पुणे Manorama Khedkar Arrested : वादग्रस्त परिविक्षाधिन आयएएस अधिकारी पूजा खेडकर यांच्या आई मनोरमा खेडकर यांना पुणे ग्रामीण पोलिसांनी अटक केलं आहे. पुणे ग्रामीण पोलिसांनी मनोरमा खेडकर यांना महाड इथून अटक केलं आहे. मनोरमा खेडकर या रायगड किल्ल्याच्या पायथ्याशी असलेल्या पाचाड येथील पार्वती निवास या घरगुती लॉजिंगमध्ये लपून बसल्या होत्या. मात्र पुणे ग्रामीण पोलिसांनी पहाटे 2 वाजता पार्वती निवास इथं छापा घालून त्यांना अटक केली. मनोरमा खेडकर यांनी जमिनीच्या वादातून शेतकऱ्यावर पिस्तूल बाहेर काढलं होतं.
पूजा खेडकर यांच्या मातोश्री मनोरमा खेडकर यांसह अन्य लोकांना पुणे ग्रामीण पोलिसांच्या विशेष पथकानं पाचाड येथील एका घरगुती लॉजिंगमधून ताब्यात घेतलं आहे. आज सकाळी नऊ वाजता महाड तालुका पोलीस ठाण्यामध्ये या संदर्भातील माहिती पुणे ग्रामीण पोलीस पथकाकडून देण्यात आली. - शंकर काळे, उपविभागीय पोलीस अधिकारी महाड
मनोरमा खेडकर यांना तीन दिवसांची पोलीस कोठडी : पोलिसांनी मनोरमा खेडकर यांना महाडमधील हॉटेलमधून अटक केली. स्थानिक पोलीस ठाण्यात नोंद करुन पोलीस त्यांना पुण्याला घेऊन आले. त्यानंतर सर्व प्रक्रिया पूर्ण करून मनोरमा यांची वैद्यकीय तपासणी करण्यात आली. त्यानंतर न्यायालयात पोलिसांनी मनोरमा खेडकर यांची 7 दिवसांची पोलीस कोठडी द्यावी, अशी मागणी केली होती. अखेर मनोरमा खेडकर यांना तीन दिवसांची पोलीस कोठडी दिली आहे.
महाडमधील पाचाडच्या घरगुती लॉजिंगमधून पहाटे केली अटक : मनोरमा खेडकर यांना रायगड किल्ल्याच्या पायथ्याशी असलेल्या पाचाड येथील पार्वती निवास या घरगुती लॉजिंगमधून पहाटे साडेसहाच्या सुमारास पुणे पोलिसांनी अटक केली. बुधवारी रात्री 10 च्या सुमारास मनोरमा खेडकर या पार्वती निवास इथं राहायला आल्या, अशी नोंद लॉजिंगच्या रजिस्ट्ररमध्ये करण्यात आल्याची माहिती सूत्रांनी दिली. त्यानंतर पहाटे 2 च्या सुमारास पुणे ग्रामीण पोलिसांचं पथक पाचाड इथं दाखल झालं. पोलिसांनी सर्व सावधगिरी बाळगत पाचाड इथल्या हिरकणी वाडी इथून पार्वती निवास या घरगुती लॉजिंगमधून मनोरमा खेडकर यांना अटक केली. "पूजा खेडकर यांच्या मातोश्री मनोरमा खेडकर यांसह अन्य लोकांना पुणे ग्रामीण पोलिसांच्या विशेष पथकानं पाचाड येथील एका घरगुती लॉजिंगमधून ताब्यात घेतलं आहे. आज सकाळी नऊ वाजता महाड तालुका पोलीस ठाण्यामध्ये या संदर्भातील माहिती पुणे ग्रामीण पोलीस पथकाकडून देण्यात आली," अशी माहिती महाडचे उपविभागीय पोलीस अधिकारी शंकर काळे यांनी ईटीव्ही भारतशी बोलताना दिली.
मनोरमा खेडकर यांच्यावर गुन्हा : वादग्रस्त आयएएस अधिकारी पूजा खेडकर यांच्या आई मनोरमा खेडकर यांना अखेर अटक करण्यात आलं आहे. पुणे पोलिसांची तीन ते चार पथक त्यांच्या शोधात होते. रायगड जिल्ह्यातील महाड इथं एका फार्म हाऊसमध्ये त्या लपल्याची माहिती पोलिसांना मिळाली. त्यानंतर सापळा रचून त्यांना त्यांना अटक करण्यात आलं. आता पुणे पौड पोलीस त्यांना घेऊन पुण्याकडं निघाले आहेत. त्यांना गुरुवारी दुपारी न्यायालयात हजर करण्यात येणार आहे. शेतकऱ्यांना धमकवल्याच्या प्रकरणात त्यांचे व्हिडिओ व्हायरल झाले. तर पुणे पोलिसांशी देखील त्यांनी हुज्जत घातल्याचं पुढं आलं. गेल्या काही दिवसांपासून मनोरमा खेडकरचा तपास पोलीस करत होते. मनोरमा खेडकर यांच्यावर गुन्हा दाखल होता. त्यानंतर त्या फरार झाल्या होत्या.
वाशिम इथं पोलीस पुन्हा आले चौकशीसाठी : वादग्रस्त परिविक्षाधिन आयएएस अधिकारी पूजा खेडकर यांची वाशिम शहर पोलीस स्टेशनच्या एपीआय श्रीदेवी पाटील यांनी भेट घेतली आहे. "मी माझ्या कामासाठी आले आहे, मी बोलू शकत नाही," अशी प्रतिक्रिया पाटील यांनी दिली. याआधी 2 दिवसांपूर्वी 3 महिला पोलीस अधिकाऱ्यांनी भेट घेतली. पूजा खेडकर यांनी आरोप केल्याच्या पार्श्वभूमीवर आता पुन्हा पोलीस चौकशीसाठी आल्याची माहिती सूत्रांनी दिली आहे.
बाणेर घराच्या अनाधिकृत बांधकामावर हातोडा : पूजा खेडकर यांच्या घराच्या बाहेर अतिक्रमण होतं, ते हटवण्यासाठी महापालिकेनं नोटीस बजावली होती. अखेर ते अतिक्रमण काढण्यासाठी खेडकर कुटुंबीयांनी काही कामगारांना काम देऊन ते अतिक्रमण काढून घेतलं. दिलीप खेडकर यांनी घराच्या बाहेर असलेलं अतिक्रमण हटवण्यासाठी सांगितलं. बाणेर येथील पूजा खेडकर यांच्या बंगल्यासमोरील फुटपाथवरील अतिक्रमण मोठ्या फौजफाट्यासह काढण्यात आलं.
हेही वाचा :
- पूजा खेडकर यांचा आणखी एक कारनामा? खोटा पत्ता देऊन रेशनकार्ड मिळविल्याचा दावा - IAS Pooja Khedkar
- पूजा खेडकर यांच्याविरोधात सर्वप्रथम माहिती देणारे अधिकारी अडचणीत? वाशिम पोलिसात मानसिक छळाची तक्रार - IAS Pooja Khedkar
- IAS पूजा खेडकर यांना दणका; प्रशिक्षण स्थगित करत मसुरीला बोलावलं - IAS Pooja Khedkar Called Mussoorie
