തിരുവനന്തപുരം: മൂന്നാം മോദി സര്‍ക്കാറിന്‍റെ ആദ്യ ബജറ്റില്‍ അന്ധ്ര പ്രദേശിനും ബിഹാറിനും വാരിക്കോരിക്കൊടുത്തപ്പോള്‍ കേരളത്തിന് കനത്ത നിരാശ. രണ്ട് കേന്ദ്ര മന്ത്രിമാരുണ്ടായിട്ടും സംസ്ഥാനത്തിന് യാതൊരു തരത്തിലുമുള്ള പ്രതീക്ഷയ്‌ക്കും വകനല്‍കാത്ത ബജറ്റാണിതെന്നാണ് പൊതുവെ വിലയിരുത്തല്‍. എയിംസ് അടക്കം കേരളം നിരന്തരം ഉയര്‍ത്തുന്ന ആവശ്യങ്ങളോട് കേന്ദ്രം പൂര്‍ണമായും മുഖം തിരിച്ചു.
24,000 കോടി രൂപയുടെ പ്രത്യേക പാക്കേജ് ഉള്‍പ്പെടെയായിരുന്നു സംസ്ഥാനം ആവശ്യപ്പെട്ടത്. വിഴിഞ്ഞമടക്കമുള്ള വിഷയങ്ങളില്‍ കേരളത്തിന് പ്രതീക്ഷയുണ്ടായിരുന്നു. റബ്ബറിന്‍റെ താങ്ങുവില 250 രൂപയാക്കി ഉയര്‍ത്തല്‍, സില്‍വര്‍ലൈന്‍ അനുമതി, കണ്ണൂരില്‍ അന്താരാഷ്‌ട്ര ആയുര്‍വേദ ഗവേഷണ ഇന്‍സ്റ്റിറ്റ്യൂട്ട്, വയനാട് തുരങ്കപാതയുടെ നിര്‍മാണത്തിന് സഹായം തുടങ്ങിയവയും കേരളത്തിന്‍റെ ആവശ്യങ്ങളായിരുന്നു. എന്നാല്‍ കേന്ദ്ര ബജറ്റില്‍ കേരളത്തിന്‍റെ പേരുപോലും പരാമര്‍ശിക്കപ്പെട്ടില്ല.
വിവിധ പ്രകൃതിക്ഷോഭങ്ങള്‍ക്ക് ഇരയായ വടക്ക്- കിഴക്കൻ സംസ്ഥാനങ്ങൾക്ക് പ്രത്യേക പാക്കേജ് പ്രഖ്യാപിച്ചപ്പോഴും കേരളം പൂര്‍ണമായും തഴയപ്പെട്ടു. പ്രളയ ദുരിതം കൈകാര്യം ചെയ്യാന്നതിനായി അസമിനും ഹിമാചൽ പ്രദേശിനുമാണ് കേന്ദ്രം സഹായം പ്രഖ്യാപിച്ചിരിക്കുന്നത്. മേഘ വിസ്ഫോടനങ്ങൾ, ഉരുള്‍പ്പൊട്ടല്‍ എന്നിവ മൂലമുള്ള നാശനഷ്‌ടങ്ങള്‍ക്ക് ഉത്തരാഖണ്ഡിനും സിക്കിമിനും സമാനമായ പിന്തുണയും കേന്ദ്രം അറിയിച്ചിട്ടുണ്ട്. എന്നാല്‍ തുടര്‍ച്ചയായി പ്രളയ ദുരിതം അനുഭവിക്കുന്ന കേരളത്തിന് മുമ്പും ഇപ്പോഴും വട്ടപ്പൂജ്യമാണ് ലഭിച്ചത്.
മറുവശത്ത് മൂന്നാം മോദി സര്‍ക്കാരിലെ പ്രധാന ഘടകകക്ഷികളായ തെലുഗു ദേശം പാര്‍ട്ടിയുടേയും ജെഡിയുവിന്‍റേയും സമ്മര്‍ദങ്ങള്‍ക്ക് കേന്ദ്രം വഴങ്ങിയെന്ന് വ്യക്തമാണ്. ആന്ധ്രയ്‌ക്ക് 15,000 കോടിയുടെ പ്രത്യേക സാമ്പത്തിക പാക്കേജാണ് പ്രഖ്യാപിച്ചിരിക്കുന്നത്. കൂടാതെ കോടിക്കണക്കിന് രൂപയുടെ മറ്റ് വിവിധ പദ്ധകളുമുണ്ട്.
ബിഹാറില്‍ വിവിധ റോഡ് പദ്ധതികള്‍ക്കായി 26000 കോടിയാണ് കേന്ദ്രം നല്‍കുന്നത്. സംസ്ഥാനത്ത് വിമാനത്താവളങ്ങൾ, മെഡിക്കൽ കോളജുകൾ, കായിക രംഗത്തെ അടിസ്ഥാന സൗകര്യ വികസനങ്ങള്‍ എന്നിവയ്‌ക്കും കേന്ദ്രം പദ്ധതിയിടുന്നുണ്ട്. മള്‍ട്ടിലാറ്ററല്‍ ഡെവലപ്പ്മെന്‍റ് ഏജന്‍സികളുടെ പിന്തുണയോടെ സംസ്ഥാനത്തിന് കേന്ദ്രം കൂടുതല്‍ ധനസഹായം ഉറപ്പാക്കും. മള്‍ട്ടിലാറ്ററല്‍ ഡെവലപ്പ്മെന്‍റ് ബാങ്കുകളില്‍ നിന്നുള്ള വിദേശ സഹായത്തിനുള്ള ബീഹാർ സർക്കാരിന്‍റെ അഭ്യർഥന വേഗത്തിലാക്കുമെന്ന് നേരത്തെ പ്രധാനമന്ത്രി പരാമർശിച്ചിരുന്നു.
