राहुल गांधींना स्वातंत्र्य दिनाच्या कार्यक्रमात पाचव्या रांगेत जागा दिल्यानं वाद, संरक्षण मंत्रालयाकडून सारवासारव - Rahul Gandhi

Rahul Gandhi News : लोकसभेतील विरोधी पक्षनेते राहुल गांधी यांना स्वातंत्र्य दिनाच्या दिल्लीतील सोहळ्यात पाचव्या रांगेत जागा देण्यात आली. त्यावरून विरोधकांनी केंद्र सरकारवर निशाणा साधला आहे. यावर संरक्षण मंत्रालयाकडून सारवासारव करण्यात आल्यानंतरही काँग्रेसनं पुन्हा टीका केली.

नवी दिल्ली : लोकसभेतील विरोधी पक्षनेते राहुल गांधी यांना स्वातंत्र्यदिनाच्या कार्यक्रमात पाचव्या रांगेत बसवल्यानं काँग्रेसच्या नेत्यांनी संताप व्यक्त केला. राहुल गांधी यांचा अपमान करण्याच्या उद्देशानं त्यांना जाणीवपूर्वक मागच्या रांगेत बसवण्यात आल्याचा आरोप काँग्रेसनं केला. याबाबत आता संरक्षण मंत्रालयानं उत्तर दिलं आहे. त्यांना मागं का बसवण्यात आलं याचं कारणही दिलंय. संरक्षण मंत्रालयानं म्हटलं की, "ऑलिम्पिकमधील पदक विजेत्यांना सन्मानित करण्यासाठी त्यांना पुढच्या रांगेत स्थान देण्यात आलं. त्यामुळं राहुल गांधींना मागच्या रांगेत जागा देण्यात आली."

विरधकांना सन्मान द्याचा नाही? : राहुल गांधींना पाचव्या रांगेत स्थान दिल्यावरून संरक्षण मंत्रालयाचं विधान म्हणजे मूर्खपणाचं लक्षण असल्याची काँग्रेसनं टीका केली आहे. “ऑलिम्पिक पदक विजेत्यांना सन्मान द्यायला हवा. विनेश फोगट यांनाही सन्मान दिला पाहिजे. पण, गृहमंत्री अमित शाह, अर्थमंत्री निर्मला सीतारामन आरोग्यमंत्री जेपी नड्डा यांना हा सन्मान त्यांना द्यायचा नाही का?," असा आरोप काँग्रेसनं केलाय. काँग्रेसनं पुढं म्हटलंय की, "राहुल गांधींना पाठीमागं बसवल्यानं सरकारला लोकशाही परंपरा तसंच विरोधी पक्षनेत्याचा आदर नसल्याचं दिसून येतं."

आज लाल किल्ल्यावर ध्वजारोहणाच्या वेळी विरोधी पक्षनेते राहुल गांधी पाचव्या रांगेत बसण्यात आलं. केंद्र सरकारनं हे जाणूनबुजून केलंय. विरोधी पक्षनेत्यामुळं सरकार अस्वस्थ आहे. त्यामुळं त्यांना मागच्या रांगेत बसवण्यात आलं. - सुप्रिया श्रीनेट, राष्ट्रीय प्रवक्त्या काँग्रेस

"संरक्षण मंत्रालय इतकं वाईट का वागत आहे? लोकसभेतील विरोधी पक्षनेते राहुल गांधी यांना पाचव्या रांगेत बसवलं. विरोधी पक्षनेतेपद मोठं आहे. लोकसभेत ते पंतप्रधानांनंतर विरोधी पक्षनेतेद असतं. तुम्ही संरक्षण मंत्रालयाला राष्ट्रीय कार्यक्रमात राजकारण करण्याची परवानगी कशी देऊ शकता?" - विवेक तन्खा, राज्यसभा खासदार काँग्रेस

बसण्याची व्यवस्था संरक्षण मंत्रालयाकडं : स्वातंत्र्य दिनाच्या कार्यक्रमात पाहुण्यांच्या बसण्याची व्यवस्था करण्याचं काम संरक्षण मंत्रालयाचं असतं. संरक्षण मंत्रालयाच्या प्रोटोकॉलनुसार विरोधी पक्षाच्या नेत्यांना पुढच्या रांगेत बसवलं जातं. मात्र यावेळी ऑलिम्पिक पदक विजेत्या खेळाडूंना पुढच्या रांगेत बसण्याची व्यवस्था करण्यात आली होती. त्यामुळं राहुल गांधींना मागे बसावं लागलं.

हे वाचलंत का :