कोल्हापूर ST Bus In Manewadi : एकीकडं देशाचा अमृत महोत्सव साजरा होतोय, तर दुसरीकडं देशातील अनेक गावांमध्ये एसटीची सुविधाही पोहोचलेली नाही. कोल्हापूर जिल्ह्यातील राधानगरीतील मानेवाडी हे त्यापैकीच एक गाव आहे. डोंगरदऱ्यांनी नटलेल्या राधानगरी या दुर्गम भागातून पायपीट करत या गावकऱ्यांचा आतापर्यंतचा प्रवास सुरू होता. सह्याद्री पर्वताच्या कुशीत वसलेल्या या गावात तब्बल 76 वर्षांनी 'लालपरी' अवतरली आणि गावकऱ्यांच्या आनंदाला पारावर उरला नाही. पहिल्यांदाच एसटी गावात आल्यावर गावकऱ्यांनी ढोल-ताशांच्या गजरात एसटीचं स्वागत केलं.
एसटी बससेवा सुरू : कोल्हापूर जिल्ह्याच्या पश्चिमेला असलेल्या राधानगरी तालुक्याची ओळख कोल्हापूरचं पर्यटन हब अशी आहे. विखुरलेल्या वाड्या-वस्त्या, धनगरवाडा, यामुळं दुर्मीळ लोकवस्ती या परिसरात आढळते. या भागातील नागरिकांना एका ठिकाणाहून दुसऱ्या ठिकाणी प्रवास करायचा असेल, तर सह्याद्रीच्या कानाकोपऱ्यातून पायपीट करतच प्रवास करावा लागायचा. मात्र, आता 76 वर्षांनी अत्यंत दुर्गम भागात वसलेल्या मानेवाडी या गावात एसटी बस सुरू झाली आहे.
राधानगरी आगारातून धामोड-म्हासुर्ली मार्गावर धावणारी बस आता मानेवाडी गावात जाणार आहे, यामुळे कोल्हापूर पासून पन्नास किलोमीटर अंतरावर असलेल्या या गावात पहिल्यांदाच लालपरी अवतरल्याने गावकऱ्यांचा आनंद गगनात मावेनासा झाला. सोमवारी सकाळी महाराष्ट्र राज्य परिवहन महामंडळाची एसटी बस इतक्या वर्षांनी गावात आली. यामुळं गावकरी आनंदून गेले, ढोल ताशांच्या गजरात गावात एसटी घेऊन आलेल्या चालक आणि वाहकांचा खास कोल्हापुरी फेटा बांधून सत्कार करण्यात आला. गावातील महिलांनी एकत्र येत लाल परीचं औक्षणही केलं.
गावातील तरुणांचा पुढाकार : मानेवाडी या अवघ्या हजार एक लोकवस्तीच्या गावात जेमतेम हातावर मोजाव्यात इतक्याच मुली उच्च शिक्षण घेत आहेत. उच्च शिक्षणासाठी मुलंही राधानगरी या ठिकाणी जातात. मात्र, प्रवासासाठी एसटी बस उपलब्ध नसल्यानं त्यांना डोंगरातून पायपीट करतच शिक्षण घ्यावं लागत होतं. या गोष्टींचा विचार करून गावातील तरुणांनी एकत्र येत गेल्या सहा महिन्यांपासून राधानगरी आगाराकडं गावात एसटी बस सुरू व्हावी यासाठी पाठपुरावा केल्याचं गावातील तरुण प्रकाश माने यानं सांगितलं. त्याला आता फळ आलं आहे.
हेही वाचा -
