ഹൈദരാബാദ്: ആളുകള്‍ക്ക് തങ്ങളുടെ ആശങ്കങ്ങളും കഴിവുകളും മറ്റുള്ളവര്‍ക്ക് മുന്നില്‍ പ്രദര്‍ശിപ്പിക്കുന്നതിനുള്ള വേദിയാണ് സോഷ്യല്‍ മീഡിയ. എന്നാല്‍ ഇതിനെ തോന്നുംപടി ഉപയോഗപ്പെടുത്തുന്നവരും കുറവല്ല. ഇപ്പോഴിതാ സോഷ്യല്‍ മീഡിയയില്‍ തനിക്ക് നേരിടേണ്ടി വന്ന വംശീയാധിക്ഷേപത്തിന് മറുപടിയുമായി രംഗത്ത് എത്തിയിരിക്കുകയാണ് ഇന്ത്യയുടെ (Indian Cricket Team) മുന്‍ താരം ലക്ഷ്‌മൺ ശിവരാമകൃഷ്ണൻ (Laxman Sivaramakrishnan). സോഷ്യല്‍ മീഡിയ പ്ലാറ്റ്‌ഫോമായ എക്‌സില്‍ താരം തന്‍റെ ഒരു ചിത്രം പോസ്റ്റ് ചെയ്‌തതാണ് സംഭവത്തിന് തുടക്കം.
തമിഴ്‌നാട്ടിലെ മഹാലിംഗപുരത്തുള്ള അയ്യപ്പ ക്ഷേത്രത്തിന് സമീപത്ത് നിന്നും എടുത്ത ഒരു സെല്‍ഫിയായിരുന്നുവിത്. ഒരു ആനയുടെ രൂപത്തിന് മുന്നില്‍ നിന്നായിരുന്നു 58-കാരന്‍റെ സെല്‍ഫി. എന്നാല്‍ താരത്തെ വംശീയമായി അധിക്ഷേപിച്ചുകൊണ്ട് 'രാത്രിയാവുമ്പോള്‍ പിന്നിലുള്ള ആനയെ നിങ്ങളേക്കാൾ കൂടുതൽ വ്യക്തമായി കാണാം' എന്നായിരുന്നു ഇതിന് ഒരാള്‍ കമന്‍റിട്ടത്. 'അതെ ഞാന്‍ കറുത്തവനാണ്'- എന്നായിരുന്നു ഇയാള്‍ക്ക് ലക്ഷ്‌മൺ ശിവരാമകൃഷ്ണന്റെ മറുപടി.
അതേസമയം ഇന്ത്യന്‍ സ്‌പിന്നര്‍ ആര്‍ അശ്വിനെ വിമര്‍ശിച്ച് അടുത്തിടെ ലക്ഷ്‌മൺ ശിവരാമകൃഷ്ണൻ വാര്‍ത്തയില്‍ ഇടം നേടിയിരുന്നു. കരിയറില്‍ 100-ാം ടെസ്റ്റിന് മുന്നെ ആശംസ നേരുന്നതിനായി അശ്വിനെ (R Ashwin) ഫോണില്‍ പലതവണ വിളിച്ചുവെങ്കിലും താരം തന്‍റെ കോള്‍ കട്ട് ചെയ്‌തുവെന്നായിരുന്നു ലക്ഷ്‌മൺ ശിവരാമകൃഷ്ണൻ ആരോപിച്ചത്.
പിന്നീട് മെസേജ് അയച്ചപ്പോള്‍ അതിന് മറുപടി ലഭിച്ചില്ലെന്ന് പറഞ്ഞ 58-കാരന്‍ കടുത്ത വിമര്‍ശനമായിരുന്നു അശ്വിനെതിരെ എക്‌സില്‍ നടത്തിയത്. ഇതു സംബന്ധിച്ച് ലക്ഷ്‌മൺ ശിവരാമകൃഷ്ണന്റെ എക്‌സ് പോസ്റ്റ് ഇങ്ങനെ... "നൂറാം ടെസ്റ്റിന് ആശംസകൾ അറിയിക്കാൻ നിരവധി തവണ അശ്വിനെ വിളിക്കാൻ ശ്രമിച്ചു. എന്നാല്‍ എന്‍റെ കോൾ കട്ട് ചെയ്യുകയാണ് ഉണ്ടായത്. പിന്നീട് മെസേജ് അയച്ചെങ്കിലും അതിന് മറുപടിയും ലഭിച്ചില്ല. മുന്‍ ക്രിക്കറ്റര്‍മാരായ ഞങ്ങള്‍ക്ക് ലഭിക്കുന്ന ബഹുമാനം ഇതാണ്" - ലക്ഷ്‌മണ്‍ ശിവരാമകൃഷ്‌ണന്‍ എഴുതി.
ഇംഗ്ലണ്ടിനെതിരായ അഞ്ചാം ടെസ്റ്റായിരുന്നു ആര്‍ അശ്വിന്‍റെ കരിയറിലെ 100-ാം ടെസ്റ്റ്. മത്സരത്തിന് ഇറങ്ങിയതോടെ ഇന്ത്യയ്‌ക്കായി 100 ടെസ്റ്റുകള്‍ കളിക്കുന്ന മൂന്നാമത്തെ സ്പിന്നറും 14-ാമത്തെ താരവുമായി ആര്‍ അശ്വിന്‍ മാറി. ധര്‍മ്മശാലയില്‍ നടന്ന അഞ്ചാം ടെസ്റ്റും വിജയിച്ചതോടെ ഇംഗ്ലണ്ടിനെതിരായ പരമ്പര 4-1ന് സ്വന്തമാക്കാന്‍ ഇന്ത്യയ്‌ക്ക് കഴിയുകയും ചെയ്‌തു. ബാസ്‌ ബോള്‍ യുഗത്തില്‍ ഇംഗ്ലണ്ടിന് നഷ്‌ടമാവുന്ന ആദ്യ പരമ്പരയായിരുന്നുവിത്.
