തിരുവനന്തപുരം: കുടിവെള്ളക്ഷാമം പരിഹരിക്കാത്തതിനെ തുടർന്ന് തിരുവനന്തപുരം കോർപ്പറേഷൻ പരിധിയിലെ സ്‌കൂളുകൾക്കും പ്രൊഫഷണൽ കോളജ് ഉൾപ്പെടെയുള്ള എല്ലാ വിദ്യാഭ്യാസ സ്ഥാപനങ്ങൾക്കും നാളെ (സെപ്‌തംബര്‍ 9) അവധി. തിരുവനന്തപുരം-നാഗർകോവിൽ റെയിൽപാത ഇരട്ടിപ്പിക്കലിന്‍റെ ഭാഗമായി കുടിവെള്ള പൈപ്പ് ലൈനുകൾ മാറ്റി സ്ഥാപിക്കുന്ന നിർമാണ പ്രവർത്തികൾ തുടരുന്നതിനാലാണ് വിദ്യാഭ്യാസ സ്ഥാപനങ്ങൾക്ക് അവധി പ്രഖ്യാപിച്ചത്.
കണ്ട്രോൾ റൂമിന്‍റെ പ്രവർത്തനം ആരംഭിച്ച ശേഷം ഇതുവരെ 662 ലോഡിൽ 25.90 ലക്ഷം ലിറ്റർ വെള്ളം വിതരണം ചെയ്തെന്ന് തിരുവനന്തപുരം നഗരസഭ അധികൃതർ അറിയിച്ചു. പിടിപി നഗറിൽ നിന്നുള്ള 700 എം എം പൈപ്പ് ലൈനും നേമം ഭാഗത്തേക്കുള്ള 500 എം എം പൈപ്പ് ലൈനും മാറ്റി സ്ഥാപിക്കുന്നതിന്‍റെ ഭാഗമായാണ് നഗരത്തിൽ വ്യാപകമായി കുടിവെള്ളക്ഷാമം നേരിട്ടത്.
പണി ഇഴയുന്നത് കാരണം 33 വാർഡുകളിൽ പൂർണമായും 11 വാർഡുകളിൽ ഭാഗികമായും കുടിവെള്ളം മുടങ്ങി. റെയിൽവേ ലൈനിന് അടിയിലുള്ള 700 എം എം പൈപ്പ് ലൈനുകൾ മാറ്റി സ്ഥാപിക്കുന്ന പണികൾ നിലവിൽ പുരോഗമിക്കുകയാണ്.
ഇടിവി ഭാരത് കേരളം ഇനി വാട്‌സ്‌ആപ്പിലും
ഇടിവി ഭാരത് കേരള വാട്‌സ്‌ആപ്പ് ചാനലില്‍ ജോയിന്‍ ചെയ്യാന്‍ ഈ ലിങ്കില്‍ ക്ലിക്ക് ചെയ്യുക.
റെയിൽ പാത വികസിപ്പിക്കുന്നതിനാൽ 50 മീറ്റർ മാറിയാകും പൈപ്പ് ലൈനുകൾ മാറ്റി സ്ഥാപിക്കുക. അതേസമയം കുടിവെള്ള പ്രതിസന്ധി ഇന്ന് വൈകിട്ട് നാല് മണിയോടെ പരിഹരിക്കുമെന്ന് ജലവിഭവ വകുപ്പ് മന്ത്രി റോഷി അഗസ്റ്റിൻ ഉറപ്പ് നൽകിയിരുന്നെങ്കിലും പണി പൂർത്തിയാക്കാനായില്ല. ടാങ്കറുകൾ മുഖേന പരമാവധി സ്ഥലങ്ങളിൽ കുടിവെള്ളം എത്തിക്കാനുള്ള ശ്രമത്തിലാണ് അധികൃതർ.
ഇതിനായി അടിയന്തര ഹെൽപ്പ് ലൈനും പ്രവർത്തനം തുടരുകയാണ്. ടാങ്കർ വെള്ളം ആവശ്യമുള്ളവർക്ക് മേയറുടെ ഔദ്യോഗിക നമ്പറായ 9447377477 എന്ന നമ്പറിലോ നഗരസഭ പ്രവർത്തനം ആരംഭിച്ച 8590036770 എന്ന കണ്ട്രോൾ റൂം നമ്പറിലോ ബന്ധപ്പെടാം.
Also Read: തലസ്ഥാന നഗരിയിൽ കുടിവെള്ളം കിട്ടാക്കനി: 44 വാർഡുകളിൽ വെള്ളമില്ല; ടാങ്കറുകളെ ആശ്രയിച്ച് ജനം
