अवास्तव रीतीरिवाज, रूढी, परंपरांविरुद्ध लढणाऱ्या कुटुंबाची गोष्ट, 'परंपरा'! - Parampara

Parampara trailer launch : ‘ऋण काढून सण साजरे करू नयेत’ असा सल्ला अनेक वडिलधारी मंडळी देतात. परंतु सामाजिक प्रतिष्ठा जपण्याच्या नावाखाली ही प्रथा काही थांबत नाही. आपल्याकडे अशा अनेक अनिष्ठ प्रथा आणि परंपरा अजूनही सुरू आहेत. याच विषयावर भाष्य करणारा 'परंपरा' हा चित्रपट प्रदर्शनाच्या मार्गावर असून याचा ट्रेलर नुकताच लॉन्च करण्यात आला आहे.

मुंबई - Parampara trailer launch : भारताची संस्कृती विविध परंपरांनी भरलेली आहे. त्यामुळे समाजात रीतीरिवाज, रूढी, परंपरा यांना अनन्यसाधारण महत्व आहे. बदलत्या समाजात अनेक रूढी आणि परंपरा माणसांच्या प्रगतीत खोडा टाकत असल्याचे नवीन पिढीला वाटतं. परंतु अनेकजण विरोध असूनही काही परंपरा पाळत राहतात. अशाच एका सामाजिक विषयावर बेतलेले कथानक 'परंपरा' या आगामी मराठी चित्रपटातून पाहायला मिळणार आहे. यात समाजाने जबरदस्तीने लादलेल्या अनिष्ठ परंपरेचा एका कुटुंबावर काय आणि कसा परिणाम होतो हे यात दाखवण्यात आलंय. नुकतेच या चित्रपटाच्या ट्रेलरचं लॉन्चिंग करण्यात आलं. या चित्रपटात उत्तम अभिनय, श्रवणीय संगीत, आशयघन कथानक बघायला मिळेल अशी ग्वाही निर्माते देताहेत.

• " class="align-text-top noRightClick twitterSection" data="">

'परंपरा' या चित्रपटाची निर्मिती हरीश कुमार आणि अँड्र्यू रिबेलो यांच्या स्टार गेट मूव्हीज या निर्मिती संस्थेअंतर्गत करण्यात आली असून फैजल पोपरे हे सहनिर्माते आहेत. दिग्दर्शन प्रणय निशाकांत तेलंग यांनी केलं असून त्यांनी 'परंपरा' मधून आयुष्य आणि परंपरा यातील संघर्ष रुपेरी पडद्यावर नेमक्या रीतीनं मांडला आहे. प्रदर्शनाआधी या चित्रपटानं अनेक आंतरराष्ट्रीय महोत्सवात बाजी मारलेली आहे. प्रतिकूल परिस्थितीतही सामाजिक परंपरांचे जतन करणाऱ्या कुटुंबाची गोष्ट यातून समोर येईल. ग्रामीण भागातील शेतकरी कुटुंबाचं जगणं, सामाजिक ताण याचं दर्शनही या चित्रपटातून घडेल.

परंपरा पोस्टर

या चित्रपटात मिलिंद शिंदे आणि वीणा जामकर यांच्या अभिनयाची जादू आणि जुगलबंदी प्रेक्षकांना अनुभवता येणार आहे. त्यांच्या बरोबरच आहेत प्रकाश धोत्रे, अरुण कदम, नम्रता पावसकर, किशोर रावराणे, जयराज नायर, रोहित चव्हाण, प्रशांत नेमण, भूषण घाडी, मास्टर मच्छिंद्र, दिवंगत अभिनेते जनार्दन परब असे कसलेले नामवंत कलाकार. प्रणय निशाकांत तेलंग आणि संजय सावंत यांनी पटकथालेखन केलं असून सिनेमॅटोग्राफी केली आहे निशा तेलंग यांनी. गीते मंगेश कांगणे यांनी लिहिली असून आनंद मेनन यांनी संगीताची बाजू सांभाळली आहे. संकलन केलं आहे श्रीकांत तेलंग यांनी तर पार्श्वसंगीत दिले आहे विजय गवंडे यांनी. 'परंपरा' हा चित्रपट येत्या २६ एप्रिल रोजी प्रेक्षकांच्या भेटीला येत आहे.

हेही वाचा -