'बिग बॉस'च्या घरात कोल्हापूरचा रांगडा गडी करतोय 'कल्ला', धनंजय पोवारांची आई म्हणतेय 'आगे आगे देखिये होता है क्या...' - Bigg Boss Marathi 5

Dhananjay Powar family: 'बिग बॉस मराठी 5' हा शो सध्या खूप चर्चेत आहे. या शोमधील धनंजय पोवार स्पर्धक हा 'बिग बॉस' घरात प्रेक्षकांचं खूप मनोरंजन करताना दिसत आहे. आता धनंजयबद्दल सविस्तर जाणून घ्या..

कोल्हापूर - Dhananjay Powar family: 'बिग बॉस' मराठी या रियालिटी शोचे तीन आठवडे पूर्ण होऊन हा रोमहर्षक खेळ आता चौथ्या आठवड्यात पदार्पण करतोय. या आगळ्यावेगळ्या खेळात कोल्हापूरचा रांगडा गडी धनंजय पोवार अर्थात डीपी चांगलाच चर्चेत आहे. ठसकेबाज कोल्हापुरी वाणीनं राज्यभरातील मराठी प्रेक्षकांना आपल्या खास विनोदी शैलीनं डीपी दादांनी वेड लावलं आहे. कोल्हापुरातील इचलकरंजीच्या धनंजय पोवारच्या आतापर्यंतच्या प्रवासाबद्दल त्याच्या कुटुंबीयांना काय वाटतं? कुटुंबीयांनी खेळाबद्दल काय अपेक्षा केली आहे? विजेता होण्यासाठी धनंजयनं काय काय करावे? याबाबत व्यक्त केलेल्या भावना जाणून घेऊ या या सविस्तर मुलाखतीमधून......

धनंजय पोवारचा 'बिग बॉस' मराठी 5मधील प्रवास : महाराष्ट्राचे मँचेस्टर अशी ओळख असलेल्या इचलकरंजीतील प्रसिद्ध फर्निचर व्यावसायिक अजित पोवार यांचा एकुलता एक मुलगा धनंजय पोवारनं बारावीच्या परिक्षेत सर्व विषयात 35 टक्के गुण मिळवून 20 वर्षांपूर्वी सर्वांचंच लक्ष वेधून घेतलं होतं. हट्टी आणि कमालीचा चाणाक्ष असलेल्या धनंजयचं शाळेत कधी मन लागलंच नाही. मात्र वडिलांनी आपल्या व्यवसायात त्याला दुकानाची जबाबदारी दिली. यानंतर फावल्या वेळात आणि खास करून कोरोनाच्या काळात सेलफोनचा वापर करून धनंजयनं कुटुंबातील सदस्यांबरोबर काही व्हिडिओ तयार केले होते. यानंतर हे व्हिडिओ त्यांनी सोशल मीडियावर शेअर केले. हे व्हिडिओ सोशल मीडियावर तुफान व्हायरल झाले. याच काळात धनंजय पवारला कोल्हापूर जिल्ह्यासह अखंड महाराष्ट्रातील लोकदेखील ओळखू लागले. धनंजयचा कोल्हापुरी खास शैलीतील संवाद, आई आणि पत्नी यांच्याशी घरातील होणारे विनोदी शैलीतील वाद बघणं अनेकांना आवडत होते. गेल्या चार वर्षांत धनंजयच्या चाहत्यांचा आकडा 10 लाखांच्या घरात पोहोचला, याचीच दखल घेऊन 'बिग बॉस' मराठीच्या पाचव्या पर्वात सहभागी होण्याची संधी इचलकरंजीच्या या रांगड्या तरुणाला मिळाली. गेली तीन आठवडे धनंजयचा प्रवास सुरू आहे. त्याच्या कुटुंबीयांनी धनंजय या पर्वाचा विजेता होऊनच परतणार, असा विश्वास व्यक्त केला आहे. धनंजयचा मित्र सर्जेराव खोत आणि मामा यांनीही आपल्या खास शैलीत शुभेच्छा दिल्या आहेत.

