मुंबई - अभिनेता विक्रांत मॅसीनं सोमवारी अभिनयातून ब्रेक घेणार असल्याबद्दलचा आपला एक निर्णय सोशल मीडिया पोस्टमधून चाहत्यांना सांगितला होता. मात्र ही पोस्ट व्हायरल झाली आणि तो फिल्म इंडस्ट्रीतून 'निवृत्ती' घेत असल्याच्या चर्चेला उधाण आलं. याबाबत मंगळवारी विक्रांतनं अधिकृत निवेदन जारी करून स्पष्ट केले की लोकांनी त्याच्या पोस्टचा चुकीचा अर्थ लावला आहे. त्यानं असंही नमूद केलं की, बऱ्याच काळ काम केल्यानं शारीरिक आणि मानसिक थकवा जाणवत आहे. म्हणून अभिनयातून तात्पुरती विश्रांती घेण्याबद्दल मी माझा विचार व्यक्त केला होता.
"मी अभिनयच करू शकतो. मला माझ्याकडे जे काही आहे ते अभिनयानंच दिलं आहे. माझ्या शारीरिक आणि मानसिक आरोग्याला मोठा फटका बसला आहे. मला फक्त थोडा वेळ विश्रांती घ्यायची आहे, माझी कला अधिक चांगली करायची आहे. माझ्या पोस्टचा चुकीचा अर्थ लावला गेला आहे की मी अभिनय सोडत आहे किंवा मला माझ्या कुटुंबावर आणि आरोग्यावर लक्ष केंद्रित करायचे आहे," असं विक्रांत आपल्या पोस्टमध्ये म्हणाला. त्याच्या आधीच्या पोस्टमध्ये, विक्रांतनं त्याचे चाहते आणि फॉलोअर्स यांच्याकडून मिळालेल्या प्रमाबद्दल आभार मानले होते.
विशेष म्हणजे अभिनयातून ब्रेक घेत असल्याचं जाहीर केल्यानंतर काही तासांनी, विक्रांतनं सोमवारी संध्याकाळी संसदेच्या बालयोगी सभागृहात पंतप्रधान नरेंद्र मोदी आणि राष्ट्रीय लोकशाही आघाडीच्या इतर खासदारांसह त्याच्या 'द साबरमती रिपोर्ट' चित्रपटाच्या विशेष स्क्रीनिंगला हजेरी लावली होती. त्यानंतर विक्रांतनं आपला अनुभव प्रसारमाध्यमांशी शेअर करताना सांगितलं की, "मी हा चित्रपट पंतप्रधान, सर्व कॅबिनेट मंत्री आणि अनेक खासदारांबरोबर पाहिला. हा एक खास अनुभव होता. मी अजूनही तो शब्दात व्यक्त करू शकत नाही कारण मी मी खूप आनंदी आहे... माझ्या कारकिर्दीतील हा सर्वोच्च बिंदू आहे, की मला पंतप्रधानांसह माझा चित्रपट पाहायला मिळाला."
'द साबरमती रिपोर्ट' हा चित्रपट 27 फेब्रुवारी 2002 रोजी गुजरातमधील गोध्रा स्थानकाजवळ साबरमती एक्स्प्रेसच्या एस-6 कोचला लागलेल्या आगीच्या घटनेवर आधारित आहे. चित्रपटाचा ट्रेलर शेअर करणाऱ्या X वरील एका पोस्टला उत्तर देताना, पंतप्रधान नरेंद्र मोदींनी म्हटलं होतं की, "छान सांगितले. हे सत्य बाहेर येत आहे हे चांगलं आहे, आणि ते देखील सामान्य लोक पाहू शकतील. एक बनावट कथा केवळ मर्यादित कालावधीसाठी टिकून राहते अखेरीस, तथ्ये नेहमीच बाहेर येत असतात!"
2002 च्या गोध्रा घटनेकडे लक्ष वेधणारा हा चित्रपट उत्तर प्रदेश, छत्तीसगड, मध्य प्रदेश, उत्तराखंड, ओडिशा, हरियाणा, गुजरात आणि राजस्थानसह अनेक राज्यांमध्ये करमुक्त घोषित करण्यात आला आहे. भाजपा खासदार आणि अभिनेत्री हेमा मालिनी यांच्यासह अनेक राजकीय व्यक्तींनीही या चित्रपटाची प्रशंसा केली आहे. केंद्रीय गृहमंत्री अमित शहा यांनीही 'द साबरमती रिपोर्ट' चित्रपटाच्या स्टार कास्टची भेट घेतली. उत्तर प्रदेशमध्ये, मुख्यमंत्री योगी आदित्यनाथ इतर प्रमुख नेते आणि चित्रपटाच्या कलाकारांसह लखनौमध्ये चित्रपटाच्या स्क्रीनिंगला उपस्थित होते.
चित्रपटाबद्दल कौतुक व्यक्त करताना मुख्यमंत्री आदित्यनाथ म्हणाले, "विक्रांत मॅसी आणि त्यांच्या टीमनं एक प्रशंसनीय प्रयत्न केलं आहे. मी यूपीच्या वतीनं मनापासून आभार व्यक्त करतो. देशातील जनतेला या घटनेचं सत्य जाणून घेण्याचा अधिकार आहे.
