മോസ്‌കോ: ലിംഗമാറ്റ ശസ്‌ത്രക്രിയ അനുവദിച്ചിട്ടുള്ള രാജ്യങ്ങളിലേക്ക് റഷ്യയില്‍ നിന്നുള്ള കുട്ടികളെ ദത്തെടുക്കുന്നത് നിരോധിക്കുന്ന നിയമത്തില്‍ പ്രസിഡന്‍റ് വ്ലാഡിമര്‍ പുട്ടിന്‍ ഒപ്പു വച്ചു. കുട്ടികള്‍ വേണ്ടെന്ന് തീരുമാനിക്കുന്ന ദമ്പതിമാര്‍ക്ക് പ്രോത്സാഹനം നല്‍കുന്ന എല്ലാത്തരം പ്രവര്‍ത്തനങ്ങള്‍ക്കും റഷ്യ നിരോധനം ഏര്‍പ്പെടുത്തി. റഷ്യന്‍ പാര്‍ലമെന്‍റിന്‍റെ ഇരുസഭകളും നേരത്തെ തന്നെ ഈ നിയമത്തിന് അംഗീകാരം നല്‍കിയിരുന്നു.
ലൈംഗിക ന്യൂനപക്ഷങ്ങളെ അടിച്ചമര്‍ത്തുന്ന നിരവധി നിയമങ്ങള്‍ക്ക് പിന്നാലെയാണ് ഇത്തരമൊരു നിയമത്തിനും റഷ്യ രൂപം നല്‍കിയിട്ടുള്ളത്. ഇതോടെ രാജ്യത്ത് ദീര്‍ഘകാലമായി തുടരുന്ന പരമ്പരാഗത മൂല്യങ്ങള്‍ അരക്കിട്ടുറപ്പിക്കുക കൂടിയാണ് റഷ്യ.
ദത്തെടുക്കപ്പെടുന്ന കുട്ടികള്‍ അഭിമുഖീകരിക്കേണ്ടി വരുന്ന ലിംഗമാറ്റത്തിന്‍റെ സാധ്യമായ എല്ലാ അപകടങ്ങളും ഇല്ലാതാക്കുക എന്നത് വളരെ പ്രധാനമാണെന്ന് പുത്തന്‍ നിയമം തയാറാക്കിയവരിലൊരാളായ റഷ്യന്‍ പാര്‍ലമെന്‍റിന്‍റെ അധോസഭയുടെ സ്‌പീക്കര്‍ വ്യാചെസ്‌ലേവ് വൊളോഡിന്‍ ടെലിഗ്രാം പോസ്റ്റില്‍ പറഞ്ഞു.
ഇടിവി ഭാരത് കേരള വാട്‌സ്‌ആപ്പ് ചാനലില്‍ ജോയിന്‍ ചെയ്യാം
പതിനഞ്ച് രാജ്യങ്ങള്‍ക്കാണ് ദത്തെടുക്കല്‍ നിരോധനം ബാധകമാകുക. അവയിലേറെയും യൂറോപ്പില്‍ നിന്നുള്ളവയാണ്. പിന്നാലെ ഓസ്‌ട്രേലിയ, അര്‍ജന്‍റീന, കാനഡ എന്നിവയുമുണ്ട്. അമേരിക്കന്‍ പൗരന്‍മാര്‍ റഷ്യന്‍ കുട്ടികളെ ദത്തെടുക്കുന്നത് 2012ല്‍ തന്നെ നിരോധിച്ചിരുന്നു.
കുട്ടികള്‍ വേണ്ടെന്ന് വയ്ക്കല്‍ നടപടി പ്രചരിപ്പിച്ചാല്‍ അന്‍പത് ലക്ഷം റൂബിള്‍സ് (ഏകദേശം 50,000 ഡോളര്‍) പിഴ ഈടാക്കാനുള്ള ബില്ലിനും കഴിഞ്ഞ ദിവസം റഷ്യന്‍ പാര്‍ലമെന്‍റ് അംഗീകാരം നല്‍കി. റഷ്യയിലെ ജനസംഖ്യ കുറച്ച് രാജ്യത്തെ ദുര്‍ബലപ്പെടുത്താനുള്ള പാശ്ചാത്യ രാജ്യങ്ങളുടെ ശ്രമങ്ങളുടെ ഭാഗമാണെന്ന് ചൂണ്ടിക്കാട്ടിയാണ് നടപടി.
