കോഴിക്കോട് : പുതിയങ്ങാടിയിൽ ലഹരിമരുന്ന് പിടികൂടിയ സംഭവത്തിൽ ഒരു യുവതി കൂടി പിടിയിൽ. ആലപ്പുഴ പുന്നപ്ര സ്വദേശിനി പിഎസ് ജൂമിയാണ് (24) പിടിയിലായത്. ഡാൻസാഫിന്‍റെയും വെള്ളയിൽ പൊലീസിന്‍റെയും നേതൃത്വത്തിലാണ് ബെംഗളൂരുവിൽ നിന്ന് ഇവരെ കസ്‌റ്റഡിയിൽ എടുത്തത്.
കണ്ണൂർ റേഞ്ചിൽ പൊലീസ് നടത്തിയ ഏറ്റവും വലിയ ലഹരിവേട്ടക്കേസിൽ ഇതോടെ മൂന്നാമത്തെയാളാണ് പിടിയിലായത്. നിലമ്പൂർ വെളിമറ്റം വടക്കേടത്ത് ഷൈൻ ഷാജിയെ ബെംഗളൂരുവിൽ നിന്നും പെരുവണ്ണാമുഴി മുതുകാട് കിഴക്കയിൽ ഹൗസിൽ ആൽബിൻ സെബാസ്‌റ്റ്യനെ ഇടുക്കി കുമളിയിൽ നിന്നും നേരത്തേ പിടികൂടിയിരുന്നു.
ഷൈൻ ഷാജിയേയും ആൽബിനെയും കസ്‌റ്റഡിയിൽ വാങ്ങി ചോദ്യം ചെയ്‌തപ്പോഴാണ് ബെംഗളൂരുവിൽ നിന്ന് ഷൈനിനൊപ്പം എംഡിഎംഎ കോഴിക്കോട്ടേക്ക് കൊണ്ടുവന്നത് ജൂമിയാണെന്ന വിവരം പൊലീസിന് ലഭിച്ചത്. കേസിലെ രണ്ട് പ്രതികളെ പിടികൂടിയപ്പോൾ ജൂമി ഒളിവിൽ പോയി ബെംഗളൂരുവിൽ താമസിക്കുകയായിരുന്നു.
