ധാക്ക (ബംഗ്ലാദേശ്): രാജ്യത്ത് നടക്കുന്ന ഹിന്ദുക്കൾക്കെതിരായ ന്യൂനപക്ഷ ആക്രമണങ്ങളെ ഇന്ത്യ പെരുപ്പിച്ച് കാണിക്കുന്നുവെന്ന് ബംഗ്ലാദേശ് ഇടക്കാല സർക്കാരിൻ്റെ മുഖ്യ ഉപദേഷ്‌ടാവ് മുഹമ്മദ് യൂനുസ് പറഞ്ഞു. ബംഗ്ലാദേശിൽ നിലവിൽ നടക്കുന്നത് രാഷ്ട്രീയ സംഘർഷങ്ങളാണ്. രാജ്യത്തെ നിരവധി ഹിന്ദുക്കൾ അവാമി ലീഗിനെ പിന്തുണച്ചിരുന്നു.
ഹസീനയുടെയും അവാമി ലീഗിൻ്റെയും ക്രൂരതകളെ തുടർന്ന് രാജ്യം ഒരു പ്രക്ഷോഭത്തിലൂടെ കടന്നുപോയപ്പോൾ അവരെ രാഷ്ട്രീയപരമായി പിന്തുണച്ചവരും ആക്രമിക്കപ്പെട്ടു. ആക്രമണങ്ങളെ ന്യായീകരിക്കുകയല്ല. പക്ഷെ ഇന്ത്യ ആക്രമണങ്ങളെ വർഗീയമായി ചിത്രീകരിക്കുന്ന രീതി തെറ്റാണെന്ന് മുഹമ്മദ് യൂനുസ് പറഞ്ഞു.
ഹിന്ദുക്കള്‍ ഉൾപ്പെടെയുള്ള ന്യൂനപക്ഷങ്ങളെ സംരക്ഷിക്കുമെന്ന് മോദിക്ക് ഉറപ്പ് നൽകിയിട്ടുണ്ട്. എന്നാൽ ഹസീനയുടെ നേതൃത്വം മാത്രമെ രാജ്യത്തിൻ്റെ സ്ഥിരത ഉറപ്പാക്കൂ എന്ന ഇന്ത്യൻ വ്യാഖ്യാനം തെറ്റാണ്. ബംഗ്ലാദേശ് നാഷണലിസ്‌റ്റ് പാർട്ടി ഉൾപ്പെടെ എല്ലാവരും ഇസ്‌ലാമിസ്‌റ്റുകളാണെന്നാണ് ഇന്ത്യൻ നരേറ്റീവ്.
ഹസീനയില്ലെങ്കിൽ ബംഗ്ലാദേശ് അഫ്‌ഗാനിസ്ഥാനവുമെന്ന് ഇന്ത്യ കരുതുന്നു. ഈ ധാരണയിൽ നിന്നും ഇന്ത്യ പുറത്ത് കടക്കണം. രണ്ട് രാജ്യങ്ങളും തമ്മിലുള്ള നയതന്ത്ര ബന്ധം മികച്ച രീതിയിൽ മുന്നോട്ട് കൊണ്ട് പോകാനാണ് ആഗ്രഹിക്കുന്നതെന്നും നോബൽ ജേതാവ് കൂടിയായ മുഹമ്മദ് യൂനുസ് പിടിഐക്ക് നൽകിയ അഭിമുഖത്തിൽ പറഞ്ഞു. ഇന്ത്യയിലിരുന്ന് ഷെയ്ഖ് ഹസീന നടത്തുന്ന പ്രസ്‌താവനകളെയും അദ്ദേഹം വിമർശിച്ചു
കലാപം പൊട്ടിപ്പുറപ്പെട്ട വഴി: 1971ൽ നടന്ന ബംഗ്ലാദേശ് വിമോചന സമരത്തിൽ പങ്കെടുത്തവരുടെ കുടുംബങ്ങൾക്ക് സർക്കാർ ജോലികളിൽ 30 ശതമാനം സംവരണം നൽകുമെന്ന തീരുമാനമാണ് ഷെയ്ഖ് ഹസീനക്കെതിരെ നിലനിന്നിരുന്ന ഭരണ വിരുദ്ധ വികാരത്തെ ആളിക്കത്തിച്ചത്. സർക്കാർ നയത്തിൽ പ്രതിഷേധിച്ച് ബംഗ്ലാദേശിൽ വിദ്യാർഥിപ്രക്ഷോഭം പൊട്ടിപ്പുറപ്പെടുകയായിരുന്നു.