शोसाठी केला होता वडिलांनी विरोध : कोरोनाच्या काळात लॉकडाऊन असल्यामुळे सर्व मंडळी घरातच असायची. याच वेळेत धनंजय हा पत्नी कल्याणी, आई अश्विनी आणि बहिणींबरोबर व्हिडिओ बनवत होता. वडील अजित पोवार यांना त्याचं व्हिडिओ बनवणं आवडायचं नाही. वडील घरी नसताना धनंजय हा व्हिडिओ बनवत होता, या व्हिडिओद्वारे लोकांचे प्रेम आणि मिळणाऱ्या प्रतिक्रिया पाहून वडिलांचा विरोध मावळला. साधारणतः वीस वर्षांपूर्वी अठरा वर्षाच्या धनंजयनं वडिलांच्या वाढदिवसानिमित्त इचलकरंजी शहरात डिजिटल बोर्ड लावले होते, या बोर्डावर 'पप्पा तुम्हाला अभिमान वाटेल आणि माझ्या नावानं तुम्हाला ओळखलं जाईल' असा भन्नाट संदेश लिहिला होता. वडील अजित पोवारांनी त्यावेळी धनंजयला चांगलंच खडसावलं होतं. मात्र आता त्यानं ते करून दाखवलं असं सांगताना वडिलांचा उर अभिमानानं भरून आला. धनंजय 'बिग बॉस' मराठीच्या शोमध्ये चांगला खेळतोय यापुढेही त्याचा दर्जेदार खेळ महाराष्ट्राच्या जनतेला पाहायला मिळेल, असा विश्वास वडील अजित पोवार यांनी 'ईटीव्ही भारत' शी बोलताना व्यक्त केलाय.

आई म्हणते 'आगे आगे देखिये होता है क्या...' : धनंजय पोवारची आई अश्विनी यांनी कायम आपल्या लाडक्या लेकाला मायेनं 'धन्या' अशी हाक मारली. मात्र गेली तीन आठवडे लाडका लेक घरात नसल्यानं त्याला आता संध्याकाळी नऊ वाजता फक्त टीव्हीवर बघायला मिळत आहे. अस्सल मटणप्रेमी असलेला लाडका धनंजय महाराष्ट्राच्या जनतेला खळखळून हसवतोय हे पाहून समाधान असल्याचं आई अश्विनी यांनी सांगितलं. यावेळी त्यांनी म्हटलं सुरुवातीला खेळात वेळ घेतलेला धनंजय आता 'बिग बॉस'च्या घरात जोरदार कल्ला करेल आणि 'बिग बॉस' चा मराठी शो जिंकेल. याशिवाय त्यांनी पुढं म्हटलं, धनंजय घरी परतल्यानंतर पहिल्यांदा त्याचं तोंड गोड करून हवं तेवढं कोल्हापुरी मटण त्याला खायला देईल हे सांगून त्या भावुक झाल्या.

अख्खं कुटुंब रंगलं 'बिग बॉस' शोमध्ये : सर्वसामान्य कुटुंबात असूनही क्रिकेट खेळाची आवड, चरचरीत तांबडा-पांढरा रस्सा आणि मटण प्रेमी असणारा धनंजय पोवार 'बिग बॉस' मराठीत कोल्हापूरचं प्रतिनिधित्व करत आहे. जेव्हा धनंजय या शोसाठी घरातून निघाला तेव्हाच तो विजयी होऊनच परतणार असा विश्वास पत्नी कल्याणी यांनी धनंजयला दिला होता. मुलगा हर्षवर्धन, मुलगी जान्हवीबरोबर कुटुंबीयांची काळजी घेणाऱ्या धनंजयची पत्नी कल्याणीसुद्धा आता सोशल मीडियावर कमालीच्या ऍक्टिव्ह झाल्या आहेत. घराची आणि व्यवसायाची जबाबदारी सांभाळत लाडक्या नवऱ्याला विजयी होण्यासाठी करावे लागणारे सर्व प्रयत्न कल्याणी पोवार करत आहेत. 'बिग बॉस' मराठीचं पर्व सुरू झाल्यापासून संध्याकाळी 9 वाजता अख्खं पोवार कुटुंब टीव्हीसमोर बसून 'बिग बॉस'च्या घरातील धनंजयची कामगिरी पाहत आहे. त्यानं ठरवलेली रणनीती, 'बिग बॉस'चं घर हसतं खेळतं ठेवण्यासाठी ठसकेबाज कोल्हापुरी बाण्यातून अलगद उमटणारे विनोद, यामधून 'बिग बॉस'च्या घरात धनंजय पोवार आपली खास शैली दाखवून देत आहे. नुकताच रक्षाबंधन सण झाला, या दिवशी पोवार यांच्या घरातील अनेक सदस्य भावुक झाल्याचं पाहायला मिळालं. धनंजय पोवारच्या दोन्ही बहिणी आपला भाऊ विजयी होऊनच परतणार आणि तीच आमच्यासाठी खास ओवाळणी असेल अशी भावना व्यक्त केल्याचं कल्याणी पोवार यांनी सांगितलं, तर महाराष्ट्रातल्या जनतेला धनंजय यांच्या मागं उभं राहण्याचं‌ आवाहनही त्यांनी यानिमित्तानं केलं आहे.

हेही वाचा :