ଲକ୍ଷ୍ନୌ: ପୋଲିସ ଚାକିରି ଛାଡି ରାଧାରାଣୀ ବେଶ ଧାରଣ କରିଥିବା ଉତ୍ତର ପ୍ରଦେଶର ପୂର୍ବ ଆଇଜିପି ତଥା ଓଡିଆ ଆଇପିଏସ ଦେବେନ୍ଦ୍ର କିଶୋର ପଣ୍ଡା ପୁଣିଥରେ ଚର୍ଚ୍ଚାକୁ ଆସିଛନ୍ତି । ଏଥର କୃଷ୍ଣ ପ୍ରେମ ପାଇଁ ନୁହେଁ ବରଂ ଅନ୍ୟ ଏକ ରୋଚକ କାରଣ ପାଇଁ ସେ ଲାଇମଲାଇଟକୁ ଆସିିଛନ୍ତି । ତାଙ୍କୁ ଏକ ବିଦେଶୀ କମ୍ପାନୀର ଏଜେଣ୍ଟ 381 କୋଟି ଟଙ୍କାର ଠକେଇ କରିଛି ବୋଲି ପଣ୍ଡା ନିଜେ ପୋଲିସରେ ଅଭିଯୋଗ କରିଛନ୍ତି ।
- ବିଦେଶୀ କମ୍ପାନୀରେ କରୁଥିଲେ ଟ୍ରେଡିଂ
ଡି କେ ପଣ୍ଡା ଏକ ବିଦେଶୀ କମ୍ପାନୀରେ ଟଙ୍କା ଲଗାଇ ଏହି ରାଶି ଲାଭ କରିଥିଲେ । ମାତ୍ର ଉକ୍ତ କମ୍ପାନୀ ଓ ଏହାର ଜଣେ ଏଜେଣ୍ଟ ତାଙ୍କୁ ହ୍ବାଟ୍ସଆପରେ ଫୋନ କରି ଧମକ ଦେବା ସହ ସବୁତକ ଟଙ୍କା ଗାଏବ କରିଦେଇଛନ୍ତି ବୋଲି ପଣ୍ଡା ତାଙ୍କ ଏତଲାରେ ଦର୍ଶାଇବା ପରେ ଭିନ୍ନ ତଥ୍ୟ ସାମ୍ନାକୁ ଆସିଛି । ତେବେ ପୋଲିସ ଚାକିରି ଛାଡି ଆଧ୍ୟାତ୍ମିକତାରେ ପ୍ରବେଶ କରିଥିବା ଦାବି କରୁଥିବା ପଣ୍ଡା ବିଦେଶୀ କମ୍ପାନୀରେ ମୋଟା ଅଙ୍କର ଟ୍ରେଡିଂ କରୁଥିବା ଓ ଏଥିରୁ କୋଟି କୋଟି ଟଙ୍କା ଲାଭ କରୁଥିବା କଥା ପଦାରେ ପ୍ରାୟତଃ ପଡିଛି ।
- 381 କୋଟି ଟଙ୍କା ଜିତିଥିଲେ, ଠକିନେଲା ବିଦେଶୀ କମ୍ପାନୀ !
ପୂର୍ବତନ ପୋଲିସ ଆଇଜି ଡିକେ ପଣ୍ଡା ଗତକାଲି (ମଙ୍ଗଳବାର) ଉତ୍ତର ପ୍ରଦେଶର ଧୁମଙ୍ଗଞ୍ଜ ପୋଲିସ ଷ୍ଟେସନରେ ଏ ସମ୍ପର୍କିତ ଏକ ଅଭିଯୋଗ କରିଛନ୍ତି । ବ୍ରିଟେନର ଏକ କମ୍ପାନୀ ଏବଂ ଏହାର ଜଣେ ଏଜେଣ୍ଟଙ୍କ ବିରୋଧରେ ଏହି ଏତଲା କରାଯାଇଛି । ସେ ଏହି କମ୍ପାନୀରୁ 381 କୋଟି ଟଙ୍କା ଲାଭ କରିଛନ୍ତି, ସେ ଏହାକୁ ତାଙ୍କ ବ୍ୟାଙ୍କ ଆକାଉଣ୍ଟକୁ ଟ୍ରାନ୍ସଫର କରିବାକୁ ଚାହୁଁଥିଲେ, ମାତ୍ର କମ୍ପାନୀ ଓ ଏହାର ଜଣେ ଏଜେଣ୍ଟ ତାଙ୍କ ଟଙ୍କା ଠକି ନେଇଛନ୍ତି । ଏପରିକି କୌଣସି ଅପ୍ରୀତିକର ଘଟଣା ପାଇଁ ତାଙ୍କ ପରିଚୟପତ୍ର ଏବଂ ଆଧାର କାର୍ଡ ଉକ୍ତ କମ୍ପାନୀ ଦ୍ବାରା ବ୍ୟବହାର କରାଯାଇପାରିବ ବୋଲି ମଧ୍ୟ ସେ ଅଭିଯୋଗରେ ଆଶଙ୍କା ପ୍ରକାଶ କରିଛନ୍ତି । ସେହି ଆଧାରରେ ଉତ୍ତର ପ୍ରଦେଶ ପୋଲିସ ଏକ ମାମଲା ରୁଜୁ କରି ତଦନ୍ତ ଆରମ୍ଭ କରିଛି ।
