हैदराबाद US focus on Tibet : अमेरिकन संसदेच्या परराष्ट्र व्यवहार समितीचे अध्यक्ष रिपब्लिकन खासदार मायकल मॅकॉल यांच्या नेतृत्वाखाली धर्मशाला इथं दलाई लामा यांची भेट घेण्यासाठी यूएस काँग्रेस (संसद) च्या सात सदस्यीय शिष्टमंडळानं अलीकडेच भारताला भेट दिली. काँग्रेसच्या माजी सभापती नॅन्सी पेलोसी यांचाही या सदस्यांमध्ये समावेश होता. 19 जून रोजी, दलाई लामा यांना भेटण्यापूर्वी यूएस शिष्टमंडळानं तिबेटमधील निर्वासित सरकारच्या सदस्यांची भेट घेतली. 12 जून रोजी, तिबेट विवाद निराकरण प्रोत्साहन कायदा, ज्याला तिबेट निराकरण कायदा देखील म्हणतात, यूएस संसदेच्या दोन्ही सभागृहांनी मंजूर केला. या कायद्याबाबत चीनची नाराजीही समोर आली आहे. ज्यामध्ये चीनच्या बेकायदेशीर कब्जाविरुद्धच्या लढाईत अमेरिका तिबेटच्या लोकांच्या पाठीशी उभी असल्याचं स्पष्टपणे सांगण्यात आलं आहे.
रिझॉल्व्ह तिबेट कायदा तिबेटी लोकांची सामाजिक-सांस्कृतिक ओळख जपण्याचा प्रयत्न करतो. विशेषत: त्यांची 'वेगळी ऐतिहासिक, सांस्कृतिक, धार्मिक आणि भाषिक ओळख' याचा समावेश आहे. तिबेटबद्दलच्या चिनी प्रचाराचा मुकाबला करण्यासाठी या निधीचा वापर करण्यास देखील अनुमती देतं. अमेरिकन खासदारांनी दलाई लामा यांची भेट घेतल्यावर चीनची प्रतिक्रिया अतिशय तीक्ष्ण होती. 20 जून रोजी, चीनी सरकारी मुखपत्र ग्लोबल टाइम्सनं संपादकीयमध्ये पेलोसीवर शिझांग (तिबेट) बद्दल बेजबाबदार टिप्पणी केल्याचा आरोप केला. संपादकीयमध्ये रिझॉल्व्ह तिबेट कायद्याचं वर्णन एक कचरा पेपर आणि संपूर्ण आत्म-मनोरंजनाची चाल असं केलं होतं. याशिवाय दलाई लामांना 'अलिप्ततावादी' म्हणत वृत्तपत्रानं लिहिलं की, दलाई कार्ड अधिक राजकीय भांडवल जिंकू शकतं आणि चीनसाठी अडथळे निर्माण करु शकतं, असं अमेरिकन राजकारण्यांना वाटतं, खरं तर हे वाईट कार्ड आहे. इतकच नव्हे दलाई लामा हे पूर्णपणे धार्मिक व्यक्ती नसल्याचा आरोपही चीननं केला आहे.
1950 मध्ये तिबेट ताब्यात घेतल्यानंतर, कम्युनिस्ट चीननं या प्रदेशाच्या सिनिकायझेशनची प्रक्रिया सुरु केली. चीननं तिबेटी ओळख हान ओळखीमध्ये बळजबरीनं विलीन करण्यास सुरुवात केली आणि अधिकाधिक हान लोकांना या प्रदेशात स्थायिक करुन प्रदेशाची लोकसंख्या बदलली. विश्वासानं असं मानलं जातं की, लाखो तिबेटी मुलांना लहान वयातच त्यांच्या पालकांपासून वेगळं केलं गेलं आणि कम्युनिस्ट विचारधारा रुजवण्यासाठी त्यांना बोर्डिंग स्कूलमध्ये पाठवलं गेलं. त्यांना मंदारिन, साम्यवाद शिकवला गेला आणि पारंपारिक तिबेटी संस्कृतीपासून दूर ठेवलं गेलं. याचं उदाहरण म्हणजे सहा वर्षीय गधुन घोकी न्यामा, ज्यांना दलाई लामा यांनी 1995 मध्ये 11वे पंचेन लामा म्हणून मान्यता दिली होती. (तिबेटी परंपरेत, प्रत्येक दलाई लामा पुढील पंचेन लामांना ओळखतात, जे दलाई लामांनंतरचे दुसरे सर्वोच्च आध्यात्मिक व्यक्ती आहेत.) या मान्यतेच्या दोन दिवसांत चिनी सैन्यानं मुलाचं अपहरण केले आणि आजपर्यंत तो सापडलेला नाही. चीनने ताबडतोब त्सिएन केन नोरबू यांची 11वे पंचेन लामा म्हणून नियुक्ती केली. ज्यांना दलाई लामा यांनी मान्यता दिली नाही. सध्याचे पंचेन लामा चीनवर अवलंबून आहेत.
