ബെംഗളൂരു: ഐപിഎല്ലില്‍ ചെന്നൈ സൂപ്പര്‍ കിങ്‌സിനെ തകര്‍ത്ത് പ്ലേഓഫ് ബെര്‍ത്ത് ഉറപ്പിച്ചിരിക്കുകയാണ് റോയല്‍ ചലഞ്ചേഴ്‌സ് ബെംഗളൂരു. ചിന്നസ്വാമി സ്റ്റേഡിയത്തില്‍ നടന്ന മത്സരത്തില്‍ ചെന്നൈയ്‌ക്കെതിരെ 27 റണ്‍സിന്‍റെ ജയമായിരുന്നു ആര്‍സിബി സ്വന്തമാക്കിയത്. മത്സരത്തില്‍ ടോസ് നഷ്‌ടപ്പെട്ട് ആദ്യം ബാറ്റ് ചെയ്‌ത ബെംഗളൂരു നിശ്ചിത ഓവറില്‍ 218 റണ്‍സ് നേടുകയും മറുപടി ബാറ്റിങ്ങിന് ഇറങ്ങിയ ചെന്നൈയെ 191 റണ്‍സില്‍ എറിഞ്ഞൊതുക്കുകയുമായിരുന്നു.
ബാറ്റിങ്ങിലും ബൗളിങ്ങിലും ഫീല്‍ഡിങ്ങിലും മികവ് കാട്ടിയാണ് ആര്‍സിബി നിര്‍ണായക മത്സരത്തില്‍ ചെന്നൈയ്‌ക്കെതിരെ ജയം പിടിച്ചെടുത്തത്. വിരാട് കോലി, ക്യാപ്‌റ്റൻ ഫാഫ് ഡുപ്ലെസിസ്, രജത് പടിദാര്‍, കാമറൂണ്‍ ഗ്രീൻ, ദിനേശ് കാര്‍ത്തിക്, ഗ്ലെൻ മാക്‌സ്‌വെല്‍ അങ്ങനെ ബാറ്റ് ചെയ്യാൻ എത്തിയവരെല്ലാം തകര്‍ത്തടിച്ചു. ബൗളിങ്ങില്‍ രണ്ട് വിക്കറ്റ് വീഴ്‌ത്തുകയും അവസാന ഓവറില്‍ ചെന്നൈയ്‌ക്ക് പ്ലേഓഫ് യോഗ്യത നേടാൻ വേണ്ടിയിരുന്ന 18 റണ്‍സ് പ്രതിരോധിക്കുകയും ചെയ്‌ത യാഷ് ദയാല്‍ ആയിരുന്നു ഹീറോ.
അസാധ്യമെന്ന് തോന്നിപ്പിച്ച ഒരു ക്യാച്ച് പിടിച്ചെടുത്ത് ഫീല്‍ഡില്‍ താരമായത് നായകൻ ഫാഫ് ഡുപ്ലെസിസ് ആയിരുന്നു. ചെന്നൈയുടെ മിച്ചല്‍ സാന്‍റ്‌നറെ പുറത്താക്കുന്നതിനായാണ് ഡുപ്ലെസിസ് 'സൂപ്പര്‍മാനായി' കിടിലൻ ക്യാച്ച് പിടിച്ചെടുത്തത്. ചെന്നൈ ഇന്നിങ്‌സില്‍ മുഹമ്മദ് സിറാജ് എറിഞ്ഞ 15-ാം ഓവറിലെ അവസാന പന്തിലായിരുന്നു ഫാഫിന്‍റെ അത്ഭുത ക്യാച്ച്.
മുഹമ്മദ് സിറാജിന്‍റെ ലോ ഫുള്‍ടോസ് ആയ പന്ത് മിഡ് ഓഫിലൂടെ ബൗണ്ടറിയിലേക്ക് പായിക്കാനായിരുന്നു സാന്‍റ്‌നറുടെ ശ്രമം. പന്ത് കൃത്യമായി തന്നെ സാന്‍റ്‌നര്‍ കണക്‌ട് ചെയ്യുകയും ചെയ്‌തു. എന്നാല്‍, മിഡ് ഓഫില്‍ ഉണ്ടായിരുന്ന ഡുപ്ലെസിസ് ചാടി ഉയര്‍ന്ന് ഒറ്റക്കയ്യില്‍ പന്ത് പിടിച്ചെടുക്കുകയായിരുന്നു. ഇതോടെ മൂന്ന് റണ്‍സുമായിട്ടാണ് സാന്‍റ്‌നര്‍ മടങ്ങിയത്.
നേരത്തെ, ടോസ് നഷ്‌ടപ്പെട്ട് ആദ്യം ബാറ്റ് ചെയ്‌ത ആര്‍സിബിയ്‌ക്കായി 39 പന്തില്‍ 54 റണ്‍സായിരുന്നു ഫാഫ് ഡുപ്ലെസിസ് നേടിയത്. വിരാട് കോലിയ്‌ക്കൊപ്പം (47) ഒന്നാം വിക്കറ്റില്‍ 78 റണ്‍സായിരന്നു ഫാഫ് കൂട്ടിച്ചേര്‍ത്തത്. അര്‍ധസെഞ്ച്വറി നേടിയ ഡുപ്ലെസിസ് മത്സരത്തിന്‍റെ 13ാം ഓവറിലായിരുന്നു പുറത്തായത്.
ഡുപ്ലെസിസ് സാന്‍റ്‌നറുടെ പന്തില്‍ റണ്‍ഔട്ട് ആകുകയായിരുന്നു. രജത് പടിദാറിന്‍റെ സ്ട്രൈറ്റ് ഷോട്ട് സാന്‍റ്‌നറുടെ കൈ വിരലുകളില്‍ തട്ടി നോണ്‍ സ്ട്രൈക്കിങ് എൻഡിലെ സ്റ്റമ്പില്‍ ഇടിക്കുകയായിരുന്നു. ടിവി അമ്പയര്‍ വിശദമായ പരിശോധനയ്‌ക്ക് ശേഷം വിക്കറ്റ് നല്‍കിയെങ്കിലും ഡുപ്ലെസിസിന്‍റെ ബാറ്റ് ക്രീസില്‍ ഉണ്ടെന്നും ഇല്ലെന്നുമുള്ള വാദമാണ് ആരാധകര്‍ക്കിടയില്‍ നിന്നും ഉയര്‍ന്നത്.
