തിരുവനന്തപുരം: ബാലരാമപുരത്ത് വീടിൻ്റെ അലമാര കുത്തിത്തുറന്ന് മോഷണം നടത്തിയ പ്രതി പിടിയിൽ. 30 പവനിലധികം സ്വര്‍ണാഭരണം മോഷ്‌ടിച്ച പത്തനാപുരം സ്വദേശി അല്‍ അമീന്‍ ആണ് പിടിയിലായത്. ജി ആര്‍ ഭവനില്‍ സുരേഷ് ബാബുവിന്‍റെ വീട്ടിലാണ് മോഷണം നടന്നത്. കഴിഞ്ഞ ദിവസം പകലായിരുന്നു സംഭവം.
സുരേഷ് ബാബുവിന്‍റെ സഹോദരന്‍റെ മകളുടെ ഭര്‍ത്തവാണ് അല്‍ അമീന്‍. പ്രണയ വിവാഹമായിരുന്നു ഇരുവരുടേതും. ഇന്നലെ വീട്ടിലെത്തിയ അല്‍അമീന്‍ സ്വര്‍ണാഭരണം കവര്‍ന്ന ശേഷം പത്തനാപുരത്തേക്ക് കടന്നുകളയുകയായിരുന്നു. തുടർന്ന് ബാലരാമപുരം പൊലീസ് സംശയം തോന്നിയവരെ ചോദ്യം ചെയ്‌തപ്പോഴാണ് അല്‍ അമീനാണ് മോഷണം നടത്തിയതെന്ന് മനസിലാക്കിയത്.
വീട്ടുകാര്‍ തൊഴിലുറപ്പ് ജോലിക്ക് പോയ സമയത്താണ് അലമാരയില്‍ സൂക്ഷിച്ചിരുന്ന സ്വര്‍ണാഭരണങ്ങള്‍ കവർന്നത്. ഓട്ടോ തൊഴിലാളിയായ സുരേഷ് ബാബു മക്കളെയും കൂട്ടി സ്‌കൂളില്‍ പോയ സമയത്താണ് സംഭവം. ബാബുവിൻ്റെ അമ്മ രേണുകയും മരുമകള്‍ താരയും തൊഴിലുറപ്പ് ജോലിക്ക് പോയിരുന്നു.
