कोल्हापूर - ग्रामीण संस्कृतीचा बाज असलेला 'गाभ' मराठी चित्रपट 21 जून रोजी महाराष्ट्रात प्रदर्शित झाला. वेगळं कथानक असल्यामुळं मराठी प्रेक्षकांनी या चित्रपटाला चांगला प्रतिसाद दिला आहे. मात्र, बेळगाव सीमा भागातील लक्ष्मण पाटील या तरुणांन कर्नाटकात मराठी भाषेचं संवर्धन आणि प्रसार व्हावा यासाठी या चित्रपटाचं तिकीट घेऊन आपल्या हॉटेलमध्ये येणाऱ्या ग्राहकांसाठी 20% दरात सवलत देऊन अभिनव उपक्रम राबवला आहे. नव्या पिढीला छत्रपती शिवरायांचा पराक्रमी इतिहास समजावा यासाठी हॉटेलचा लूकही किल्ल्याप्रमाणे करण्यात आला असून मराठी भाषेसाठी धडपडणाऱ्या या तरुणाचं सीमा भागात कौतुक होत आहे.
अनुप जत्राटकर लिखित आणि दिग्दर्शित 'गाभ' हा मराठी चित्रपट नुकसान प्रदर्शित झाला आहे. चित्रपटात गावगाड्याचा आर्थिक कणा असलेल्या दुग्ध व्यवसायाच्या वास्तवावर भाष्य करणारा हा चित्रपट आहे. रेड्यांची कमी होणारी संख्या यामुळे म्हैस गाभण राहण्यासाठी करावी लागणारी वणवण या चित्रपटात दाखवण्यात आली आहे. अस्सल ग्रामीण प्रेम कथाही चित्रपटाच्या माध्यमातून लोकांसमोर मांडण्याचा प्रयत्न सीमा भागातीलच उदयन्मुख लेखक, दिग्दर्शक अनुप जत्राटकर यांनी केला आहे. या चित्रपटाला प्रदर्शित होण्यापूर्वीच अनेक पुरस्कार जाहीर झाले. राज्य शासनाच्या वतीनं कांन्सच्या जागतिक चित्रपट महोत्सवात 'गाभ' सिनेमाचा प्रीमियर पार पडला होता. यामुळं प्रदर्शित होण्यापूर्वीच या चित्रपटाला प्रेक्षकांनी डोक्यावर घेतल्याचं चित्र पाहायला मिळालं होतं. आता सीमा भागात लक्ष्मण पाटील या तरुणांना मराठी भाषा सर्वदूर पोहचावी यासाठी राबवलेला उपक्रमाचं कौतुक होत असून यापूर्वी अमोल कोल्हे यांची भूमिका असलेला गरुडझेप, तानाजी मालुसरे यांच्या जीवनावर आधारित तान्हाजी हा चित्रपटही लक्ष्मण पाटील यांनी मराठी भाषकांसाठी मोफत दाखवला होता. सीमा भागात मराठीची होणारी अवहेलना लहानपणापासून पाहिली आहे. यामुळेच महाराष्ट्र एकीकरण समितीच्या माध्यमातून सीमा भागातील मराठी लढा यापुढेही सुरू ठेवणार असल्याचं लक्ष्मण पाटील यांनी सांगितलं.
सोशल मीडियावर आवाहन, तरुणांच्या हाताला काम
2017 या वर्षापासून सीमा भागातील मराठी तरुणांना एकत्र करत, त्यांच्यासाठी रोजगाराच्या संधी उपलब्ध व्हाव्यात, यासाठी लक्ष्मण पाटील आणि त्यांच्या सहकार्याने निपाणी भागात अनेक रोजगार मिळावे घेतले आहेत. पहिल्याच रोजगार मिळाव्यात सीमा भागातील सुमारे 70 तरुणांना रोजगार मिळाला, तर गतवर्षी निपाणीतील देवचंद महाविद्यालयात राज्य शासनाच्या वतीनं घेण्यात आलेल्या रोजगार मेळाव्यात सीमा भागातील २ हजार तरुणांच्या हाताला काम मिळाल्याचं समाधान असल्याचं एकीकरण समितीचे पदाधिकारी असलेले लक्ष्मण पाटील यांनी सांगितलं.
किल्ल्यांची नावे असलेली भोजनाची दालने
हॉटेल व्यवसायिक असलेल्या लक्ष्मण पाटील यांचं निपाणी जवळील जत्राट गावात हॉटेल येस राजवाडा हॉटेल आहे. या हॉटेलमध्ये सिंधुदुर्ग, विशाळगड, पन्हाळा, सिंहगड,पारगड, प्रतापगड, रायगड, राजगड, तोरणा, शिवनेरी अशी भोजनाच्या दालनांची नावे आहेत. हॉटेलच्या मागच्या बाजूस एखाद्या राजवाड्याचा फील यावा अशा पद्धतीचं स्टेज आहे. हॉटेलमध्ये येणारे खवय्ये छत्रपती शिवरायांचा मावळा असलेल्या लक्ष्मण पाटील यांचं मराठीचं प्रेम पाहून अचंबित होत असल्याचे चित्र सीमा भागात पाहायला मिळत आहे.
हेही वाचा -
