विशाखापट्टणम IND vs ENG 2nd Test : भारत आणि इंग्लंड यांच्यातील दुसरा कसोटी सामना विशाखापट्टणम इथं खेळवला जातोय. पहिल्या दिवशी भारतीय कर्णधार रोहित शर्मानं नाणेफेक जिंकून फलंदाजीचा निर्णय घेतला. पहिल्या दिवसाचा खेळ संपेपर्यंत भारतीय संघाची धावसंख्या 6 बाद 336 धावा आहे. विशाखापट्टणम कसोटीचा पहिला दिवस भारतीय संघाचा सलामीवीर यशस्वी जैस्वालच्या नावावर राहिला. यशस्वी जैस्वाल 257 चेंडूत 179 धावा करुन नाबाद परतला. त्यानं आपल्या खेळीत 17 चौकार आणि 5 षटकार मारले.
पहिला दिवस यशस्वी जैस्वालच्या नावावर : नाणेफेक जिंकून प्रथम फलंदाजीला आलेल्या भारतीय संघाची सुरुवात चांगली झाली नाही. भारतीय फलंदाज ठराविक अंतरानं बाद होत राहिले. पण यशस्वी जैस्वाल यानं एक बाजू सांभाळत फलंदाजी केली. भारतीय संघाला पहिला धक्का 40 धावांवर बसला. कर्णधार रोहित शर्मा अवघ्या 14 धावा करुन बाद झाला. यानंतर शुभमन गिल 34 धावा करुन जेम्स अँडरसनचा बळी ठरला. तर श्रेयस अय्यरनं 27 धावा केल्या. श्रेयस अय्यरला टॉम हार्टलीनं बाद केलं. तर आपल्या पहिल्याच सामन्यात रजत पाटीदार 32 धावा करुन रिहान अहमदच्या गोलंदाजीवर बाद झाला.
भारताचे फलंदाज ठराविक अंतरानं बाद : भारतीय फलंदाजांनी सकाळी चांगली सुरुवात केली होती. परंतु, भारतीय संघाचे फलंदाजांना चांगल्या सुरुवातीचं मोठ्या धावसंख्येमध्ये रुपांतर करता आलं नाही. अष्टपैलू अक्षर पटेलही 27 धावा करुन बाद धाला. तर यष्टीरक्षक फलंदाज के एस भरतही 17 धावा करुन रिहान अहमदच्या चेंडूवर बाद झाला. इंग्लंडकडून शोएब बशीर आणि रिहान अहमद यांना प्रत्येकी 2 बळी मिळाले. याशिवाय जेम्स अँडरसन आणि टॉम हार्टली यांनी प्रत्येकी 1 बळी घेतला. मात्र, पहिल्या दिवसाचा खेळ संपला तेव्हा यशस्वी जैस्वाल आणि रवी अश्विन नाबाद परतले. भारतीय संघ दुसऱ्या दिवशी 6 बाद 336 धावांवर खेळण्यास सुरुवात करेल. तसंच यशस्वी जैस्वाल द्विशतक करणार का हे पाहणं औत्सुक्याचं ठरेल.
रजत पाटीदारचं पदार्पण : हैदराबादमधील पहिल्या कसोटी सामन्यात फ्लॉप ठरलेल्या मोहम्मद सिराजला प्लेइंग 11 मधून बाहेरचा रस्ता दाखवण्यात आलाय. त्याच्या जागी मुकेश कुमारला टीममध्ये संधी मिळाली. पहिला सामना खेळलेले केएल राहुल आणि रवींद्र जडेजा दुखापतीमुळे सामन्यातून बाहेर पडले आहेत. त्यांच्या जागी विकेटकीपर रजत पाटीदारनं कसोटी पदार्पण केलं, तर कुलदीप यादवचं संघात पुनरागमन झालं आहे.
इंग्लंडकडून शोएब बशीरचं पदार्पण : केएल राहुल आणि रवींद्र जडेजा यांच्या दुखापतीनंतर, भारताच्या टीममध्ये सौरभ कुमार, सरफराज खान आणि वॉशिंग्टन सुंदर यांचा समावेश करण्यात आला होता. तर विराट कोहलीनं पहिल्या दोन कसोटी सामन्यातून माघार घेतल्यानंतर, त्याच्या जागी रजत पाटीदारचा समावेश करण्यात आला होता. या सामन्यात इंग्लंडकडून शोएब बशीरनं कसोटी पदार्पण केलं. शोएब हा पाकिस्तानी वंशाचा गोलंदाज आहे. व्हिसा संबंधित अडचणींमुळे तो हैदराबादमधील पहिला कसोटी सामना खेळू शकला नव्हता.
सरफराजला अद्याप संधी नाही : देशांतर्गत क्रिकेटमध्ये चांगला रेकॉर्ड असलेला सरफराज खान आजच्या सामन्यात डेब्यू करू शकतो, अशी शक्यता वर्तवली जात होती. मात्र त्याची प्रतीक्षा आता वाढली आहे. सरफराजनं आतापर्यंत 45 प्रथम श्रेणी सामन्यांच्या 66 डावांमध्ये 69.85 च्या सरासरीनं 3912 धावा केल्या आहेत. तर त्यानं 37 लिस्ट ए सामन्यांमध्ये 34.94 च्या सरासरीनं 629 धावा केल्या आहेत.
भारताची प्लेइंग 11 : रोहित शर्मा (कर्णधार), यशस्वी जयस्वाल, शुभमन गिल, रजत पाटीदार, श्रेयस अय्यर, केएस भरत (यष्टीरक्षक), रविचंद्रन अश्विन, अक्षर पटेल, कुलदीप यादव, मुकेश कुमार, जसप्रीत बुमराह.
इंग्लंडची प्लेइंग 11 : जॅक क्रोली, बेन डकेट, ओली पोप, जो रूट, जॉनी बेअरस्टो, बेन स्टोक्स (कर्णधार), बेन फॉक्स, रेहान अहमद, टॉम हार्टले, शोएब बशीर, जेम्स अँडरसन.
हे वाचलंत का :
