തിരുവനന്തപുരം : ഫോറിൻ മെഡിക്കൽ ഗ്രാജുവേറ്റ് എക്‌സാമിനേഷൻ (എഫ്എംജിഇ) പരീക്ഷയുടെ ചോദ്യപേപ്പറും ഉത്തരവും വിൽപ്പനയ്‌ക്കെന്ന് പ്രചാരണം. ടെലഗ്രാം ഗ്രൂപ്പിലൂടെയാണ് വാർത്ത പ്രചരിച്ചത്. സംഭവത്തിൽ ടെലഗ്രാം ഗ്രൂപ്പിൽ പരസ്യം ചെയ്‌ത സംഘങ്ങൾക്കെതിരെ തിരുവനന്തപുരം സിറ്റി സൈബർ ക്രൈം പൊലീസ് കേസ് രജിസ്‌റ്റർ ചെയ്‌തു.
വിദേശത്ത് എംബിബിഎസ് പഠനം പൂർത്തിയാക്കിയശേഷം ഇന്ത്യയിൽ പ്രാക്‌ടീസ് ചെയ്യാൻ ആഗ്രഹിക്കുന്നവർക്കായി നാഷണൽ ബോർഡ് ഓഫ് എക്‌സാമിനേഷൻ നടത്തുന്ന പരീക്ഷയാണ് എഫ്എംജിഇ. ജൂലൈ ആറിന് നടക്കുന്ന പരീക്ഷയുടെ ചോദ്യപേപ്പറും ഉത്തരങ്ങളും ആണ് വിൽപ്പനയ്ക്ക് എന്ന പേരിൽ ടെലഗ്രാം ഗ്രൂപ്പുകളിൽ പരസ്യം ചെയ്‌തത്. ദി പബ്ലിക് എക്‌സാമിനേഷൻ (പ്രിവൻഷൻ ഓഫ് അൺഫെയർ മീൻസ്) ആക്‌ട് 2024 പ്രകാരമാണ് ടെലഗ്രാം ഗ്രൂപ്പുകൾക്കെതിരെ കേസെടുത്തിരിക്കുന്നത്.
ദി പബ്ലിക് എക്‌സാമിനേഷൻ നിയമം ചുമത്തി സംസ്ഥാനത്ത് രജിസ്‌റ്റർ ചെയ്യുന്ന ആദ്യത്തെ കേസാണിത്. ഇത്തരം തട്ടിപ്പുകൾ കണ്ടെത്തുന്നതിന്‍റെ ഭാഗമായി വിവിധ ടെലഗ്രാം ചാനലുകൾ ഉൾപ്പെടെയുള്ള സാമൂഹ്യ മാധ്യമങ്ങളിൽ 24 മണിക്കൂറും സൈബർ പട്രോളിങ് ആരംഭിച്ചതായി പൊലീസ് സൈബർ ഡിവിഷൻ അറിയിച്ചു.
Also Read: ടെലഗ്രാമില്‍ പരിചയപ്പെട്ട യുവതിയെ കബളിപ്പിച്ച് 10.30 ലക്ഷം തട്ടി; മൂന്ന് പേർ പിടിയിൽ