चीनला तिबेटच्या खनिजांमध्ये रस आहे, कारण हे पठार कोळसा, तांबे, क्रोमियम, लिथियम, जस्त, शिसे आणि बोरॉनच्या अफाट साठ्यांवर वसलेलं आहे. जलविद्युत आणि खनिज पाण्याचाही हा एक प्रमुख स्रोत आहे. यामुळंच चीन या भागात वेगानं पायाभूत सुविधा विकसित करत आहे. तथापि, अंदाधुंद खाणकाम आणि औद्योगिकीकरणामुळं स्थानिक लोकसंख्येला गंभीर पर्यावरणीय धोका निर्माण झाला आहे. स्थानिक लोक या विरोधात सातत्यानं आंदोलनं करत आहेत, मात्र त्यातून काही साध्य होत नाही. तिबेटच्या विपुल जलस्रोतांच्या माध्यमातून नदी व्यवस्था नियंत्रित करुन चीनला आपल्या शेजाऱ्यांना धमकावायचं आहे.
अमेरिकेला तिबेटमधील स्वारस्य नवीन नाही, परंतु काही वेळा त्यांचं लक्ष कमी झालं आहे. 1950 ते 1971 पर्यंत अमेरिकेचं धोरण साम्यवादी चीनला प्रत्येक प्रकारे त्रास देण्याचं होतं आणि या प्रयत्नात तिबेटचा मुद्दा प्रभावी शस्त्र ठरला. मात्र, सत्तरच्या दशकात दोन्ही देशांमधील मैत्री वाढली आणि चीनच्या आधुनिकीकरणामुळं अमेरिकेसाठी व्यापाराच्या नव्या संधी खुल्या झाल्या. त्यामुळं तिबेटचा प्रश्न सुमारे तीस वर्षे मागे ढकलला गेला. पण 21 व्या शतकात अमेरिकेनं 25 वर्षांपेक्षा कमी कालावधीत तिबेटवर तीन ठराव पारित केले.
पहिला प्रस्ताव तिबेट धोरण कायदा, 2002, चीन सरकारकडून तिबेटी लोकांसोबत होणाऱ्या गैरवर्तनाला संबोधित करतो. परंतु, तिबेट हा चीनमधील एक स्वायत्त प्रदेश आहे. रिझॉल्व्ह तिबेट कायदा, जो नुकताच अमेरिकन संसदेच्या दोन्ही सभागृहात मंजूर झाला आहे. परंतु अद्याप राष्ट्रपतींच्या मंजुरीच्या प्रतीक्षेत आहे. यामध्ये आणखी वास्तव आहे. हे तिबेटी इतिहास, तिबेटी लोक आणि दलाई लामा यांच्या संस्थेसह तिबेटी संस्थांबद्दलच्या चिनी प्रचाराचा प्रतिकार करण्यासाठी निधी वापरण्याची परवानगी देते.
भारत भेटीवर आलेल्या अमेरिकन संसद सदस्यांच्या शिष्टमंडळानं पंतप्रधान नरेंद्र मोदी यांची भेट घेऊन द्विपक्षीय संबंधांचं महत्त्व अधोरेखित केलं. जोपर्यंत भारताचा संबंध आहे, आम्ही 1950 पासून तिबेटला चीनचा भाग मानत आलो आहोत. परंतु, या प्रदेशासाठी अधिक स्वायत्ततेचे समर्थन केलं आहे. दुसरीकडे, चीननं नेहमीच अरुणाचल प्रदेश हा आपला प्रदेश मानला आहे, इतका की तो नेहमीच या प्रदेशात भारतीय नेतृत्वाच्या कोणत्याही भेटीला विरोध करतो आणि राज्यातील रहिवाशांच्या पासपोर्टवर चीनी व्हिसा लावण्यासही नकार देतो. सध्याच्या परिस्थितीत चीन दक्षिण चीन समुद्राच्या वादात अडकला आहे. युक्रेन आणि इस्रायलवर पाश्चिमात्य देशांसोबतचा तणाव आहे, त्या परिस्थितीत ते तिबेटमध्ये कोणतीही कठोर पावले उचलणार नाहीत. परंतु ते वेळोवेळी हा मुद्दा जिवंत ठेवतील आणि अमेरिका देखील असंच करेल.
हेही वाचा :
