गुंड हेमंत दाभेकरचा श्रीकांत शिंदेंसोबतचा फोटो व्हायरल; गुंडांचं राज्य असल्याची संजय राऊतांची टीका

Shrikant Shinde : कुख्यात गुंड हेमंत दाभेकर यानं वर्षा निवासस्थानी खासदार श्रीकांत शिंदे यांची भेट घेतल्यानं खळबळ उडाली आहे. भेटीचा फोटो व्हायरल झाल्यानंतर दाभेकरला वर्षा निवासस्थानी घेऊन जाणारे युवासेना पदाधिकारी अनिकेत जावळकर यांची हकालपट्टी करण्यात आली आहे.

पुणे Shrikant Shinde : मुख्यमंत्री एकनाथ शिंदे यांचे पुत्र आणि खासदार श्रीकांत शिंदे यांचा वाढदिवस काल (4 फेब्रुवारी) मोठ्या उत्साहात साजरा करण्यात आला. यावेळी राज्यभरातील नेते आणि पक्षाच्या कार्यकर्त्यांनी त्यांना शुभेच्छा दिल्या. दरम्यान, कुख्यात गुंड हेमंत दाभेकर यानं मुख्यमंत्र्यांच्या वर्षा निवासस्थानी जाऊन श्रीकांत शिंदे यांना वाढदिवसाच्या शुभेच्छा दिल्या. यामुळे आता खळबळ उडाली आहे.

हेमंत दाभेकर शरद मोहोळचा साथीदार : गुंड हेमंत दाभेकर यानं काल वर्षा निवासस्थानी जाऊन श्रीकांत शिंदे यांची भेट घेतली. या भेटीचे फोटो मोठ्या प्रमाणावर व्हायरल झाले आहेत. हेमंत दाभेकर हा पुण्यात नुकतीच हत्या झालेला कुख्यात गुंड शरद मोहळचा साथीदार आहे. गुंड किशोर मारणे याच्या खून प्रकरणामध्ये शरद मोहळ सोबत हेमंत दाभेकर यालाही जन्मठेपेची शिक्षा सुनावण्यात आली होती. तो सध्या जामीनावर बाहेर आहे. आता त्यानं खासदार श्रीकांत शिंदेंची भेट घेतल्यानं अनेकांच्या भुवया उंचावल्या आहेत.