बीड Minor Girl Rape Case Beed : माजलगावमध्ये धक्कादायक घटना घडली. येथे 14 वर्षीय अल्पवयीन विद्यार्थिनीला लॉजवर नेऊन बलात्कार केल्याचा धक्कादायक प्रकार उघडकीस आला. या प्रकरणी 15 दिवसांपूर्वी गुन्हा दाखल होऊनही अद्याप आरोपी मोकाट आहेत. तसेच आरोपीकडून पीडितेच्या कुटुंबाला केस परत घ्या, अन्यथा ठार मारू अशी धमकीही दिली. त्यामुळे आरोपी मोकाट असल्यानं मुलीचं शिक्षण बंद करण्याची वेळ कुटुंबावर आली. आता पीडितेच्या आईने थेट मुख्यमंत्र्यांकडे न्यायाची मागणी केली. त्यामुळे लाडकी बहीण योजना राबविणारे सरकार आता मुलीला सुरक्षा आणि न्याय देणार का? असा प्रश्न उपस्थित होत आहे.
पीडितेला गाडीवर बसवून लॉजवर नेलं : पोलिसांनी दिलेल्या माहितीनुसार, बीडच्या माजलगाव शहर पोलीस ठाणे हद्दीत 6 जून रोजी नववीत शिकणारी पीडित विद्यार्थिनी रस्त्याने जात होती. त्यावेळी आरोपीने तिली गाडीवर बसवून माजलगाव शहरातील लॉजवर नेले आणि तिच्यावर बलात्कार केला. तसेच याबाबत कुणाला सांगितलं तर जीवे मारेन अशी धमकी दिली. या धमकीमुळे पीडित मुलीने याबाबत कुणालाच काहीच सांगितलं नाही.
पीडितेने आईला सांगितला घडलेला प्रकार : पीडित मुलीने शाळा सुरू झाल्यावर शाळेत जायला नकार दिला. यावेळी आईने कारण विचारले असता तिने घडलेला प्रकार सांगितला. तिने म्हटले की, '4-5 मुलांनी मला गाडीवर बळजबरीने बसवून लॉजवर नेऊन अत्याचार केला. तसेच कुणाला सांगितलं तर जीवे मारण्याची धमकी दिली. त्यामुळे मला शाळेत जायला भीती वाटत होती. माझ्यावर एकाने अत्याचार केला पण लॉजवर साथ देणारे तिघेजण होते. सर्वजण एकाच रूममध्ये होते."
तर पोलीस ठाण्याला घेराव घालू : यानंतर आई मुलीला घेऊन पोलीस ठाण्यात गेली आणि 30 जून रोजी आरोपी विरुद्ध गुन्हा दाखल केला. मात्र, या प्रकरणातील आरोपी अद्याप मोकाट आहेत. तो पीडितेच्या कुटुंबाला तुमच्या मुलीला उचलून नेऊ, अशा धमक्याही देत आहे. यावर बोलताना सामाजिक कार्यकर्ते बाबुराव पोटभरे यांनी हे प्रकरण सामूहिक बलात्काराचे आहे. त्यामुळे इतरांवरही गुन्हा दाखल करावा. आरोपीला अटक केली नाही तर पोलीस स्टेशनला घेराव घालण्याचा इशाराही पोटभरे यांनी दिला.
आरोपीच्या शोधासाठी टीम रवाना : माजलगाव उपविभागीय पोलीस अधिकारी धीरजकुमार बच्छा यांनी सांगितले की, "आरोपीला अटक करण्यासाठी आमच्या टीम पाठवल्या आहेत. कॉल डिटेल्स तपासली जात आहेत. या लॉजवरही कारवाई केली जाईल." दरम्यान, या प्रकरणामुळे शाळकरी मुलींच्या सुरक्षेचा प्रश्न ऐरणीवर आला. आता मुख्यमंत्री या प्रकरणात लक्ष घालणार का? व पीडितेला न्याय देणार का? हे पाहणं औचित्याचं ठरणार आहे.
हेही वाचा :