- ହ୍ବାଟ୍ସଆପରେ ଟଙ୍କା ମାଗିଥିଲା ବିଦେଶୀ ଏଜେଣ୍ଟ:-
ଅଭିଯୋଗରେ ପଣ୍ଡା ଦର୍ଶାଇଛନ୍ତି, ସେ ରାହୁଲ ନାମକ ଜଣେ ବ୍ୟକ୍ତିଙ୍କ ସହ ଅନଲାଇନରେ ପରିଚିତ ହୋଇଥିଲେ । ଏହା ପରେ ସେ ବ୍ରିଟେନର ଫିନ ଏକ୍ସ ନାମକ ଏକ କମ୍ପାନୀରେ ଟଙ୍କା ଲଗାଇଥିଲେ । 25 ତାରିଖରେ ଜଣେ ଏଜେଣ୍ଟ ତାଙ୍କୁ ହ୍ବାଟ୍ସଆପରେ ସେ 381 କୋଟି ଟଙ୍କା ଜିତିଥିବା ଜଣାଇଥିଲେ ଓ ଏଥିପାଇଁ 8 ଲକ୍ଷ ଟଙ୍କାର ଟାକ୍ସ ମଧ୍ୟ ମାଗିଥିଲେ । ହେଲେ ପଣ୍ଡା ଏହି ରାଶି ପ୍ରଦାନ କରିବାକୁ ମନା କରିବାରୁ ସେହି ଲାଭାଂଶ ଟଙ୍କା ସେ ପାଇନଥିବା କହିଛନ୍ତି ।
- ଚର୍ଚ୍ଚିତ ଓଡିଆ IPS ଡି.କେ ପଣ୍ଡା :-
ଦେବେନ୍ଦ୍ର କିଶୋର ପଣ୍ଡା ଜଣେ ଓଡିଆ ପୋଲିସ ଅଧିକାରୀ । ସେ 1971 ମସିହା ବ୍ୟାଚର ଉତ୍ତର ପ୍ରଦେଶ କ୍ୟାଡର ଭାରତୀୟ ପୋଲିସ ସେବା ଅଧିକାରୀ ଭାବେ କାମ ଆରମ୍ଭ କରିଥିଲେ । ଦୀର୍ଘ ବର୍ଷ ପୋଲିସ ବିଭାଗରେ ଏକାଧିକ ଗୁରୁତ୍ବପୂର୍ଣ୍ଣ ପଦବୀରେ କାମ କରିବା ସହ ସେ ଆଇଜି (ପୋଲିସ ମହାନିରୀକ୍ଷକ) ରାଙ୍କରେ ମଧ୍ୟ ପହଞ୍ଚିଥିଲେ । ମାତ୍ର 2007 ରେ ତାଙ୍କର କାର୍ଯ୍ୟକାଳ ଶେଷ ହେବା ପୂର୍ବରୁ ସେ 2005 ରେ ଚାକିରିରୁ ସ୍ବେଚ୍ଛାକୃତ ଅବସର ନେଇ ଆକସ୍ମିକ ଭାବେ ରାଧାରାଣୀ ବେଶ ଧାରଣ କରିଥିଲେ । ସେତେବେଳେ ଏହି ଘଟଣା ସାରା ଦେଶରେ ଚର୍ଚ୍ଚା ସୃଷ୍ଟି କରିଥିଲା । ଜଣେ ଭାରତୀୟ ପୋଲିସ ସେବାର ବରିଷ୍ଠ ଅଧିକାରୀ ଏପରି ଅପ୍ରତ୍ୟାଶିତ ଭାବେ ତଥାକଥିତ ରାଧା ଅବତାର ଗ୍ରହଣ କରିବାକୁ ସହଜରେ ଗ୍ରହଣ କରାଯାଇ ପାରିନଥିଲା ।
- ଦେବେନ୍ଦ୍ର କିଶୋର ପଣ୍ଡା ଜଣେ ଓଡ଼ିଆ ପୋଲିସ ଅଧିକାରୀ
- ସେ 1971 ମସିହା ବ୍ୟାଚର ଉତ୍ତର ପ୍ରଦେଶ କ୍ୟାଡର ଭାରତୀୟ ପୋଲିସ ସେବା (IPS) ଅଧିକାରୀ
- ସେ ଆଇଜି (ପୋଲିସ ମହାନିରୀକ୍ଷକ) ରାଙ୍କରେ ମଧ୍ୟ ପହଞ୍ଚିଥିଲେ
- 2007 ରେ ତାଙ୍କର କାର୍ଯ୍ୟକାଳ ଶେଷ ହେବା ପୂର୍ବରୁ 2005 ରେ ଚାକିରିରୁ ସ୍ବେଚ୍ଛାକୃତ ଅବସର ନେଇଥିଲେ
- ଆକସ୍ମିକ ଭାବେ ରାଧାରାଣୀ ବେଶ ଧାରଣ କରିଥିଲେ ଆଇପିଏସ ଡିକେ ପଣ୍ଡା
ବ୍ୟୁରୋ ରିପୋର୍ଟ, ଇଟିଭି ଭାରତ
