എറണാകുളം: മുന്‍ എക്സൈസ് മന്ത്രിയും തൃപ്പൂണിത്തുറ എംഎൽഎയുമായ കെ.ബാബുവിന്‍റെ സ്വത്ത് കണ്ടുകെട്ടി ഇഡി. 25.82 ലക്ഷം രൂപയുടെ സ്വത്താണ് എൻഫോഴ്സ്മെൻ്റ് ഡയറക്‌ടറേറ്റ് (ഇഡി) കണ്ടുകെട്ടിയത്. അനധികൃത സ്വത്ത് സമ്പാദന കേസിലാണ് ഇഡിയുടെ നടപടി. കെ.ബാബു എക്സൈസ് മന്ത്രിയായിരുന്ന കാലത്ത് അനധികൃതമായി സ്വത്ത് സമ്പാദിച്ചുവെന്ന ഇഡിയുടെ കണ്ടെത്തലിന് പിന്നാലെയാണ് നടപടി.
അനധികൃത സ്വത്ത് സമ്പാദന കേസില്‍ അന്വേഷണം പുരോഗമിക്കുന്നതായും ഇഡി വ്യക്തമാക്കി. കെ ബാബുവിനെതിരായ അനധികൃത സ്വത്ത് സമ്പാദന കേസില്‍ വിജിലന്‍സ് എഫ്‌ഐആറിന്‍റെ അടിസ്ഥാനത്തിലായിരുന്നു ഇഡി അന്വേഷണം തുടങ്ങിയത്. കേസുമായി ബന്ധപ്പെട്ട് കെ.ബാബുവിനെ നേരത്തെ ഇഡി ചോദ്യം ചെയ്‌തിരുന്നു. മൂവാറ്റുപുഴ വിജിലന്‍സ് കോടതിയില്‍ വിജിലൻസ് സമര്‍പ്പിച്ച അന്തിമ റിപ്പോര്‍ട്ടിലെ കണ്ടെത്തലുകള്‍ ഇഡി ശരിവയ്‌ക്കുകയായിരുന്നു. തുടര്‍ന്നാണ് നടപടി.