പരമ്പരാഗത മൂല്യങ്ങള്‍ക്ക് പ്രാധാന്യം നല്‍കണമെന്ന് അടുത്തകാലത്തായി പുട്ടിനും മറ്റ് ഉന്നതനേതാക്കളും നിരന്തരം ആവശ്യപ്പെടുന്നുണ്ട്. പാശ്ചാത്യ ഉദാരത വാദത്തിന് കടകവിരുദ്ധമാണിത്. രാജ്യത്തെ ജനസംഖ്യ കുറയുന്ന പശ്ചാത്തലത്തില്‍ വലിയ കുടുംബമെന്ന ആശയത്തെ പുട്ടിന്‍ പ്രോത്സാഹിപ്പിക്കുന്നു. എട്ട് കുട്ടികളെ വരെ പ്രസവിക്കണമെന്ന് സ്‌ത്രീകളോട് പുട്ടിന്‍ ആഹ്വാനം ചെയ്യുന്നുമുണ്ട്.
റഷ്യയില്‍ കഴിഞ്ഞ കൊല്ലം ലിംഗമാറ്റ ശസ്‌ത്രക്രിയയ്ക്ക് നിരോധനം ഏര്‍പ്പെടുത്തിയിരുന്നു. സ്വവര്‍ഗരതിക്കാരെ സുപ്രീം കോടതി തീവ്രവാദികളായും പ്രഖ്യാപിച്ചിരുന്നു.
ഏത് പ്രായത്തിലുമുള്ളവര്‍ സ്വവര്‍ഗവിവരങ്ങള്‍ പങ്കിടുന്നത് 2022ല്‍ പുട്ടിന്‍ നിരോധിച്ചിരുന്നു. സ്വവര്‍ഗരതിയെക്കുറിച്ചുള്ള വിവരങ്ങള്‍ പ്രായപൂര്‍ത്തിയാകാത്തവരുമായി പങ്കിടുന്നത് 2013ല്‍ തന്നെ രാജ്യത്ത് നിരോധിച്ചിരുന്നു. ഈ നിയമം തന്നെ എല്ലാ പ്രായക്കാര്‍ക്കും 2022ല്‍ ബാധകമാക്കുകയായിരുന്നു.
2022 ഫെബ്രുവരിയില്‍ യുക്രെയ്ന് അധിനിവേശം തുടങ്ങിയതു മുതല്‍ പാശ്ചാത്യ രാജ്യങ്ങളെ പുട്ടിന്‍ സാത്താന്‍ രാഷ്‌ട്രങ്ങളായാണ് പരിഗണിക്കുന്നത്. റഷ്യയിലേക്ക് ഉദാരത പ്രത്യയശാസ്‌ത്രങ്ങള്‍ കയറ്റി അയച്ച് തങ്ങളെ തകര്‍ക്കാന്‍ ശ്രമിക്കുന്നുവെന്ന ആരോപണവും അദ്ദേഹം ഉയര്‍ത്തുന്നുണ്ട്.
സ്വതന്ത്ര മാധ്യമപ്രവര്‍ത്തകരും വിമര്‍ശകരും സാമൂഹ്യപ്രവര്‍ത്തകരും പ്രതിപക്ഷവും എല്ലാം യുക്രെയ്ന് യുദ്ധം തുടങ്ങിയ ശേഷം രാജ്യത്ത് അടുത്തിടെയായി കടുത്ത സമ്മര്‍ദ്ദത്തിലാണ്.
നൂറ് കണക്കിന് സര്‍ക്കാര്‍ ഇതര സംഘങ്ങളെ വിദേശ ഏജന്‍റുകളുടെ പട്ടികയില്‍ പെടുത്തി. ഇവര്‍ സര്‍ക്കാരിന്‍റെ കര്‍ശന നിരീക്ഷണത്തിലാണ്. ഇവര്‍ക്ക് മേല്‍ സര്‍ക്കാര്‍ ആക്ഷേപകരമായി പ്രയോഗങ്ങളും നടത്തുന്നു.
Also Read: ആണവ യുദ്ധത്തിന് വഴിതുറക്കുന്നോ? റഷ്യ ഭൂഖണ്ഡാന്തര ബാലിസ്‌റ്റിക് മിസൈൽ പ്രയോഗിച്ചെന്ന് യുക്രെയ്ന്
