मुंबईत पुन्हा हिट अँड रन! भरधाव कारच्या धडकेत 24 वर्षीय तरुणाचा मृत्यू - Mumbai Hit and Run

Goregaon Hit and Run : मुंबईत पुन्हा हिट अँड रनची भीषण घटना घडली आहे. मुंबईच्या गोरेगाव परिसरात ही घटना घडली असून एका भरधाव कारच्या धडकेत 24 वर्षीय तरुणाचा जागीच मृत्यू झालाय.

मुंबई Goregaon Hit and Run : वरळी आणि पुण्यात हिट अँड रनची घटना ताजी असतानाच मुंबईत पुन्हा एकदा हिट अँड रनची घटना घडली आहे. मुंबईतील गोरेगाव परिसरात एका भरधाव कारनं दुचाकीस्वाराला धडक दिली. या अपघातात दुचाकीस्वाराचा मृत्यू झालाय. दरम्यान, या अपघातानंतर परिसरात एकच खळबळ उडाली आहे.

आरोपी पोलिसांच्या ताब्यात : मुंबईतील पश्चिम उपनगरातील गोरेगाव परिसरात एका भरधाव कारनं दुचाकीस्वाराला धडक दिली. या घटनेनंतर कार चालकाने घटनास्थळावरून पळ काढला. मात्र, वनराई पोलिसांनी सीसीटीव्हीच्या मदतीनं तीन जणांना ताब्यात घेतलं असून, त्यापैकी एकजण अल्पवयीन आहे. वनराई पोलिसांकडून मिळालेल्या माहितीनुसार, आज (29 ऑगस्ट) सकाळी भरधाव वेगात आलेल्या कारनं 24 वर्षीय दुचाकीस्वार तरुणाला धडक दिली. घटनेची माहिती पोलिसांना मिळताच त्यांनी घटनास्थळ गाठून जखमी तरुणाला रुग्णालयात दाखल केलं. मात्र, तेथे डॉक्टरांनी त्याला मृत घोषित केलं. नवीन वैष्णव असं मृत तरुणाचं नाव आहे.

अल्पवयीन आरोपी बालसुधारगृहात : वनराई पोलिसांनी सांगितलं की, सदरील कार पोलिसांनी जप्त केली असून दोन जणांना अटक करण्यात आली आहे. तर अल्पवयीन आरोपीला बालसुधारगृहात पाठवण्यात आलंय. वनराई पोलिसांतर्गत एका दूध विक्रेत्याला स्कॉर्पिओ चालकानं धडक दिल्याचा आरोप करण्यात आला आहे. या अपघातातील मृत नवीन वैष्णव हा राजस्थानचा रहिवासी होता. गुरुवारी पहाटे 4 वाजेच्या सुमारास आरे येथे ही घटना घडली. स्कॉर्पिओमध्ये दोन मुलं आणि दोन मुली असल्याचं सांगण्यात येतंय. दरम्यान, या प्रकरणी वनराई पोलिसांनी गुन्हा दाखल केला असून पुढील तपास सुरू आहे.

हेही वाचा -