सातारा Weather Update In Satara: गेल्या काही दिवसांपासून राज्यात पावसाचा जोर कायम असून साताऱ्या जिल्ह्यात संततधार सुरुच आहे. याच पार्श्वभूमीवर हवामान विभागानं जिल्ह्यात 1 ते 5 ऑगस्ट दरम्यान ऑरेंज आणि रेड अलर्ट जारी केलाय. यामुळे जिह्यातील सर्व पर्यटनस्थळं तात्पुरती बंदी करण्याचा आदेश जिल्हाधिकाऱ्यांनी दिला आहे.
नदीकाठच्या गावांना सतर्कतेचा इशारा : जिल्ह्यात सद्यस्थितीला मोठ्या प्रमाणात अतिवृष्टी होत आहे. जिल्ह्यातील धबधबे ओसंडून वाहत आहेत. यामुळे निसर्गाचा आनंद लुटण्यासाठी मोठ्या प्रमाणात पर्यटक इथं येतात. परंतु कोणत्याही प्रकारची जीवितहानी होवू नये, म्हणून पर्यटनस्थळं बंद ठेवण्यात आली आहेत. कोयना धरण पाणलोट क्षेत्रात सुरू असलेल्या मुसळधार पावसामुळे धरणात पाण्याची आवक प्रचंड वाढली आहे. त्यामुळे शुक्रवारी सकाळी कोयना धरणाचे दरवाजे ९ फुटांवरुन १० फूट करण्यात येणार आहेत. प्रशासनानं नदीकाठच्या गावांना सतर्कतेचा इशारा दिला आहे.
कोयना धरणात ८६ टीएमसी पाणीसाठा : जिल्ह्याच्या पश्चिम भागात सध्या मुसळधार पाऊस कोसळत आहे. परिणामी कोयना धरणात पाण्याची आवक मोठ्या प्रमाणात वाढली आहे. गुरुवारी सायंकाळी ५ वाजता धरणात 86 टीएमसी इतका पाणीसाठा झाला आहे. पाणी पातळी नियंत्रित करण्यासाठी शुक्रवारी कोयना नदी पात्रात विसर्ग वाढवण्यात येणार आहे.
धरणाचे दरवाजे १० फुटानं उघडणार : सातारा जिल्ह्यात शनिवार आणि रविवारी अतिमुसळधार पावसाची (रेड अलर्ट) शक्यता वर्तवण्यात आली आहे. सद्यस्थितीत कोयना धरणाच्या सांडव्यावरुन ४०,००० क्युसेक विसर्ग सुरू आहे. शुक्रवारी २ ऑगस्टच्या सकाळी ९ वाजता सांडव्यावरील विसर्गात वाढ करुन ५०,००० क्युसेक विसर्ग करण्यात येणार आहे. तसेच आवक पाहून विसर्गात वाढ केली जाणार आहे.
पर्यटनस्थळी पोलीस बंदोबस्त ठेवण्याचा आदेश : धरणातून शुक्रवारी विसर्ग वाढवल्यानंतर धरण पायथा विद्युत गृहामधील २१०० क्युसेक विसर्गासह कोयना नदीमधील एकूण विसर्ग ५२,१०० क्युसेक होईल. त्यामुळे कोयना, कृष्णा नदीच्या पाणीपातळीत वाढ होणार असून प्रशासनानं नदीकाठच्या नागरिकांना सतर्कतेचा इशारा दिला आहे. तसेच जिल्ह्यातील सर्व पर्यटनस्थळं तात्पुरती बंद ठेऊन पोलीस बंदोबस्त तैनात करण्याचे आदेश जिल्हाधिकाऱ्यांनी दिले आहेत.
हेही वाचा
