दिल्ली विधानसभा निवडणूक 2025: देवेंद्र फडणवीसांचा अरविंद केजरीवाल यांच्यावर हल्लाबोल; नेमकं काय-काय म्हणाले?

दिल्ली विधानसभा निवडणुकीच्या पार्श्वभूमीवर महाराष्ट्राचे मुख्यमंत्री देवेंद्र फडणवीस यांनी अरविंद केजरीवाल यांच्यावर गुरुवारी जोरदार टीका केलीय. वाचा, सविस्तर बातमी

नवी दिल्ली : दिल्ली विधानसभा निवडणुकीच्या (Delhi Assembly Elections 2025) पार्श्वभूमीवर महाराष्ट्राचे मुख्यमंत्री देवेंद्र फडणवीस (Devendra Fadnavis) यांनी भाजपा उमेदवारांच्या समर्थनार्थ दिल्लीत प्रचारसभा घेतली. यावेळी फडणवीस यांनी आपचे संयोजक अरविंद केजरीवाल (Arvind Kejriwal) यांच्यावर जोरदार टीकास्त्र सोडले.

काय म्हणाले देवेंद्र फडणवीस? : बलबीर नगर येथील सभेत बोलताना मुख्यमंत्री फडणवीस यांनी यमुना प्रदूषणावरुन (yamuna pollution) अरविंद केजरीवाल यांच्यावर निशाणा साधला. ते म्हणाले, “अरविंद केजरीवाल यांनी यमुना नदी स्वच्छ करण्याचं वचन दिलं होतं. ते मंत्रिमंडळासह यमुनेत डुबकी मारून मतं मागतील. पण, यमुनेचं पाणी पूर्वीपेक्षा जास्त घाण झालंय. त्यामुळं अरविंद केजरीवालजी, तुम्ही तुमच्या मंत्रिमंडळासह पाण्यात डुबकी मारा. दिल्लीचा निरोप घ्या. दिल्लीचे लोक तुम्हाला हेच सांगता आहेत", असं फडणवीस म्हणाले.

दिल्लीत महिलाच बदल घडवतील : गोकलपूर विधानसभा मतदारसंघातून भाजपाचे उमेदवार प्रवीण निमेश यांच्यासाठी प्रचार करताना फडणवीस यांनी राष्ट्रीय राजधानीत भाजपाचाच विजय होईल, असा विश्वास व्यक्त केला. पत्रकारांशी बोलताना फडणवीस म्हणाले की, “दिल्लीनं आपला निर्णय घेतलाय. दिल्लीतील जनता भाजपाला पाठिंबा देणार आहे. दिल्लीतील महिला दिल्लीत बदल घडवून आणणार आहेत. दिल्लीच्या भगिनींनी खोटं केजरीवाल सरकार बंद करून भाजपा सरकार आणण्याचा निर्णय घेतलाय. पंतप्रधान नरेंद्र मोदी यांच्या नेतृत्वाखाली दिल्लीत भाजपा सरकार सत्तेवर येईल."

अरविंद केजरीवाल बेईमान नेते : पुढं फडणवीस म्हणाले, "अरविंद केजरीवाल हे बेईमान नेते आहेत, असं स्वतः अण्णा हजारे म्हणालेत. खोटे बोलण्याची किंवा भ्रष्टाचार करण्याची एखादी स्पर्धा जगाच्या पाठीवर भरवली. तर त्यामध्ये आपच्या नेत्यांचा पहिला क्रमांक येईल. पण आता 'आपदा नही सहेंगे' हे दिल्लीकरांनी ठरवलंय. या भूमिकेला दिल्लीतील मराठी माणूस पूर्ण ताकदीनं प्रतिसाद देईल", असंही फडणवीस यावेळी म्हणाले.

हेही वाचा -