ന്യൂഡല്‍ഹി : ഐപിഎല്‍ പതിനേഴാം പതിപ്പില്‍ ഏറ്റവും അപകടകാരികളായ ഓപ്പണിങ് ജോഡി ആരെന്ന ചോദ്യത്തിന് നിസംശയം പറയാൻ സാധിക്കുന്ന ഉത്തരമാണ് സണ്‍റൈസേഴ്‌സ് ഹൈദരാബാദിന്‍റെ ട്രാവിസ് ഹെഡ്-അഭിഷേക് ശര്‍മ എന്നിവരുടെ പേരുകള്‍. ഓറഞ്ച് പട കളത്തിലിറങ്ങുന്ന ഓരോ മത്സരങ്ങളിലും ഇരുവരും ചേര്‍ന്ന് ടീമിന് സമ്മാനിക്കുന്നത് അതിഗംഭീര തുടക്കമാണ്. സീസണില്‍ ഹൈദരാബാദിനായി നാല് മത്സരങ്ങളില്‍ മാത്രം ഇന്നിങ്സ് ഓപ്പണ്‍ ചെയ്‌ത ഹെഡ്-അഭിഷേക് ശര്‍മ സഖ്യം ഇതുവരെ 312 റണ്‍സ് സ്കോര്‍ ചെയ്‌തിട്ടുണ്ട്.
സീസണില്‍ ഇതുവരെയുള്ള ഏഴ് മത്സരങ്ങളിലും തങ്ങളുടെ ടീമിനായി ഇന്നിങ്സ് ഓപ്പണ്‍ ചെയ്‌തിട്ടുള്ള വിരാട് കോലി-ഫാഫ് ഡുപ്ലെസിസ്, രോഹിത് ശര്‍മ-ഇഷാൻ കിഷൻ ജോഡികളാണ് നിലവില്‍ ഹെഡിനും അഭിഷേകിനും മുകളില്‍ ഈ പട്ടികയില്‍ ഉള്ളത്. ഏഴ് ഇന്നിങ്‌സിലെ 36.2 ഓവറില്‍ നിന്നും 343 റണ്‍സാണ് ആര്‍സിബി ഓപ്പണര്‍മാരായ കോലിയും ഡുപ്ലെസിസും ഇതുവരെ ഒന്നാം വിക്കറ്റില്‍ നേടിയത്. ഇരുവരും ചേര്‍ന്ന് ഓരോ തവണയാണ് സെഞ്ച്വറി, അര്‍ധസെഞ്ച്വറി കൂട്ടുകെട്ടുകളുടെ ഭാഗമായത്.
9.44 റണ്‍റേറ്റിലാണ് ഇരുവരും ആര്‍സിബിക്കായി റണ്‍സ് കണ്ടെത്തുന്നത്. 326 റണ്‍സാണ് പട്ടികയില്‍ രണ്ടാം സ്ഥാനക്കാരായ മുംബൈ ഇന്ത്യൻസിന്‍റെ രോഹിത് ശര്‍മ - ഇഷാൻ കിഷൻ ജോഡി അടിച്ചെടുത്തിട്ടുള്ളത്. 10.86 റണ്‍റേറ്റില്‍ സ്കോര്‍ ചെയ്യുന്ന ഇരുവര്‍ക്കും ഏഴ് മത്സരങ്ങളില്‍ നിന്നും ഇത്രയം റണ്‍സിലേക്ക് എത്താൻ വേണ്ടി വന്നത് 30 ഓവറുകളാണ്. ഒരു പ്രാവശ്യം സെഞ്ച്വറി കൂട്ടുകെട്ട് ഉണ്ടാക്കിയ സഖ്യം മൂന്ന് അര്‍ധസെഞ്ച്വറി കൂട്ടുകെട്ടും ഏഴ് ഇന്നിങ്‌സില്‍ നിന്നും നേടിയിട്ടുണ്ട്.
ഇനി ട്രാവിസ് ഹെഡ് - അഭിഷേക് ശര്‍മ ജോഡിയിലേക്ക് വരാം. വെറും നാല് ഇന്നിങ്സുകള് കൊണ്ടാണ് ഇരുവരും ഐപിഎല്‍ പതിനേഴാം പതിപ്പില്‍ കൂടുതല്‍ റണ്‍സ് നേടിയ ഓപ്പണിങ് ജോഡിയുടെ പട്ടികയില്‍ മൂന്നാം സ്ഥാനത്തേക്ക് എത്തിയത്. നാല് ഇന്നിങ്‌സുകളില്‍ നിന്നും ഇരുവരും ചേര്‍ന്ന് ആകെ നേരിട്ടത് വെറും 20.3 ഓവറുകള്‍ മാത്രമാണ്. 15.21 റണ്‍റേറ്റില്‍ റണ്‍സ് അടിച്ചുകൂട്ടുന്ന സഖ്യം രണ്ട് സെഞ്ച്വറി കൂട്ടുകെട്ടുകളുടെയും ഭാഗമായി.
വ്യക്തിഗതമായി പരിശോധിച്ചാല്‍ ഐപിഎല്‍ പതിനേഴാം പതിപ്പില്‍ സണ്‍റൈസേഴ്‌സ് ഹൈദരാബാദിനായി കൂടുതല്‍ റണ്‍സ് നേടിയ താരങ്ങളുടെ പട്ടികയില്‍ ആദ്യ മൂന്നില്‍ തന്നെയാണ് ഇരുവരുടെയും സ്ഥാനം. ഈ സീസണിലെ റണ്‍വേട്ടക്കാരില്‍ രണ്ടാമനാണ് ട്രാവിസ് ഹെഡ്. ആറ് കളിയില്‍ നിന്നും 216 പ്രഹരശേഷിയില്‍ 324 റണ്‍സാണ് ഹെഡ് അടിച്ചെടുത്തിട്ടുള്ളത്. 18 സിക്‌സറുകളും 39 ബൗണ്ടറികളുമാണ് ഇതുവരെ ഹെഡിന്‍റെ ബാറ്റില്‍ നിന്നും പിറന്നത്.
മറുവശത്ത്, ഏഴ് മത്സരങ്ങളില്‍ നിന്നും 257 റണ്‍സാണ് അഭിഷേക് ശര്‍മയുടെ സമ്പാദ്യം. 215 പ്രഹരശേഷിയില്‍ ബാറ്റ് വീശുന്ന താരം 24 സിക്‌സറുകള്‍ ഗാലറിയിലേക്ക് എത്തിച്ചപ്പോള്‍ 18 ഫോറും ഇതുവരെ നേടിയിട്ടുണ്ട്.
