മോസ്‌കോ : ഇന്ത്യന്‍ പ്രധാനമന്ത്രി നരേന്ദ്ര മോദിയുടെ റഷ്യന്‍ സന്ദര്‍ശനത്തെ അതീവ പ്രതീക്ഷയോടെയാണ് വീക്ഷിക്കുന്നതെന്ന് ക്രെംലിന്‍ വക്താവ് ദിമിത്രി പെസ്കോവ്. ഇന്ത്യ-റഷ്യ ബന്ധത്തില്‍ ഈ കൂടിക്കാഴ്‌ച ഏറെ നിര്‍ണായകമാണെന്നാണ് വിലയിരുത്തല്‍. ഇരു രാജ്യങ്ങളും തമ്മിലുള്ള ബന്ധം ഇരു നേതാക്കളും അവലോകനം ചെയ്യുകയും പരസ്‌പര താൽപ്പര്യമുള്ള സമകാലിക പ്രാദേശിക, ആഗോള വിഷയങ്ങളിൽ കാഴ്‌ചപ്പാടുകൾ പങ്കുവയ്ക്കുകയും ചെയ്യുമെന്ന് ഉന്നതതല സന്ദർശനം പ്രഖ്യാപിച്ചുകൊണ്ട് വിദേശകാര്യ മന്ത്രാലയം വ്യാഴാഴ്‌ച അറിയിച്ചു.
മോസ്‌കോയിൽ പ്രധാനമന്ത്രി മോദിയുടെ പരിപാടി വിപുലമായിരിക്കുമെന്നും ഇരു നേതാക്കളും അനൗപചാരിക ചർച്ചകൾ നടത്തുമെന്നും റഷ്യയുടെ സർക്കാർ വിജിടിആർകെ ടെലിവിഷൻ ചാനലിന് നൽകിയ അഭിമുഖത്തിൽ പെസ്കോവ് പറഞ്ഞു. 'വ്യക്തമായും, അജണ്ട വളരെ വിപുലമായിരിക്കും. ഇത് ഒരു ഔദ്യോഗിക സന്ദർശനമായിരിക്കും, തലവൻമാർക്ക് അനൗപചാരികമായ രീതിയിൽ സംസാരിക്കാൻ കഴിയുമെന്ന് ഞങ്ങൾ പ്രതീക്ഷിക്കുന്നു,' - അദ്ദേഹം പറഞ്ഞു.
റഷ്യൻ-ഇന്ത്യ ബന്ധം തന്ത്രപരമായ പങ്കാളിത്തത്തിന്‍റെ തലത്തിലാണെന്ന് പെസ്കോവ് പറഞ്ഞു. ക്രെംലിനിലും പ്രതിനിധി സംഘങ്ങൾ ഉൾപ്പെടുന്നവയിലും ഒറ്റത്തവണ ചർച്ചകൾ നടക്കുമെന്ന് അദ്ദേഹം പറഞ്ഞു.
'ഞങ്ങൾ വളരെ പ്രധാനപ്പെട്ടതും സമ്പൂർണവുമായ സന്ദർശനം പ്രതീക്ഷിക്കുന്നു, ഇത് റഷ്യൻ-ഇന്ത്യൻ ബന്ധത്തിന് വളരെ നിർണായകമാണ്,' -അദ്ദേഹത്തെ ഉദ്ധരിച്ച് ഔദ്യോഗിക വാർത്ത ഏജൻസിയായ ടാസ് റിപ്പോർട്ട് ചെയ്‌തു. അഞ്ച് വർഷത്തിനിടെ മോദിയുടെ ആദ്യ റഷ്യന്‍ സന്ദർശനമാണിത്. 2019 ൽ വ്ളാഡിവോസ്റ്റോക്കിൽ നടന്ന സാമ്പത്തിക കോൺക്ലേവിൽ പങ്കെടുത്തപ്പോഴാണ് അദ്ദേഹം അവസാനമായി റഷ്യയില്‍ സന്ദർശനം നടത്തിയത്.
ഇന്ത്യൻ പ്രധാനമന്ത്രിയും റഷ്യയുടെ പ്രസിഡൻ്റും തമ്മിലുള്ള വാർഷിക ഉച്ചകോടി ഇരു രാജ്യങ്ങളും തമ്മിലുള്ള തന്ത്രപരമായ പങ്കാളിത്തത്തിലെ ഏറ്റവും ഉയർന്ന സ്ഥാപനപരമായ സംഭാഷണ സംവിധാനമാണ്. ഇതുവരെ ഇന്ത്യയിലും റഷ്യയിലുമായി 21 വാർഷിക ഉച്ചകോടികൾ മാറിമാറി നടന്നിട്ടുണ്ട്. അവസാന വാർഷിക ഉച്ചകോടി 2021 ഡിസംബർ ആറിന് ന്യൂഡൽഹിയിൽ നടന്നു. ഉച്ചകോടിയിൽ പങ്കെടുക്കാൻ പ്രസിഡന്‍റ് പുടിൻ ഇന്ത്യയിലെത്തിയിരുന്നു.
