକ । ଆମ ଆଦମୀ ପାର୍ଟିର 7 ବିଧାୟକ ଆଜି(ଶୁକ୍ରବାର) ପ୍ରାଥମିକ ସଦସ୍ୟତା ପଦରୁ ଇସ୍ତଫା ଦେଇଛନ୍ତି । ସେ ତାଙ୍କ ଇସ୍ତଫାପତ୍ର ଆପ ରାଷ୍ଟ୍ରୀୟ ସଂଯୋଜକ ଅରବିନ୍ଦ କେଜ୍ରିୱାଲଙ୍କୁ ପଠାଇ ଦେଇଛନ୍ତି ।
କେଉଁ ବିଧାୟକ ଦେଲେ ଇସ୍ତଫା ?
- ଭାବନା ଗୌଡ (ପାଲମ ବିଧାୟକ)
- ବିଏସ ଜୁନ (ବିଜବାସନ ବିଧାୟକ)
- ପବନ ଶର୍ମା (ଆଦର୍ଶ ନଗର ବିଧାୟକ)
- ମଦନ ଲାଲ(କସ୍ତୁରବା ନଗର ବିଧାୟକ)
- ରାଜେଶ ଋଷି (ଜନକପୁରୀ)
- ରୋହିତ ମେହଲୋରିୟା (ତ୍ରିଲୋକପୁରୀ ବିଧାୟକ)
- ନରେଶ ଯାଦବ (ମହରୌଲି ବିଧାୟକ)
ଦୁଇ ପୃଷ୍ଠାର ଚିଠିରେ ଲେଖିଲେ ଇସ୍ତଫାର କାରଣ:
ଆମ ଆଦମୀ ପାର୍ଟିର ରାଷ୍ଟ୍ରୀୟ ସଂଯୋଜକ ଅରବିନ୍ଦ କେଜ୍ରିୱାଲଙ୍କୁ ବିଧାୟକ ନରେଶ ଯାଦବ 2 ପୃଷ୍ଠା ସମ୍ବଳିତ ଇସ୍ତଫା ପତ୍ର ଲେଖିଛନ୍ତି । କେଉଁ କାରଣ ପାଇଁ ଦଳ ଛାଡୁଛନ୍ତି ତାହା କାରଣ ମଧ୍ୟ ଉଲ୍ଲେଖ କରିଛନ୍ତି । ମହରୌଲି ବିଧାୟକ ନରେଶ ଯାଦବ ଇସ୍ତଫା ପତ୍ରରେ ଲେଖିଛନ୍ତି କି, ଆମ ଆଦମୀ ପାର୍ଟିର ଜନ୍ମ ଦୁର୍ନୀତି ବିରୋଧରେ ହୋଇଥିଲା । ଭାରତୀୟ ରାଜନୀତିରୁ ଦୁର୍ନୀତି ମୁକ୍ତ କରିବାକୁ ଏହାର ସୃଷ୍ଟି ହୋଇଥିଲା । ହେଲେ ଏବେ ଆମ ଆଦମୀ ପାର୍ଟି ଦୁର୍ନୀତିରେ ବୁଡି ରହିଛି । ସଚ୍ଚୋଟତା ରାଜନୀତି ପାଇଁ ଆମ ଆଦମୀ ପାର୍ଟିରେ ମିଶିଥିଲି । କିନ୍ତୁ ଏବେ ରାଜନୀତିରେ କୌଣସି ସଚ୍ଚୋଟତା ପରିଲିଖିତ ହେଉନାହିଁ ।
ସେ ଆହୁରି ଲେଖିଛନ୍ତି, ସେ ତାଙ୍କ 2 ବର୍ଷର କାର୍ଯ୍ୟକାଳରେ ମୁଁ 100 ପ୍ରତିଶତ ସଚ୍ଚୋଟତା ସହ କରିଛି । ମହରୌଲିବାସୀ ଜାଣିଛନ୍ତି ମୋ ସଚ୍ଚୋଟତା ରାଜନୀତି ଓ କାମ ରାଜନୀତି ବିଷୟରେ । ହେଲେ ଦଳ ଏବେ ଯେଉଁଭଳି ଭାବେ ଦୁର୍ନୀତିରେ ଲିପ୍ତ ଏଥିପାଇଁ ଦଳ ଛାଡିବାକୁ ନିଷ୍ପତ୍ତି ନେଲି ।
ସେ ଆହୁରି ଲେଖିଛନ୍ତି, ଆମ ଆଦମୀ ପାର୍ଟିରେ ବର୍ତ୍ତମାନ କିଛି ଜଣ ସଚ୍ଚୋଟ ରାଜନୀତି କରୁଥିବା ବ୍ୟକ୍ତି ରହିଛନ୍ତି । ସେମାନଙ୍କ ସହ ବନ୍ଧୁତା ସର୍ବଦା ରହିବ । ମହରୌଲି ଜନତାଙ୍କ କୃତଜ୍ଞତା ଜ୍ଞାପନ କରୁଛି । ଦୁର୍ନୀତିକୁ ଦେଖି ଦଳ ଛାଡିବା ପାଇଁ ନିଷ୍ପତ୍ତି ନେଇଛନ୍ତି ପାର୍ଟିର ସମସ୍ତ ପଦରୁ ଇସ୍ତଫା ପ୍ରଦାନ କରୁଛି ।
ଟିକଟ ଦେଇ ପୁଣି ଛଡାଇନେଇଥିଲା ଆପ୍:
ମହରୌଲୀ ଆପ ବିଧାୟକ ନରେଶ ଯାଦବଙ୍କୁ ପ୍ରଥମେ ଦଳ ଟିକଟ ଦେଇଥିଲା । ହେଲେ ପରେ ଦଳ ତାଙ୍କ ଟିକଟ କାଟି ତାଙ୍କ ବଦଳରେ ସେହି ଆସନରୁ ମହେନ୍ଦ୍ର ଚୌଧୁରୀଙ୍କୁ ପ୍ରାର୍ଥୀ କରିଛି । ଏହାକୁ ନେଇ ଅସନ୍ତୁଷ୍ଟ ଥିଲେ ନରେଶ ଯାଦବ ।
5ରେ ଭୋଟ, ଆପକୁ ଲାଗିଲା ଝ୍ଟକା:
ଆସନ୍ତା ଫେବୃଆରୀ 5ରେ ନୂଆଦିଲ୍ଲୀରେ ଭୋଟ ଗ୍ରହଣ ହେବାକୁ ଯାଉଛି । 70 ଆସନ ବିଶିଷ୍ଟ ନୂଆଦିଲ୍ଲୀର ଭାଗ୍ୟ ନିର୍ଦ୍ଧାରଣ କରିବେ ଦିଲ୍ଲୀବାସୀ । 8ରେ ଫଳାଫଳ ଆସିବ । ଏହା ପୂର୍ବରୁ ଆପର 7 ବିଧାୟକ ଦଳରୁ ଇସ୍ତଫା ଦେବା ଦଳ ପ୍ରତି ପ୍ରଭାବ ପକାଇବା ନେଇ ଚର୍ଚ୍ଚା ଜୋର ଧରିଛି ।
