പൊലിസിന് കണ്ട് ഭയന്നോടിയ യുവാവ് കിണറ്റിൽ വീണു മരിച്ചു
കോട്ടയം: പൊലിസിനെ കണ്ട് ഭയന്നോടിയ യുവാവ് കിണറ്റിൽ വീണു മരിച്ചു. എം ജി യൂണിവേഴ്‌സിറ്റി ഹോസ്‌റ്റലിന് സമീപത്തെ കിണറ്റിൽ വീണാണ് യുവാവിന് ദാരുണാന്ത്യം സംഭവിച്ചത്. അതിരമ്പുഴ നാൽപ്പാത്തി തടത്തിൽ വീട്ടിൽ ആകാശ് സുരേന്ദ്രനാണ്(19) മരിച്ചത്. ഞായറാഴ്‌ച്ച രാത്രിയിലാണ് സംഭവം.
അതിരമ്പുഴ നാൽപ്പാത്തി മല റോഡിലെ ആളൊഴിഞ്ഞ പുരയിടത്തിലെ കിണറ്റിലാണ് ആകാശിനെ മരിച്ച നിലയിൽ കണ്ടെത്തിയത്. കൂട്ടുകാരോടൊപ്പം പുരയിടത്തിൽ ഇരിക്കവേ പൊലീസിനെ കണ്ട് ഭയന്ന് ഓടിയപ്പോൾ കിണറ്റിൽ വീണതാകാം എന്ന് സംശയിക്കുന്നു.
ആകാശും സുഹൃത്തുക്കളും ചേർന്ന് ആളൊഴിഞ്ഞ പുരയിടത്തിലിരുന്ന് മദ്യപിക്കുകയായിരുന്നുവെന്ന് പൊലീസ് പറഞ്ഞു. പോസ്‌റ്റ്മോർട്ടം നടപടിക്ക് ശേഷം മൃതദേഹം ബന്ധുക്കൾക്ക് വിട്ടുകൊടുത്തു.
