പിഎസ്‌ജിയോട് 'ബൈ' പറയാന്‍ കിലിയന്‍ എംബാപ്പെ, തീരുമാനം ഔദ്യോഗികമായി ക്ലബിനെ അറിയിച്ചെന്ന് റിപ്പോര്‍ട്ട്

ക്ലബ് വിടാനുള്ള താത്‌പര്യം കിലിയൻ എംബാപ്പെ പിഎസ്‌ജിയെ ഔദ്യോഗികമായി അറിയിച്ചു.

പാരിസ് : സീസണ്‍ അവസാനത്തോടെ ക്ലബ് വിടുന്ന കാര്യം പിഎസ്‌ജിയെ (PSG) ഔദ്യോഗികമായി അറിയിച്ച് ഫ്രഞ്ച് സൂപ്പര്‍ താരം കിലിയന്‍ എംബാപ്പെ (Kylian Mbappe). നിലവില്‍ സീസണ്‍ അവസാനിക്കുന്നത് വരെയാണ് എംബാപ്പെയ്‌ക്ക് പിഎസ്‌ജിയുമായി കരാറുള്ളത്. കരാര്‍ അവസാനിക്കുന്നതോടെ ഫ്രീ ഏജന്‍റായി ക്ലബ് വിടാനുള്ള നീക്കത്തിലാണ് നിലവില്‍ താരം.

ക്ലബ് വിടാനുള്ള കിലിയന്‍ എംബാപ്പെയുടെ തീരുമാനം വരും ദിവസങ്ങളില്‍ ഔദ്യോഗിക പ്രസ്‌താവനയിലൂടെ പിഎസ്‌ജി അറിയിക്കുമെന്നാണ് റിപ്പോര്‍ട്ട്. 2017ല്‍ വായ്‌പ അടിസ്ഥാനത്തില്‍ മൊണോക്കോയില്‍ നിന്നാണ് എംബാപ്പെ പിഎസ്‌ജിയിലേക്ക് എത്തുന്നത്. തൊട്ടടുത്ത വര്‍ഷം തന്നെ താരത്തെ ക്ലബ് സ്വന്തമാക്കുകയും ചെയ്‌തിരുന്നു.

പിഎസ്‌ജിക്കായി 290 മത്സരങ്ങളില്‍ നിന്നും 243 ഗോളും 90 അസിസ്റ്റുകളുമാണ് എംബാപ്പെ ഇതുവരെ നേടിയിട്ടുള്ളത് (Kylian Mbappe Stats In PSG). അഞ്ച് ലീഗ്-1 കിരീടങ്ങളും പിഎസ്‌ജിയ്‌ക്കൊപ്പം എംബാപ്പെ നേടിയിട്ടുണ്ട്.

അതേസമയം, പിഎസ്‌ജിയില്‍ നിന്നും കിലിയന്‍ എംബാപ്പെ ഏത് ക്ലബിലേക്ക് ചേക്കേറുമെന്ന കാര്യത്തില്‍ ഇപ്പോഴും അവ്യക്തത തുടരുകയാണ്. സ്‌പാനിഷ് വമ്പന്മാരായ റയല്‍ മാഡ്രിഡിലേക്കാണ് (Real Madrid) താരത്തിന്‍റെ കൂടുമാറ്റമെന്നാണ് പൊതുവെയുള്ള സംസാരം. കഴിഞ്ഞ കുറച്ച് സീസണുകളിലായി എംബാപ്പെയെ കൂടാരത്തിലെത്താക്കാനായി കിണഞ്ഞ് പരിശ്രമിക്കുകയാണ് റയല്‍.

റയല്‍ മാഡ്രിഡും കിലിയന്‍ എംബാപ്പെയും (Kylian Mbappe Real Madrid Transfer) തമ്മില്‍ ചര്‍ച്ചകള്‍ ആരംഭിച്ചിട്ടുണ്ടെന്നും റിപ്പോര്‍ട്ടുകളുണ്ട്. 2022ല്‍ നല്‍കിയ മുന്നിലേക്ക് വച്ച കരാര്‍ തുകയേക്കാള്‍ കുറഞ്ഞ ഓഫറുമായാണ് റയല്‍ നിലവില്‍ താരത്തെ സമീപിച്ചിരിക്കുന്നതെന്നാണ് വിവരം. അന്ന് എംബാപ്പെയെ ക്ലബില്‍ എത്തിക്കുന്നതിന് അരികില്‍ വരെ റയല്‍ മാഡ്രിഡ് എത്തിയിരുന്നതായിരുന്നു.

എന്നാല്‍, നാടകീയ സംഭവങ്ങള്‍ക്കൊടുവില്‍ താരം പിഎസ്‌ജിയുമായി കരാര്‍ പുതുക്കുകയാണ് ഉണ്ടായത്. രണ്ട് വര്‍ഷത്തേക്കായിരുന്നു താരം കരാര്‍ നീട്ടിയത്. അതിനിടെ സൗദി അറേബ്യന്‍ ക്ലബ് അല്‍ ഹിലാല്‍ റെക്കോഡ് തുകയുടെ ഓഫറുമായി എംബാപ്പെയെ സമീപിച്ചെങ്കിലും താരം ഇത് നിരസിക്കുകായായിരുന്നു.

അതേസമയം, കിലിയന്‍ എംബാപ്പെ റയല്‍ മാഡ്രിഡിലേക്ക് എത്തിയില്ലെങ്കില്‍ ക്ലബ് പ്ലാന്‍ ബിയായി മാഞ്ചസ്റ്റര്‍ സിറ്റിയില്‍ നിന്നും എര്‍ലിങ് ഹാലന്‍ഡിനെ (Erling Haaland) സ്വന്തമാക്കാനും പദ്ധതിയിടുന്നുണ്ടെന്നാണ് സ്‌പാനിഷ് മാധ്യമങ്ങള്‍ റിപ്പോര്‍ട്ട് ചെയ്യുന്നത്. ഫിനാൻഷ്യൽ ഫെയർ പ്ലേ നിയമങ്ങൾ അനുസരിച്ച് എംബാപ്പെയേയും ഹാലന്‍ഡിനേയും ഒരുമിച്ച് സ്വന്തമാക്കാന്‍ റയലിന് സാധിക്കില്ല.