ജയ്‌പൂര്‍: ഇന്ത്യന്‍ പ്രീമിയര്‍ ലീഗിന്‍റെ (IPL 2024) പുതിയ സീസണിനായി ആകാംക്ഷയോടെ കാത്തിരിക്കുയാണ് ആരാധകര്‍. ഇതിന് ആവേശം കൂട്ടി തങ്ങളുടെ പുത്തന്‍ ജഴ്‌സി പുറത്ത് വിട്ടിരിക്കുകയാണ് മലയാളി താരം സഞ്ജു സാംസണ്‍ (Sanju Samson) നായകനായ രാജസ്ഥാൻ റോയൽസ് (Rajasthan Royals ). തങ്ങളുടെ സിഗ്നേച്ചർ പിങ്ക്, നീല നിറങ്ങള്‍ നിലനിര്‍ത്തിയ രാജസ്ഥാന് മുൻ സീസണിലെ ജഴ്‌സിയില്‍ നേരിയ മാറ്റം മാത്രമാണ് വരുത്തിയിരിക്കുന്നത്.
രാജസ്ഥാനിലെ യോദ്ധാക്കളുടെ പോരാട്ടവീര്യത്തിനുള്ള ട്രിബ്യൂട്ടാണ് പുതിയ ജഴ്‌സി. രാജസ്ഥാന്‍റെ സംസ്‌കാരം, രാജസ്ഥാനി സ്‌ത്രീകളുടെ പരമ്പരാഗത വസ്‌ത്രധാരണ രീതി, വാസ്‌തു വിദ്യ തുടങ്ങിവയില്‍ നിന്നാണ് പ്രചോദനം. തങ്ങളുടെ സോഷ്യല്‍ മീഡിയ അക്കൗണ്ടിലൂടെ രസരകമായ ഒരു വീഡിയോയിലൂടെയാണ് ഫ്രാഞ്ചൈസി തങ്ങളുടെ പുത്തന്‍ ജഴ്‌സി ആരാധകര്‍ക്ക് മുന്നിലേക്ക് എത്തിച്ചിരിക്കുന്നത്. ഐപിഎല്‍ ചരിത്രത്തിലെ തന്നെ ഏറ്റവും വലിയ വിക്കറ്റ് വേട്ടക്കാരനായ യുസ്‌വേന്ദ്ര ചാഹലാണ് (Yuzvendra Chahal) വീഡിയോയില്‍ പ്രധാന കഥാപാത്രമായി അഭിനയിച്ചിരിക്കുന്നത്.
ചാഹല്‍ ഒരു കളര്‍ഫുള്‍ ജഴ്‌സി തയ്യാറാക്കുന്നതാണ് വീഡിയോയില്‍ കാണാന്‍ കഴിയുന്നത്. എന്നാല്‍ മറ്റുള്ളവര്‍ ഇതു നിരസിക്കുകയും പിന്നീട് ടീമിന്‍റെ പുതിയ ജഴ്‌സി നല്‍കുന്നതുമാണ് വീഡിയോയിലുള്ളത്. കഴിഞ്ഞ സീസണില്‍ തുടക്കം മിന്നിക്കാന്‍ രാജസ്ഥാന് കഴിഞ്ഞിരുന്നു. ആദ്യ അഞ്ച് മത്സരങ്ങളിലും ടീം വിജയം നേടി.
എന്നാല്‍ പിന്നീട് കളിച്ച എട്ട് മത്സരങ്ങളില്‍ മൂന്ന് വിജയം മാത്രം നേടാന്‍ കഴിഞ്ഞ ടീമിന് പോയിന്‍റ് ടേബിളില്‍ അഞ്ചാം സ്ഥാനത്താണ് ഫിനിഷ് ചെയ്യാന്‍ കഴിഞ്ഞത്. 14 മത്സരങ്ങളില്‍ നിന്നും ഏഴ്‌ വിജയം നേടിയ രാജസ്ഥാന് 14 പോയിന്‍റുകളാണുണ്ടായിരുന്നത്. അതേസമയം മാര്‍ച്ച് 22-ന് തുടങ്ങുന്ന ഐപിഎല്ലില്‍ 24-നാണ് രാജസ്ഥാന് ആദ്യ മത്സരം കളിക്കുക.
തട്ടകമായ ജയ്‌പൂരില്‍ ലഖ്നൗ സൂപ്പര്‍ ജയന്‍റ്‌സാണ് എതിരാളി. രാജ്യത്ത് പൊതു തെരഞ്ഞെടുപ്പ് (Lok Sabha Election 2024) നടക്കാനിരിക്കുന്ന സാഹചര്യത്തില്‍ രണ്ട് ഘട്ടങ്ങളിലായാണ് ഐപിഎല്‍ അരങ്ങേറുന്നത്. നിലവില്‍ ഏപ്രില്‍ 7 വരെയുള്ള ആദ്യ 15 ദിസങ്ങളുടെ മത്സര ക്രമമണാണ് നിലവില്‍ ഐപിഎല്‍ അധികൃതര്‍ പുറത്ത് വിട്ടിരിക്കുന്നത്.
രാജസ്ഥാന് റോയല്‍സ് സ്ക്വാഡ്: സഞ്ജു സാംസൺ (ക്യാപ്റ്റന്‍), ജോസ് ബട്‌ലർ, ആര്‍ അശ്വിൻ, ഷിമ്രോണ്‍ ഹെറ്റ്‌മെയർ, യുസ്‌വേന്ദ്ര ചാഹൽ, യശസ്വി ജയ്‌സ്വാൾ, ധ്രുവ് ജുറെൽ, റിയാൻ പരാഗ്, ഡൊനോവൻ ഫെരേര, കുനാൽ റാത്തോഡ്,കുൽദീപ് സെൻ, നവ്ദീപ് സൈനി, പ്രസിദ്ധ് കൃഷ്‌ണ, സന്ദീപ് ശർമ, ട്രെന്‍റ്‌ ബോൾട്ട്, ആദം സാംപ , അവേഷ് ഖാൻ, റോവ്മാൻ പവൽ, ശുഭം ദുബെ, ടോം കോഹ്‌ലർ കാഡ്‌മോർ, ആബിദ് മുഷ്‌താഖ്, നാന്ദ്രെ ബർഗർ.
