मुंबई - 'पुष्पा 2 द रुल' चित्रपट बॉक्स ऑफिसवर चौफेर घोडदौड करतानाच्या बातम्या सर्वच माध्यमातून झळकल्या आहेत. अवघ्या दोन दिवसात सिनेमानं जगभरात तब्बल 400 कोटींचा गल्ला जमा केला आहे. पहिल्या दिवशी सर्वाधिक कमाई करणारा 'पुष्पा 2' हा पहिला भारतीय चित्रपट बनलाय. हिंदी भाषेतही या चित्रपटाला मोठं यश मिळालं आहे. सर्वाधिक कमाईचे आकडे तेलुगू प्रांत असलेल्या तेलंगणा आणि आंध्रातून असले तरी तमिळ, कन्नड आणि मल्याळम भाषेतील या चित्रपटाच्या व्हर्जनला उत्तम यश मिळत आहे. या चित्रपटाच्या यशात जितका वाटा दिग्दर्शक आणि कलाकारांचा आहे तितकाच डब करण्यासाठी आवाज देणाऱ्या कलाकारांचाही आहे. हिंदीतील पुष्पाचे दमदार डायलॉग बॉलिवूडचा मराठमोळा स्टार श्रेयस तळपदे याच्या आजावाजात आहेत.
श्रेयस तळपदेनं तोंडात कापूस दाबून पकडला अल्लू अर्जूनच्या आवाजाचा टोन
श्रेयस तळपदेनं एका मुलाखतीत सांगितलं होतं की, तो अल्लू अर्जुनला अजून भेटलेला नाही. गोलमाल सारख्या हिट फ्रँचायझींमध्ये काम केलेला अभिनेता श्रेयस तळपदे यानं 'पुष्पा 2' मध्ये डब केलेल्या अल्लू अर्जुनला हिंदीत आवाज देण्यासाठी खूप मेहनत घेतली आहे. श्रेयस तळपदेनं डबिंग दरम्यान 2 तासात 14 सत्रे केली आणि अल्लू अर्जुनचा आवाज तोंडात कापूस दाबून पकडला. अल्लू अर्जुनला जेव्हा पहिल्यांदा 'पुष्पा द राइज'बद्दल माहिती मिळाली तेव्हा त्यानं श्रेयसच्या टॅलेंटची खूप प्रशंसा केली होती.
हिंदी चाहत्यांना आवडला 'श्रीवल्ली'चा आवाज
रश्मिका मंदान्नानं 'पुष्पा 2' च्या हिंदी आणि तेलुगू व्हर्जनमध्ये स्वतःचा आवाज डब केला आहे. रश्मिकाचे हिंदी थोडेसे कच्चे असले तरी रणबीर कपूर स्टारर 'अ‍ॅनिमल' या चित्रपटातील तिचे डायलॉग्स बोलल्यामुळे तिला खूप ट्रोल व्हावे लागलं होतं. आता मात्र रश्मिकाच्या हिंदी संवादांमध्ये मोठी सुधारणा झाल्याचं दिसत आहे आणि तिनं हिंदी डबिंगमध्ये उत्कृष्ट काम केलं आहे. 'पुष्पा २' मध्ये रश्मिकानं पुष्पराजची पत्नी श्रीवल्लीची भूमिका साकारली आहे.
राजेश खट्टर यांचा फहद फसिलसाठी दमदार आवाज
पुष्पा फ्रँचायझीचा प्राण त्याचा खलनायक भंवर सिंग शेखावत आहे. मल्याळम अभिनेता फहाद फासिल साकारत आहे. 'पुष्पा द राइज'नंतर, फासिलनं आपल्या अभिनयानं 'पुष्पा 2' मध्ये नव्यानं श्वास घेतला आहे. फहाद हा त्याच्या कल्ट क्लासिक अभिनयासाठी प्रसिद्ध आहे. हिंदी डबिंगमध्ये त्याला शाहिद कपूरचे सावत्र वडील राजेश खट्टर यांनी आवाज दिला आहे. राजेश खट्टर एक उत्कृष्ट अभिनेता असण्याबरोबरच एक उत्कृष्ट व्हाईस ओव्हर आर्टीस्ट देखील आहेत.
