ഇന്ന് ലോക ഉത്‌പാദനക്ഷമത ദിനം: ജോലിയിൽ തിളങ്ങാനും ഉത്‌പാദനക്ഷമത കൂട്ടാനും ഈ വിദ്യകൾ പരീക്ഷിക്കാം - WORLD PRODUCTIVITY DAY

ആളുകളിൽ ഉത്‌പാദനക്ഷമത വർധിപ്പിക്കേണ്ടതിന്‍റെ ആവശ്യകത എന്തെന്നും അതിനായി ചെയ്യേണ്ട കാര്യങ്ങൾ എന്തെന്നും ഓർമിപ്പിക്കാനാണ് ജൂൺ 20ന് ലോകമെമ്പാടും ലോക ഉത്‌പാദനക്ഷമത ദിനമായി ആചരിക്കുന്നത്.

ഇന്ന് ലോക ഉത്‌പാദനക്ഷമത ദിനം. ലോകമെമ്പാടുമുള്ള ജനങ്ങളെ ഉത്‌പാദനക്ഷമതയുടെ പ്രാധാന്യം ഓർമപ്പെടുത്താനാണ് എല്ലാ വർഷവും ജൂൺ 20 ന് ലോക ഉത്‌പാദനക്ഷമത ദിനം ആചരിക്കുന്നത്. ഉൽപ്പാദനക്ഷമത എങ്ങനെ വർദ്ധിപ്പിക്കാമെന്ന് പഠിക്കാനുള്ള ഒരു ദിവസം കൂടിയാണിത്. ഒരു ഉത്‌പന്നത്തിന്‍റെയോ സേവനങ്ങളുടെയോ ഉത്‌പാദനത്തിന്‍റെ കാര്യക്ഷമതയെയാണ് ഉത്‌പാദനക്ഷമത എന്നു പറയുന്നത്. എല്ലാ തൊഴിലുടമകളും തങ്ങളുടെ തൊഴിലാളികൾ ഉത്‌പാദനക്ഷമതയുള്ളവരായിരിക്കാൻ ആഗ്രഹിക്കുന്നവരാണ്. ജോലിയിലും ജീവിതത്തിലും ശോഭിക്കണമെങ്കിൽ ഒരു വ്യക്തി ഉത്‌പാദനക്ഷമതയുള്ള ഒരാളായിരിക്കേണ്ടതുണ്ട്.

എന്താണ് ഉത്‌പാദനക്ഷമത?

ഉത്‌പാദനക്ഷമത എന്നതിനെ പല തരത്തിൽ വ്യാഖ്യാനിക്കാവുന്നതാണ്. നമ്മുടെ ലക്ഷ്യങ്ങൾ കാര്യക്ഷമമായും ഫലപ്രദമായും പൂർത്തിയാക്കാനുള്ള കഴിവാണ് ഉത്‌പാദനക്ഷമത എന്നതുകൊണ്ട് അർത്ഥമാക്കുന്നത്. ഉത്‌പാദനക്ഷമത എന്നത് തികച്ചും വ്യക്തിഗതമാണ്. കാരണം ഉത്‌പാദനക്ഷമത നിലനിർത്താൻ എല്ലാവർക്കും വ്യത്യസ്‌തമായ കാര്യങ്ങളാണ് ആവശ്യമുള്ളത്. ഒരു വ്യക്തിക്ക് അവരുടെ ജോലിയിലും ജീവിതത്തിലും തിളങ്ങാൻ ഉത്‌പാദനക്ഷമത ആവശ്യമാണ്.