चंदीगड : हरियाणा विधानसभेसाठी नुकतेच मतदान पार पडले. 5 ऑक्टोबर रोजी हरियाणात विधानसभेच्या 90 जागांसाठी एकाच टप्प्यात मतदान झालं. त्यानंतर आता आज (8 ऑक्टोबर) या निवडणुकीचे निकाल जाहीर होणार आहेत. दरम्यान, हरियाणामध्ये निवडणुकीचे एक्झिट पोल समोर आले आहेत. त्यामध्ये जवळपास सर्वच एक्झिट पोलमध्ये काँग्रेसच्या बाजुनं कौल देण्यात आलाय. तसंच गेल्या 10 वर्षांपासून सत्तेत असलेल्या भाजपाला धक्का बसण्याची शक्यता एक्झिट पोलमध्ये वर्तवण्यात आली आहे. त्यामुळं आता निकाल काय लागतो? कोणत्या पक्षाला जास्तीत जास्त जागा मिळतील? कोणत्या पक्षाचं सरकार हरियाणामध्ये येणार? हे आता पुढच्या काही तासांमध्ये स्पष्ट होणार असून याकडं सर्वांचंच लक्ष लागलंय.
मतमोजणीला सुरुवात : हरियाणात मतमोजणीला सुरुवात झाली आहे. सुरुवातीच्या कलांमध्ये काँग्रेस आघाडी घेतल्याचं चित्र बघायला मिळतंय. भाजपा 5 तर काँग्रेसनं 8 जागांवर विजय मिळवला आहे.
90 विधानसभा मतदारसंघांसाठी 93 मतमोजणी केंद्र : हरियाणाचे मुख्य निवडणूक अधिकारी पंकज अग्रवाल यांनी सांगितलं की, "हरियाणा विधानसभा निवडणूक 2024 च्या मतमोजणीसाठी राज्यातील 22 जिल्ह्यांमधील 90 विधानसभा मतदारसंघांसाठी 93 मतमोजणी केंद्र स्थापन करण्यात आली आहेत. यामध्ये बादशाहपूर, गुरुग्राम आणि पतौडी विधानसभा मतदारसंघांसाठी प्रत्येकी दोन मतमोजणी केंद्रे आणि उर्वरित 87 विधानसभा मतदारसंघांसाठी प्रत्येकी एक मतमोजणी केंद्र बनवण्यात आलं आहे. मतमोजणी प्रक्रियेवर देखरेख ठेवण्यासाठी निवडणूक आयोगानं 90 मतमोजणी निरीक्षकांचीही नियुक्ती केली आहे."
मतमोजणीसाठी कडक सुरक्षा व्यवस्था : मतमोजणीसाठी कडक सुरक्षा व्यवस्था ठेवण्यात आली आहे. केंद्रीय सुरक्षा दलाच्या 30 कंपन्या 93 मतमोजणी केंद्रांवर तैनात करण्यात आल्या आहेत. मतमोजणी केंद्रांवर तीनस्तरीय सुरक्षा बंदोबस्त ठेवण्यात आलाय. सर्वात आतल्या सुरक्षा वर्तुळात केंद्रीय सुरक्षा दल तैनात करण्यात आलंय. राज्यभरात स्थापन करण्यात आलेल्या मतमोजणी केंद्रांवर सुमारे 12 हजार पोलीस कर्मचारी तैनात करण्यात आले आहेत.
हेही वाचा -