തൃശൂർ മണലി പുഴയിൽ നീർനായക്കൂട്ടം (ETV Bharat)
തൃശൂർ: തൃശൂർ മണലി പുഴയിൽ നീർനായക്കൂട്ടത്തെ കണ്ടെത്തി. വഴിയാത്രക്കാരാണ് 6 നീർനായകളെ കണ്ടത്. പ്രദേശവാസികൾ വസ്ത്രങ്ങൾ കഴുകാനും കുളിക്കാനുമായി ഇറങ്ങുന്ന ഭാഗത്താണ് നീർനായ കൂട്ടം എത്തിയത്. സംഭവത്തിൽ ആശങ്കയിലാണ് നാട്ടുകാർ.
മണലി - മടവാക്കര റോഡിനോട് ചേർന്നുള്ള പുഴയിലാണ് നീർനായകൾ എത്തിയത്. ടോൾ ഒഴിവാക്കി പോകുന്ന വാഹനയാത്രക്കാർ നീർനായകളെ കണ്ടയുടൻ മൊബൈലിൽ ദൃശ്യങ്ങൾ പകർത്തുകയായിരുന്നു. കാച്ചക്കടവിന് സമീപത്ത് റോഡിന് എതിർവശത്തുള്ള പുഴയിലാണ് ആറ് നീർനായകൾ ഇറങ്ങിയത്.
നീർനായകൾ പുഴയിൽ പെറ്റുപെരുകിയിട്ടുണ്ടെന്ന് നാട്ടുകാർ പറയുന്നു. പുഴയിലിറങ്ങുന്നവരെ ഇവ കൂട്ടത്തോടെ ആക്രമിക്കുമെന്ന ഭയവും നാട്ടുകാർക്കുണ്ട്. നീർനായക്കൂട്ടത്തെ തുരത്താൻ അധികൃതർ ഇടപെടണമെന്ന് നാട്ടുകാർ ആവശ്യപ്പെട്ടു.
