आयएएस पूजा खेडकरांच्या आईची पिस्तूल घेऊन दमदाटी, व्हिडिओ व्हायरल झाल्यावर दिलं स्पष्टीकरण - IAS Pooja Khedkar

IAS Pooja Khedkar : आयएएस अधिकारी पूजा खेडकर यांच्यावर विविध आरोप होत असतानाच त्यांच्या आई मनोरमा यांचा वादग्रस्त व्हिडिओ व्हायरल होत आहे. व्हिडिओमध्ये त्या शेतकऱ्याला धमकी देताना दिसत आहेत.

पुणे IAS Pooja Khedkar : ऑडी गाडीवर लाल दिवा लावून फिरणाऱ्या आयएएस अधिकारी पूजा खेडकर यांच्याबाबत धक्कादायक माहिती समोर येऊ लागली आहे. सुरूवातीला अपंग असलेलं सर्टिफिकेट दाखवून यूपीएससीची परीक्षा उत्तीर्ण त्यानंतर तब्बल सहा वेळा मेडिकल टेस्टला बोलावून देखील गैरहजर राहिल्या. एवढंच नव्हे तर मोठी संपत्ती असूनही त्यांनी आयएएससाठी दिलेलं नॉन क्रिमिलेअर प्रमाणपत्र जोडल्याचा त्यांच्यावर आरोप आहे.

पूजा खेडकर यांचे वडील दिलीप खेडकर यांनी सरकारी नोकरी करत असताना कोट्यवधी रुपयांची संपत्ती कमावली आहे. त्यांनी पुणे जिल्ह्यातील मुळशी तालुक्यात जमीन खरेदी केली. खेडकर यांनी शेजारच्या शेतकऱ्याच्या जमिनीवरदेखील अतिक्रमण करण्याचा प्रयत्न केला. तेव्हा पूजा खेडकर यांच्या आई मनोरमा खेडकर यांनी महिला बाऊन्सर सोबत घेऊन गेल्याचं व्हिडिओमध्ये दिसत आहे. हातात पिस्तूल घेत शेतकऱ्याला धमकवल्याचा त्यांचा व्हिडिओ समोर आला आहे.

सातबाऱ्यावर मी मालक : व्हिडिओमध्ये मनोरमा खेडकर म्हणतात, "जमीन माझ्या नावावर आहे. सातबारा माझ्या नावावर आहे. कोर्टाचे कागद मला आणून दाखवा. मी पण कोर्टात गेलीय. काय व्हायचं ते होऊ दे. गरीब असो श्रीमंत असो कायदा सर्वांना सारखा आहे. मलाही माहिती आहे. सातबाऱ्यावर मी मालक आहे. अरे तुरे बोलायचं नाही," असं म्हणत मनोरमा खेडकर एका शेतकऱ्याबरोबर वाद घालताना दिसत आहेत. या घटनेबाबत या शेतकऱ्याने पोलीस स्टेशनमध्ये तक्रार देण्याचा प्रयत्न केला. अजूनही शेतकऱ्याची तक्रार दाखल करण्यात आलेली नाही. त्यामुळे या खेडकर कुटुंबाला नक्की कोणाचा पाठिंबा आहे? असा प्रश्न उपस्थित केला जात आहे. दरम्यान, मनोरमा खेडकर यांच्याशी संपर्क करण्याचा प्रयत्न केला. मात्र, त्यांच्याशी कोणताही संपर्क न झाल्यानं प्रतिक्रिया मिळू शकली नाही.

पुणे न्यायालयात प्रकरण न्यायप्रविष्ट- खेडकर कुटुंबीयांचे वकील रविंद्र सुतार यांनी व्हायरल व्हिओबाबत स्पष्टीकरण दिलं आहे. त्यांनी म्हटलं की, मुळशी येथील जमीन खेडकर कुटंबानं विकत घेतलेली आहे. ही जमीन कसण्यासाठी गेलेले असताना मनोरमा यांना तेथील लोकांनी मज्जाव केला. याबाबत पौड पोलीस स्टेशनमध्ये तक्रार दिली आहे. हे प्रकरण पुणे न्यायालयात आहे. मनोरमा यांच्याकडं परवाना असलेले पिस्तूल आहे. ते स्वरंक्षणासाठी आहे. व्हायरल झालेला व्हिडिओ हा जून २०२३ मधील आहे."

काय म्हणाले खेडकर कुटुंबाचे वकील : या वादावर खेडकर कुटुंबाचे वकील रवींद्र सुतार म्हणाले, "सध्या जो व्हिडिओ व्हायरल होत आहे. त्याबाबतचं प्रकरण न्यायप्रविष्ठ आहे. साधारणत: मनोरमा खेडकर यांनी ती जागा खरेदी खतानुसार विकत घेतली असून ती जागा ताब्यात आहे. या जागेच्या बाबत कागदपत्र देखील न्यायालयात देण्यात आली आहेत. सध्या जो व्हिडिओ व्हायरल होत आहे तो जून 2023 चा असून एक वर्ष जुना हा व्हिडिओ आहे. या घटनेच्या आधी खेडकर यांच्या ताब्यातील जी जमीन आहे, त्या मिळकतीची पाहणी करण्यासाठी 4 जून रोजी गेले असता तिथल्या काही लोकांनी त्यांची अडवणूक केली आणि तिथं वादावादी झाली. याबाबत रीतसर तक्रार खेडकर यांनी पौड पोलीस स्टेशन इथं दाखल केली आणि याची एफआयआर देखील न्यायालयात देण्यात आली आहे. तसंच जी पिस्तूल आहे, त्याचा परवाना असून सरक्षणासाठी बाहेर काढली होती," असं यावेळी त्यांच्या वकिलांनी म्हटलं आहे.

चौकशीसाठी समितीची स्थापना : पूजा खेडकर प्रकरणी चौकशीसाठी केंद्र सरकारकडून समितीची स्थापना करण्यात आली आहे. तसेच ही समिती दोन आठवड्यात आपला अहवाल सादर करणार आहे. केंद्र सरकारच्या कार्मिक मंत्रायलानं अतिरिक्त सचिव दर्जाच्या वरिष्ठ अधिकाऱ्याच्या अध्यक्षतेखाली एक सदस्यीय समिती स्थापन केली आहे. यात पूजा खेडकर यांची यूपीएससीमध्ये झालेली निवड आणि इतर संबंधित बाबींची समितीकडून सखोल चौकशी केली जाणार आहे.

(Disclaimer- व्हायरल व्हिडिओच्या सत्यतेबाबत ईटीव्ही भारत कोणतीही पुष्टी करत नाही.)

हेही वाचा