चंदीगड महापौर निवडणूक : सर्वोच्च न्यायालयातील सुनावणीपूर्वीच मोठा उलटफेर; भाजपाच्या महापौरांचा राजीनामा तर आपचे तीन नगरसेवक भाजपात

Chandigarh Mayor Election : चंदीगड महापौर निवडणुकीसंदर्भात आज सर्वोच्च न्यायालयात सुनावणी होण्याआधीच चंदीगडमध्ये आम आदमी पक्षाला मोठा झटका बसलाय. आपचे तीन नगरसेवक भाजपामध्ये दाखल झाले आहेत. तसंच चंदीगडच्या भाजपाच्या महापौरांनी आपल्या पदाचा राजीनामा दिलाय. अशा परिस्थितीत चंदीगड महापौर निवडणुकीचा मार्ग मोकळा झालाय.

चंदीगड Chandigarh Mayor Election : चंदीगड महापौर निवडणुकीत भारतीय जनता पक्षावर हेराफेरीचा आरोप करत आम आदमी पक्ष आणि काँग्रेसनं सर्वोच्च न्यायालयात धाव घेतलीय. भाजपानं फसवणूक करुन निवडणूक जिंकल्याचा आरोप दोन्ही पक्षांनी केला होता. या प्रकरणावर आज पुन्हा सुनावणी होणार आहे. मात्र सुनावणीपूर्वी मोठा राजकीय उलटफेर झालाय. चंदीगडचे नवनियुक्त महापौर मनोज सोनकर यांनी आपल्या पदाचा राजीनामा दिलाय. तसंच 'आप'च्या तीन नगरसेवकांनी भाजपात प्रवेश केलाय. यामुळं चंदीगड महापौर निवडणुकीचा संपूर्ण खेळच बदललाय. (Chandigarh Mayor Election)

चंदीगड महापालिकेची स्थिती काय : आपच्या तीन नगरसेवकांनी भाजपात प्रवेश केल्यानं भाजपाच्या नगरसेवकांची संख्या आता 17 झालीय. तर त्यांच्याकडं 1 खासदार (चंदीगडचे भाजपा खासदार किरण खेर) यांचंही मत आहे. याशिवाय नुकत्याच झालेल्या महापौर निवडणुकीत शिरोमणी अकाली दलाच्या एकमेव नगरसेवकानंही भाजपाला पाठिंबा दिला होता. म्हणजे भाजपाकडे आता एकूण 19 मतं आहेत. नगरसेवकांच्या संख्येच्या बाबतीत भाजपा सर्वात मोठा पक्ष ठरलाय. तीन नगरसेवकांच्या पक्षांतरानंतर आम आदमी पार्टी आणि काँग्रेसच्या मतांची संख्या आता 20 वरुन 17 वर आलीय. यात काँग्रेसच्या 7 आणि आपच्या 10 नगरसेवकांचा समावेश आहे. चंदिगड महापालिकेत एकूण 35 नगरसेवक आहेत, तर एका खासदाराचं मतही यात पकडलं जातं. यामुळं एकूण मतांची संख्या 36 आहे. यामुळं बहुमताला 19 मतं आवश्यक आहेत. तर भाजपाकडं सध्या 20 मतं आहेत.

सुप्रीम कोर्टानं रिटर्निंग ऑफिसरला दिली होती फटकार : 30 जानेवारीला चंदीगडच्या महापौरपदाची निवडणूक झाली होती. यात भाजपानं हेराफेरी केल्याचा आरोप करत काँग्रेस आणि आपच्या याचिकेवर सुनावणी करताना सर्वोच्च न्यायालयानं संपूर्ण निवडणूक प्रक्रियेला स्थगिती दिली होती. तसंच मतपत्रिका सील करण्याचेही निर्देश दिले होते. मुख्य न्यायमूर्ती डीवाय चंद्रचूड यांनी महापौर निवडणुकीचे रिटर्निंग अधिकारी असलेले अनिल मसिह यांना फटकारत 'सीसीटीव्ही फुटेजवरुन त्यांनी मतपत्रिका खराब केल्या स्पष्ट होतंय. त्यांच्यावर कारवाई झाली पाहिजे. ही लोकशाहीची थट्टा आहे. लोकशाहीची हत्या होत असल्याचं म्हटलं होतं. तसंच न्यायालयानं अनिल मसिहला 19 फेब्रुवारीला सुनावणीला हजर राहण्याचे निर्देश दिले होते.

भाजपाकडे पूर्ण बहुमत : आपच्या तीन नगरसेवकांनी भाजपात प्रवेश केल्यानंतर चंदिगड भाजपाचे माजी प्रदेशाध्यक्ष अरुण सूद म्हणाले, "भाजपाकडे पूर्ण बहुमत आहे. अशा स्थितीत चंदीगडमध्ये महापौरपद भाजपाकडेच राहणार आहे. जनकल्याणाच्या धोरणांमुळं चंदीगडचा भाजपाचा ताफा वाढतच जाईल."

हेही वाचा :