റാഞ്ചി : ഇംഗ്ലണ്ടിനെതിരായ നാലാം ടെസ്റ്റില്‍ (India vs England 4th Test) ഇന്ത്യയ്‌ക്ക് 192 റണ്‍സിന്‍റെ വിജയ ലക്ഷ്യം. ആദ്യ ഇന്നിങ്‌സില്‍ 46 റണ്‍സിന്‍റെ ലീഡുമായി രണ്ടാം ഇന്നിങ്‌സിന് ഇറങ്ങിയ ഇംഗ്ലണ്ട് 145 റണ്‍സില്‍ ഓള്‍ഔട്ടായി. ഇന്ത്യന്‍ സ്‌പിന്നര്‍മാരാണ് സന്ദര്‍ശകരെ എറിഞ്ഞിട്ടത്. ആര്‍ അശ്വിന്‍ (R Ashwin) അഞ്ച് വിക്കറ്റുകള്‍ വീഴ്‌ത്തിയപ്പോള്‍ കുല്‍ദീപ് യാദവ് (Kuldeep Yadav) നാല് വിക്കറ്റുകള്‍ വീഴ്‌ത്തി. രവീന്ദ്ര ജഡേജയ്‌ക്ക് ഒരു വിക്കറ്റുണ്ട്.
അര്‍ധ സെഞ്ചുറി നേടിയ സാക്ക് ക്രൗവ്‌ലിയാണ് ഇംഗ്ലണ്ടിന്‍റെ ടോപ് സ്‌കോറര്‍. 91 പന്തില്‍ 60 റണ്‍സാണ് താരം നേടിയത്. മൂന്ന് വിക്കറ്റ് നഷ്‌ടത്തില്‍ 110 റണ്‍സിലേക്ക് എത്തിയതിന് ശേഷമാണ് ഇംഗ്ലണ്ട് തകര്‍ന്നടിഞ്ഞത്. ആദ്യ ഇന്നിങ്‌സില്‍ ലീഡ് നേടിയതിന്‍റെ ആത്മവിശ്വാസത്തിലായിരുന്നു സന്ദര്‍ശകര്‍ രണ്ടാം ഇന്നിങ്‌സിന് ഇറങ്ങിയത്. എന്നാല്‍ തുടക്കം തന്നെ തുടര്‍പ്രഹരം നല്‍കിയ ആര്‍ അശ്വിന്‍ ടീമിനെ ഞെട്ടിച്ചു.
അശ്വിന്‍ എറിഞ്ഞ അഞ്ചാം ഓവറില്‍ ബെന്‍ ഡക്കറ്റും (15), ഒല്ലി പോപ്പും (0) പുറത്ത്. പിന്നാലെ തന്നെ ആദ്യ ഇന്നിങ്‌സിലെ സെഞ്ചുറിക്കാരന്‍ ജോ റൂട്ടിനേയും (11) അശ്വിന്‍ വീഴ്‌ത്തിയതോടെ ഇംഗ്ലണ്ട് 3-ന് 65 റണ്‍സ് എന്ന നിലയിലായി. തുടര്‍ന്ന് ഒന്നിച്ച സാക്ക് ക്രൗവ്‌ലിയും ജോണി ബെയര്‍സ്റ്റോയും പ്രത്യാക്രമണത്തിന് ശ്രമിച്ചു.
എന്നാല്‍ ക്രൗവ്‌ലിയുടെ കുറ്റിയിളക്കിയ കുല്‍ദീപ് യാദവ് ഇന്ത്യയ്‌ക്ക് ബ്രേക്ക് ത്രൂ നല്‍കി. ക്രൗവ്‌ലി മടങ്ങുമ്പോള്‍ 110 റണ്‍സായിരുന്നു സ്‌കോര്‍ ബോര്‍ഡിലുണ്ടായിരുന്നത്. തുടര്‍ന്നുള്ള ആറ് വിക്കറ്റില്‍ 35 റണ്‍സാണ് ഇംഗ്ലണ്ടിന് ചേര്‍ക്കാന്‍ കഴിഞ്ഞത്.
നായകന്‍ ബെന്‍ സ്റ്റോക്‌സ് (6) കുല്‍ദീപിന് മുന്നില്‍ വീണപ്പോള്‍ ബെയര്‍സ്റ്റോയുടെ ആക്രമണം (30) ജഡേജ അവസാനിപ്പിച്ചു. ടോം ഹാര്‍ട്‌ലി (7), ഒല്ലി റോബിന്‍സണ്‍ (0) എന്നിവര്‍ക്കും കുല്‍ദീപിന് മുന്നില്‍ പിടിച്ചുനില്‍ക്കാന്‍ കഴിഞ്ഞില്ല. ബെന്‍ ഫോക്‌സ് (17), ജയിംസ്‌ അന്‍ഡേഴ്‌സണ്‍ (0) എന്നിവരെ ഇരയാക്കിയ അശ്വിന്‍ അഞ്ച് വിക്കറ്റ് തികച്ച് ഇംഗ്ലീഷ് ഇന്നിങ്‌സിനും തിരശീലയിടുകയായിരുന്നു. ടെസ്റ്റില്‍ ഇത് 35-ാം തവണയാണ് അശ്വിന്‍ അഞ്ച് വിക്കറ്റ് നേട്ടം ആഘോഷിക്കുന്നത്.
ALSO READ: ചരിത്രത്തില്‍ ആദ്യം ; വമ്പന്‍ നേട്ടം സ്വന്തമാക്കി ആര്‍ അശ്വിന്‍
ഇന്ത്യ പ്ലെയിങ് ഇലവൻ : രോഹിത് ശര്‍മ (ക്യാപ്‌റ്റൻ), യശസ്വി ജയ്‌സ്വാള്‍, ശുഭ്‌മാൻ ഗില്‍, രജത് പടിദാര്‍, സര്‍ഫറാസ് ഖാൻ, രവീന്ദ്ര ജഡേജ, ധ്രുവ് ജുറെല്‍ (വിക്കറ്റ് കീപ്പര്‍), രവിചന്ദ്രൻ അശ്വിൻ, ആകാശ് ദീപ്, കുല്‍ദീപ് യാദവ്, മുഹമ്മദ് സിറാജ് (India Playing XI For 4th Test).
ഇംഗ്ലണ്ട് പ്ലെയിങ് ഇലവൻ : ബെൻ ഡക്കറ്റ്, സാക്ക് ക്രാവ്‌ലി, ഒല്ലി പോപ്പ്, ജോ റൂട്ട്, ബെൻ സ്റ്റോക്‌സ് (ക്യാപ്‌റ്റൻ), ജോണി ബെയര്‍സ്റ്റോ, ബെൻ ഫോക്‌സ് (വിക്കറ്റ് കീപ്പര്‍), ടോം ഹാര്‍ട്‌ലി, ഒലീ റോബിൻസണ്‍, ജെയിംസ് ആൻഡേഴ്‌സണ്‍, ഷൊയ്‌ബ് ബഷീര്‍ (England Playing XI For 4th Test Against India).
