हैदराबाद Jyeshtha Gauri Avahana 2024 : राज्यात शनिवारी घरोघरी गणपती बाप्पा विराजमान झाले आहेत. आता महिलांची लगबग सुरु झाली आहे ती ज्येष्ठा गौरी आगमनाची. ज्येष्ठा गौरींना विदर्भात 'महालक्ष्म्या' म्हणतात. ‘लक्ष्मी’ या शब्दाआधी ‘महा’ हे विशेषण लावून ‘महालक्ष्मी’ हा शब्द तयार झाला. मराठवाड्यात ‘लक्ष्म्या’, तर कोकणात ‘गौरी’ म्हटलं जातं. तर अशा ज्येष्ठा आणि कनिष्ठा गौरीची कथा काय आहे ते जाणून घेणार आहोत.
ज्येष्ठा गौरी आवाहन वेळ (Jyeshtha Gauri Avahana) : मंगळवारी, (10 सप्टेंबर) रोजी गौरीचं आवाहन आहे. तर बुधवारी, 11 सप्टेंबर रोजी गौरी पूजन केलं जाणार असून गुरुवारी, 12 सप्टेंबर रोजी गौरी विसर्जन होणार आहे.
गौरी आवाहन शुभ मुहूर्त : 10 सप्टेंबर रोजी सूर्योदयापासून ते संध्याकाळी 6 वाजून 27 मिनिटांपर्यंत ज्येष्ठा गौरी आवाहनाचा शुभ मुहूर्त असणार आहे. तसेच या दिवशी दुपारी 3 ते दुपारी 4 वाजून 30 मिनिटांपर्यंत राहू काळ असणार आहे.
काय आहे आख्यायिका : 'समुद्र मंथन' या लेखात सांगितल्याप्रमाणं, मंथनातून 'श्री महालक्ष्मी' आणि त्यांची बहीण 'श्री अलक्ष्मी'चा जन्म झाला. श्री महालक्ष्मी म्हणजे 'येणारं धन' आणि श्री अलक्ष्मी म्हणजे 'येणारं धन जे खर्च होतं'. याप्रमाणं लक्ष्मीची थोरली बहीण 'अलक्ष्मी' ही देखील पूजनीय आहे. 'समुद्र मंथना'तून अनेक रत्नांबरोबर लक्ष्मी हे रत्न निघालं. साक्षात श्री विष्णूनं श्री लक्ष्मीचा पत्नी म्हणून स्वीकार करण्याचा निश्चय केला. त्यावेळी आपल्या ज्येष्ठा भगिनीचा विवाह (अलक्ष्मी) झाल्याशिवाय आपण विवाह करणार नाही, असं श्री लक्ष्मीनं सांगितल्यावर विष्णूने तिचा विवाह एका तपस्वीशी लावून दिला.
श्री विष्णूनं दिले तीन 'वर' : श्री अलक्ष्मीच्या उपद्रवी अवगुणामुळं तो तपस्वी वनात निघून गेला. तेव्हा श्री अलक्ष्मी अश्र्वत्थ (पिंपळाचे झाड) वृक्षाखाली रडत बसली. तिथून श्री विष्णू जात असता त्यांनी तिला रडताना पाहिलं. तिची हकिकत ऐकून त्यांनी तिचं सांत्वन केलं आणि तिला तीन 'वर' (वरदान) दिले. पहिला वर, जिथे भक्तीचा अभाव, आळस, व्यसनाधीनता, नास्तिकता, अधर्म असेल तिथे तिने वास्तव्य करावे. दुसरा वर, शनिवारी अश्र्वत्थास प्रदक्षिणा घालणाऱ्यास तिने पिडा देऊ नये. तिसरा वर, दरवर्षी भाद्रपद महिन्यात ज्येष्ठा नक्षत्रावर तिची पूजा केली जाईल. तेव्हापासून ज्येष्ठा लक्ष्मीपूजनाच्या दिवशी 'लक्ष्मी' व 'अलक्ष्मी' या दोघी बहिणींची पूजा केली जाते, अशी आख्यायिका आहे.
टीप - सदरील लेख प्राप्त माहितीवर आधारित आहे. या लेखातील माहितीशी 'ईटीव्ही भारत' सहमत असेल असं नाही.
हेही वाचा -
लाडक्या बाप्पाचा आगमन सोहळा; 'अशी' करा गणपतीची पूजा - Ganesh Chaturthi 2024 Puja Vidhi
गणपती बाप्पाच्या कृपेनं कसा जाईल सप्टेंबरचा आठवडा? वाचा साप्ताहिक राशीभविष्य - Weekly Horoscope
