കോഴിക്കോട്: വീട്ടമ്മയെ ഫ്ലാറ്റിനുള്ളിൽ മരിച്ച നിലയിൽ കണ്ടെത്തിയ സംഭവത്തിൽ മരുമകൻ കസ്‌റ്റഡിയിൽ. തമിഴ്‌നാട് കാരക്കോണം സ്വദേശി മഹമൂദിനെ (39) തമിഴ്‌നാട്ടിലേക്ക് കടക്കാനുള്ള ശ്രമത്തിനിടയിൽ പൊലീസ് പിടികൂടുകയായിരുന്നു. ഇന്നലെ (നവംബർ 06) രാത്രി പെരുമണ്ണയ്ക്ക് സമീപം പയ്യടി മേത്തലിൽ അസ്‌മാബിനെ (55) ഫ്ലാറ്റിനുള്ളിൽ മരിച്ച നിലയിൽ കണ്ടെത്തുകയായിരുന്നു. മകൾക്കും മരുമകനുമൊപ്പം താമസിച്ച് വരികയായിരുന്നു.
ഇന്നലെ രാത്രി എട്ടുമണിയോടെ സ്വകാര്യ സ്ഥാപനത്തിൽ സെക്യൂരിറ്റിയായി ജോലി ചെയ്യുന്ന മകൾ ഫ്ളാറ്റിലെത്തിയപ്പോഴാണ് ഉമ്മയെ മരിച്ച നിലയിൽ കണ്ടെത്തിയത്. ഉടൻ തന്നെ പൊലീസിൽ വിവരമറിയിച്ചു. പൊലീസ് സ്ഥലത്തെത്തി നടത്തിയ പ്രാഥമിക അന്വേഷണത്തിൽ തന്നെ കൊലപാതകമാണെന്ന സൂചന ലഭിച്ചു. അസ്‌മാബിയുടെ ആഭരണങ്ങളും കാണാനില്ലായിരുന്നു. ആദ്യഘട്ട അന്വേഷണത്തിൽ മകളുടെ ഭർത്താവിനെ കാണാനില്ലെന്നുള്ള വിവരം മനസിലാക്കിയ പൊലീസ് അന്വേഷണം ഊർജിതമാക്കി.
അതിനിടയിൽ രാത്രി പതിനൊന്നരയോടെ പാലക്കാട് നിന്നും മരുമകൻ തമിഴ്‌നാട്ടിലേക്ക് കടക്കാനുള്ള ശ്രമത്തിനിടയിൽ പൊലീസ് പിടികൂടി. കൂടുതൽ അന്വേഷണത്തിന് ശേഷം മാത്രമേ കൊലപാതകമാണോയെന്ന കാര്യം സ്ഥിരീകരിക്കാൻ പറ്റുകയുള്ളുവെന്ന് പൊലീസ് വ്യക്തമാക്കി.
