मुंबई Vijay Wadettiwar : विशाळगडावरील अतिक्रमण हटविण्यासाठी काही समाजकंटकांनी घातलेला हैदोस बघात कोल्हापूर जिल्ह्यातील पोलीस अधीक्षकाला निलंबित करावे. तसेच स्थानिक जिल्हाधिकाऱ्यांची तात्काळ बदली करावी. घटनेची उच्चस्तरीय चौकशी करावी, अशा प्रकारची मागणी विरोधी पक्षनेते विजय वडेट्टीवार यांनी पत्रकार परिषदेत केली आहे.
सरकारची प्रायोजित घटना : कोल्हापूर जिल्ह्यातील विशाळगड प्रकरणी आज विरोधी पक्षनेते विजय वडेट्टीवार यांच्या शासकीय निवासस्थानी पत्रकार परिषद पार पडली. यावेळी खासदार वर्षा गायकवाड, माजी मंत्री नसीम खान, काँग्रेसचे प्रवक्ते सचिन सावंत उपस्थित होते. वडेट्टीवार म्हणाले की, पुरोगामी विचारांच्या कोल्हापूर जिल्ह्यात पुरोगामी विचारांचा खासदार निवडून आल्याने जातीयवादी पक्षाच्या पायाखालची वाळू सरकलीय. विधानसभा निवडणूक डोळ्यासमोर ठेवून अशा घटना घडविल्या जात असल्याचा आरोप त्यांनी केला आहे. आंदोलनाच्या नावाखाली विशालगड येथे तोडफोड करणारे शिवप्रेमी असू शकत नाही. त्यामुळे हे हल्लेखोर कोण होते? याचा सरकारने तपास करून मास्टरमाईंड शोधून काढावा.
पोलीस प्रशासनाची बघ्याची भूमिका? : विजय वडेट्टीवार पुढे म्हणाले की, घटना घडत असताना पोलीस प्रशासनाने बघ्याची भूमिका घेतली. त्यामुळे पोलीस अधीक्षकांना निलंबित करून जिल्हाधिकाऱ्यांची बदली करावी. खुलेआम रवी पडवळ व्हिडिओ करून आव्हान देत आहे. त्याच्यावर कारवाई करा, अशी देखील मागणी त्यांनी केली आहे. अतिक्रमणाचा प्रश्न सरकारने सुसंवादातून सोडवला असता तर घटना घडली नसती. या प्रकरणी मुख्यमंत्र्यांना पत्र देखील लिहिले आहेत. तसेच त्यांची भेटीची वेळ देखील मागितली आहे. मतांवर डोळा ठेवून अशा प्रकारचं राजकारण राज्यात केलं जात असल्याचा आरोप देखील त्यांनी केला आहे.
आता ही योजना येणार : राज्य सरकारच्या मुख्यमंत्री माझी लाडकी बहीण आणि लाडका भाऊ योजनेनंतर सरकारने लाडके सासू सासरे, मामा-मामी योजना आणली तरी फरक पडणार नाही. जनतेला अशाच प्रकारे फिरवत राहतील आणि यामुळे महाराष्ट्र यांनी खड्ड्यात घातला आहे. टेंडरबाजी आणि कमिशनखोरी याच्याशी त्यांना काही घेणं-देणं नसल्याचा आरोप वडेट्टीवारांनी केला आहे.
भटकळच्या नावाखाली विषय भटकवण्याचा प्रयत्न : छत्रपती संभाजीराजे यांनी अतिक्रमणाच्या संदर्भात झालेल्या घटनेचा निषेध केला. तसेच दहशतवादी यासीम भटकळने विशाळगड परिसरात वास्तव्य केले होते, यावर सरकार आणि विरोधीपक्ष बोलायला तयार नाही. या प्रश्नावर विजय वडेट्टीवार म्हणाले की, मी बोललो त्यावर बोललो आहे. माहिती घ्या, यापूर्वी झोपले होते का? आता जावईशोध लागलाय का? भटकळच्या नावाखाली विषय भटकत असल्याचा आरोप त्यांनी केला आहे.
हेही वाचा :
