വര്‍ക്ക് ഷോപ്പില്‍ നിന്ന് ഇരുമ്പു സാധനങ്ങള്‍ മോഷ്‌ടിച്ച് കടത്താന്‍ ശ്രമിച്ചര്‍ കട്ടപ്പനയിൽ അറസ്റ്റില്‍

ഇടുക്കി : വര്‍ക്ക് ഷോപ്പില്‍ നിന്ന് ഇരുമ്പു സാധനങ്ങള്‍ മോഷ്‌ടിച്ച് കടത്താന്‍ ശ്രമിച്ച യുവാക്കള്‍ ഇടുക്കി കട്ടപ്പനയിൽ അറസ്റ്റില്‍ . കാഞ്ചിയാര്‍ കക്കാട്ടുകട നെല്ലാനിക്കല്‍ വിഷ്‌ണു വിജയന്‍ , സഹായി പുത്തന്‍പുരയിക്കല്‍ രാജേഷ് എന്ന് വിളിക്കുന്ന നിതീഷ് എന്നിവരാണ് അറസ്റ്റിലായത് (Theft In Work Shop Culprits Arrested  In Idukki). ഇന്ന് ( 03-03-2024) നിന്നാണ് പ്രതികള്‍ ഇരുമ്പ് മോഷ്‌ടിച്ചു കടത്താന്‍ ശ്രമിച്ചത്. ഈ സമയത്ത് വര്‍ക്ക് ഷോപ്പിലെത്തിയ ഉടമ വേലായുധന്‍റെ മകന്‍ പ്രവീണും സുഹൃത്ത് തോംസണും കടയില്‍ ശബ്‌ദം കേട്ടു. ഈ സമയത്താണ് വിഷ്‌ണു  മോഷണം നടത്തുന്നത് കണ്ടത്. ഉടന്‍ പ്രവീണും തോംസണും ചേര്‍ന്ന് വിഷ്‌ണു വിനെ തടഞ്ഞു. ഇതോടെ ഇവര്‍ തമ്മില്‍ സംഘര്‍ഷമായി. അടിപിടിക്കിടെ ഇരുമ്പ് വടി കൊണ്ടുള്ള അടിയേറ്റ് പ്രവീണിന് പരുക്കേല്‍ക്കുകയും ചെയ്‌തു. അവരെ തള്ളിയിട്ട് ഓടിയ വിഷ്‌ണു മതില്‍ ചാടിക്കടന്ന് ഓടി രക്ഷപ്പെടാന്‍ ശ്രമിക്കുന്നതിനിടെ വീണ് കാലിന് പരുക്കേല്‍ക്കുകയായിരുന്നു. വിവരം അറിഞ്ഞ് സ്ഥലത്തെത്തിയ പൊലീസ് വിഷ്‌ണുവിനെ ആശുപത്രിയിലെത്തിച്ചു. കാലിന് പൊട്ടലുള്ളതിനാല്‍ കോട്ടയം മെഡിക്കല്‍ കോളജില്‍ പ്രവേശിപ്പിച്ചു. മോഷണ സമയത്ത് വര്‍ക്ക് ഷോപ്പിനു പുറത്തായിരുന്നു നിതീഷ്. കട്ടപ്പന ഡി.വൈ.എസ്.പിയുടെ നിര്‍ദേശ പ്രകാരം കട്ടപ്പന പൊലീസ് ഇന്‍സ്‌പെക്‌ടര്‍ എന്‍. സുരേഷ് കുമാറിന്‍റെ നേതൃത്വത്തിലായിരുന്നു അറസ്റ്റ് നടന്നത്.