मुंबई Team India Victory Parade : टी-20 विश्वचषकावर आपलं नाव कोरणाऱ्या विश्वविजेत्या भारतीय क्रिकेट संघाचा विजयोत्सव साजरा करण्यासाठी मुंबईतील वानखेडे स्टेडियम, चर्चगेट, मरिन ड्राईव्ह आणि नरिमन पॉईंट परिसरात चाहत्यांची गुरुवारी (4 जुलै) दुपारपासूनच गर्दी उसळली होती. यावेळी अंदाजे तीन लाखांपेक्षा अधिक संख्येनं आलेल्या क्रिकेट चाहत्यांच्या गर्दीला हाताळताना पोलिसांची दमछाक झाल्याचं पाहायला मिळालं. तर सायंकाळी झालेली गर्दी पांगवण्यासाठी पोलिसांना एनसीपीए परिसरात सौम्य लाठीचार्ज देखील करावा लागला. तर मिळालेल्या माहितीनुसार, रोड शो दरम्यान झालेल्या गर्दीत श्वास गुदमरल्यानं आठ ते दहा जण भोवळ आल्यानं त्यांना रुग्णवाहिकेतून रुग्णालयात नेण्यात आलं.
तगडा पोलीस बंदोबस्त : मुंबईचे पोलीस आयुक्त विवेक फणसाळकर, विशेष पोलीस आयुक्त देवेन भारती, कायदा आणि सुव्यवस्थेचे सह आयुक्त सत्यनारायण चौधरी यांच्या नेतृत्वाखाली अप्पर पोलीस आयुक्त, पोलीस उपायुक्त, सहाय्यक आयुक्त, वरिष्ठ पोलीस निरीक्षक, 300 पोलीस अधिकारी आणि 1 हजार पोलीस कर्मचारी तैनात होते. मुंबई पोलीस दलाच्या कायदा आणि सुव्यवस्था विभागाचे सहपोलीस आयुक्त सत्यनारायण चौधरी यांच्या माहितीनुसार विमानतळापासून ते मरीन ड्राईव्हपर्यंत सुमारे 5 हजार पोलिसांचा फौजफाटा तैनात करण्यात आला होता. विजयोत्सवाचा साक्षीदार बनण्यासाठी लाखो चाहत्यांनी भारतीय क्रिकेट संघाची जर्सी घालून नरिमन पॉईंट ते मरीन लाईन्स परिसरात गर्दी केली होती. यात सुमारे चार लाखांहून अधिक क्रिकेटप्रेमी येथे गोळा झाल्याचा अंदाज वर्तविण्यात आलाय. यावेळी झालेली गर्दी नियंत्रणात आणण्यासाठी पोलिसांना सौम्य लाठीचार्ज करावा लागला. मरिन ड्राइव्ह येथे उसळणारा जनसागर पाहता मुंबई पोलिसांनी सोशल मीडियाद्वारे दुपारीच नागरिकांना मरिन ड्राईव्ह परिसरात न येण्याचे आवाहन केले. विशेष पोलीस आयुक्त देवेन भारती हेदेखील मरिन ड्राईव्ह परिसरात हजर होते.
It was one of its kind crowd and traffic management today with mobs milling n spilling over everywhere, waiting with bated breath to salute the Champions!!.
— पोलीस आयुक्त, बृहन्मुंबई - CP Mumbai Police (@CPMumbaiPolice) July 4, 2024
But it was @MumbaiPolice that batted through the innings and won the day for us and the city👍
Well done @DevenBhartiIPS,…