തിരുവനന്തപുരം: രണ്ടാം പിണറായി സര്‍ക്കാരിന്‍റെ മൂന്നാം ബജറ്റില്‍ കാര്‍ഷിക മേഖലയിലെ തുണ്ട് ഭൂമികള്‍ ഒരുമിച്ച് ചേര്‍ത്ത് ലാഭകരമായി കൃഷി ചെയ്യാന്‍ സാധിക്കുന്ന വിളകളും പദ്ധതികളും പ്രോത്സാഹിപ്പിക്കുമെന്ന് ധനമന്ത്രി കെഎന്‍ ബാലഗോപാല്‍. ഇതിനായി ലാൻഡ് പൂളിങ് നടപ്പാക്കുമെന്നും മന്ത്രിയുടെ ബജറ്റ് പ്രഖ്യാപനം. 1698.30 കോടിയാണ് കാര്‍ഷിക മേഖലയില്‍ വരുന്ന സാമ്പത്തിക വര്‍ഷത്തേക്ക് വിലയിരുത്തിയത്. ഭക്ഷ്യ കാര്‍ഷിക മേഖലയുടെ വാണിജ്യവത്കരണം പ്രോത്സാഹിപ്പിക്കാന്‍ വേണ്ട പദ്ധതികളും നടപ്പിലാക്കുമെന്ന് ധനമന്ത്രി നിയമസഭയില്‍ വ്യക്തമാക്കി.
സുഗന്ധ വ്യഞ്ജന കൃഷിക്കായി 4.6 കോടി, കാര്‍ഷിക സര്‍വകലാശാലക്ക് 75 കോടി, വിഷരഹിത പച്ചക്കറി കൃഷിക്കായി 78 കോടി, വിളകളുടെ ഉദ്‌പാദനം വര്‍ധിപ്പിക്കാന്‍ രണ്ട് കോടി എന്നിവയാണ് കാര്‍ഷിക മേഖലയിലെ മറ്റ് പ്രധാന പ്രഖ്യാപനങ്ങള്‍. ചട്ടങ്ങളില്‍ മാറ്റം വരുത്തി ചന്ദനകൃഷിക്ക് പ്രോത്സാഹനം നല്‍കും. കുട്ടനാട്ടിലെ കാര്‍ഷിക വികസന പ്രവര്‍ത്തനങ്ങള്‍ക്ക് 36 കോടിയും വിള പരിപാലനത്തിന് 535.9 കോടിയും നീക്കിവച്ചതായി ധനമന്ത്രി അറിയിച്ചു. 2.36 ലക്ഷം തൊഴിലവസരങ്ങള്‍ കാര്‍ഷിക മേഖലയില്‍ സൃഷ്ടിക്കാന്‍ സംസ്ഥാന സര്‍ക്കാരിന് സാധിച്ചെന്നും മന്ത്രി കെഎന്‍ ബാലഗോപാല്‍ കൂട്ടിച്ചേര്‍ത്തു.
കേരള കാലാവസ്ഥ പ്രതിരോധ കാര്‍ഷിക മൂല്യ ശൃംഖല ആധുനിക വത്കരണം എന്ന പുതിയ പദ്ധതി കാര്‍ഷിക മേഖലയില്‍ ആരംഭിക്കും. പദ്ധതിയിലൂടെ കാലാവസ്ഥയ്‌ക്ക് ഇണങ്ങുന്ന രീതിയില്‍ ഭക്ഷ്യകാര്‍ഷിക മേഖലയെ പ്രോത്സാഹിപ്പിക്കുകയാണ് ലക്ഷ്യം. 2365 കോടിയാണ് പദ്ധതിയില്‍ അഞ്ച് വര്‍ഷം കൊണ്ട് ചെലവിടാന്‍ ഉദ്ധേശിക്കുന്നത്.
ഫലവര്‍ഗ കൃഷിയുടെ വിസ്‌തൃതി വിപുലീകരിക്കുന്നതിന് 18.92 കോടിയാണ് വകയിരുത്തിയത്. ഇതിന്‍റെ 25 ശതമാനം ഗുണഭോക്താക്കളും സ്‌ത്രീകളായിരിക്കും. വിളകളുടെ ഉത്‌പാദനക്ഷമത വര്‍ധിപ്പിക്കാനായി കേരള ശാസ്‌ത്ര സാങ്കേതിക പരിസ്ഥിതി കൗണ്‍സിലിന് കീഴില്‍ ഇൻസ്റ്റിറ്റ്യൂട്ട് ഓഫ് അഡ്വാന്‍സ്‌ഡ് ക്രോപ് ബ്രീഡിങ് സ്ഥാപിക്കുമെന്നും മന്ത്രി അറിയിച്ചു.
വിള ആരോഗ്യ പരിപാലനത്തിനായി 13 കോടിയാണ് വകയിരുത്തിയിരിക്കുന്നത്. കുട്ടനാട്ടിലെ പെട്ടിയും പറയും സമ്പ്രദായത്തിനായി 36 കോടിയും കൃഷി ഉന്നതി യോജനയ്‌ക്ക് കീഴില്‍ സംസ്ഥാന വിഹിതമായി 77 കോടിയും വിളവെടുപ്പ് കഴിഞ്ഞുള്ള പരിപാലനത്തിനും മൂല്യവര്‍ധനത്തിനുമായി 8 കോടിയുമാണ് നീക്കിവച്ചതെന്നും മന്ത്രി അറിയിച്ചു. കാര്‍ഷിക വിളകളുടെ കാര്യക്ഷമമായ വിപണനം ഉറപ്പുവരുത്തുന്ന പദ്ധതികള്‍ക്കായി 43.90 കോടി രൂപയുമാണ് ബജറ്റില്‍ വകയിരുത്തിയിരിക്കുന്നത്.
