खळबळजनक! सलमान खान गोळीबार प्रकरणातल्या आरोपीनं लॉकअपमध्ये केली आत्महत्या, सीआयडी करणार चौकशी - Salman Khan shooting case

Salman Khan shooting case : सलमान खान गोळीबार प्रकरणातील आरोपीनं लॉकअपमध्ये आत्महत्या केली आहे. आता या प्रकरणातील आरोपी अनुज थापनच्या आत्महत्येची चौकशी राज्य सीआयडी करणार आहे.

मुंबई - Salman Khan shooting case : आज दुपारच्या सुमारास पोलीस आयुक्तालय परिसरात असलेल्या लॉकअपमध्ये सलमान खान गोळीबार प्रकरणामधील एका आरोपीनं आत्महत्या केल्याची खळबळजनक घटना घडली आहे. अनुज थापन वय 32 असं या आरोपीचं नाव आहे. त्याला ताबडतोब पोलीस आयुक्तालयाच्या शेजारी असलेल्या जीटी हॉस्पिटलमध्ये दाखल करण्यात आलं होतं.

सलमान खान गोळीबार प्रकरण : सुप्रसिद्ध अभिनेता सलमान खान गोळीबार प्रकरणात सर्व आरोपींवर मोक्का कायदा लावल्यानंतर हे प्रकरण पुढील तपासासाठी गुन्हे शाखेच्या कक्ष 9 कडून सहाय्यक पोलीस आयुक्त दत्तात्रय नाळे यांच्याकडे वर्ग करण्यात आलं आहे. तसंच, बिश्नोई गँगचा तपास महाराष्ट्रातील गुन्हे शाखा करत आहे. आरोपी विकी गुप्ता (वय 24), सागर पाल (वय 21) आणि अनुज थापन (वय 32) यांना विशेष मोक्का न्यायालयानं 8 मे पर्यंत पोलीस कोठडी सुनावली. त्याचप्रमाणे आरोपी सोनूकुमार बिश्नोई (वय 37) याची वैद्यकीय कारणास्तव न्यायालयीन कोठडीत रवानगी केली होती. दरम्यान अनुज कुमार थापन आणि सोनू कुमार बिश्नोई या दोघांनी पनवेल येथे राहात असलेल्या सागर पाल आणि विकी गुप्ता या दोघांना दोन पिस्तूल पुरवली होती. सोनू कुमार विष्णू आणि अनुज थापन या शस्त्र पुरवणाऱ्या दोघांना पंजाब मधून अटक करण्यात आली होती. अनुज थापननं आज दुपारी लॉक अपमध्येच आत्महत्येचा प्रयत्न केल्याची घटना उघडकीस आल्यानंतर पुढील उपचारासाठी जीटी रुग्णालयात दाखल केलं गेलं होतं. मात्र उपचारादरम्यान अनुज थापन याचा मृत्यू झाला असल्याचं जीटी रुग्णालयाच्या डॉक्टरांनी घोषित केलं.

गँगस्टर लॉरेन्स बिश्नोईचा भाऊ : कुख्यात संघटीत गुन्हेगारी टोळ्या चालविणाऱ्या गँगस्टर लॉरेन्स बिश्नोई आणि त्याचा धाकटा भाऊ अनमोल बिश्नोई हे गुन्ह्यातील पाहिला आरोपी आहेत. त्यांच्या विरोधात आरोपपत्र दाखल झालेल्या दोन महत्वाच्या गुन्ह्यांची माहिती गुन्हे शाखेनं घेतली आहे. तसंच, लॉरेन्स बिश्नोई हा 2010 पासून गुन्हेगारी कारवाया करत असून त्याच्या विरोधात पंजाब, हरियाणा, चंदीगड, दिल्ली आणि राजस्थानमध्ये हत्या, हत्येचा प्रयत्न, खंडणी, धमक्या अशा सुमारे 90 गुन्ह्यांची नोंद असल्याचं एका अधिकाऱ्यानं सांगितलं. त्याच्या महाराष्ट्रातील वाढत्या जाळ्याची अधिक माहिती गुन्हे शाखा काढत आहे.

हेही वाचा :