കലാപത്തിൽ രാജ്യത്തെ ന്യൂനപക്ഷമായ ഹിന്ദുക്കൾ ആക്രമിക്കപ്പെട്ടു. സർക്കാർ വിരുദ്ധ പ്രതിഷേധങ്ങളിൽ പിടിച്ച് നിൽക്കാന്‍ കഴിയാതെ ഓഗസ്‌റ്റ് 5ന് ഷെയ്ഖ് ഹസീനയ്‌ക്ക് പ്രധാനമന്ത്രി സ്ഥാനം രാജിവച്ച് ഇന്ത്യയിലേക്ക് പലായനം ചെയ്യേണ്ടി വന്നു. ഇതിന് ശേഷമാണ് ബംഗ്ലാദേശിൽ ഇടക്കാല സർക്കാർ നിലവിൽ വരുന്നത്.
ഹിന്ദുക്കൾക്കെതിരെയുള്ള ആക്രമണം: 1971ലെ വിമോചന യുദ്ധകാലത്ത് ബംഗ്ലാദേശിലെ ജനസംഖ്യയുടെ 22 ശതമാനവും ഹിന്ദുക്കളായിരുന്നു. ഇപ്പോൾ ആകെ ജനസംഖ്യയായ 170 ദശലക്ഷത്തിൽ 8 ശതമാനം മാത്രമാണ് ഹിന്ദു ജനസംഖ്യ. മതേതര രാഷ്ട്രീയം പറഞ്ഞ അവാമി ലീഗിനെ പിന്തുണച്ചവരായിരുന്നു ബംഗ്ലാദേശിലെ ഹിന്ദുക്കളിൽ ഭൂരിഭാഗവും. സർക്കാരിനെതിരെ പ്രക്ഷോഭം പുറപ്പെട്ടപ്പോൾ രാജ്യത്തെ ഹിന്ദുക്കളും വ്യാപകമായി ആക്രമിക്കപ്പെട്ടു.
ആക്രമണത്തിൽ ഹിന്ദു ക്ഷേത്രങ്ങൾ ഉൾപ്പെടെ നിരവധി ബിസിനസുകളും സ്വത്തുവകകളും നശിപ്പിക്കപ്പെട്ടു. ഷെയ്ഖ് ഹസീനയുടെ സർക്കാരിൻ്റെ പതനത്തെത്തുടർന്ന് ഹിന്ദുക്കൾക്കെതിരെ നടന്ന രൂക്ഷമായ ആക്രമണങ്ങളെക്കുറിച്ച് പ്രമുഖ ഹിന്ദു ന്യൂനപക്ഷ ഗ്രൂപ്പായ ബംഗ്ലാദേശ് ഹിന്ദു ബുദ്ധിസ്‌റ്റ് ക്രിസ്ത്യൻ യൂണിറ്റി കൗൺസിൽ (BHBCUC) റിപ്പോർട്ട് ചെയ്‌തിരുന്നു.
ഹസീനയുടെ പടിയിറക്കത്തിന് ശേഷം 48 ജില്ലകളിലായി 278 സ്ഥലങ്ങളിൽ ന്യൂനപക്ഷ ഹിന്ദു സമൂഹം ആക്രമിക്കപ്പെട്ടതായി ഓഗസ്‌റ്റിൽ ബംഗ്ലാദേശ് നാഷണൽ ഹിന്ദു ഗ്രാൻഡ് അലയൻസ് റിപ്പോർട്ട് ചെയ്‌തു. തുടർന്ന് ബംഗ്ലാദേശിൻ്റെ തലസ്ഥാനത്ത് ആയിരക്കണക്കിന് ഹിന്ദുക്കൾ പ്രതിഷേധ റാലികൾ നടത്തി. ആഗസ്റ്റ് 10-11 തീയതികളിൽ വടക്കുകിഴക്കൻ തുറമുഖ നഗരമായ ചാട്ടോഗ്രാമിൽ ക്ഷേത്രങ്ങൾക്കും ഹിന്ദു വീടുകൾക്കും വ്യാപാര സ്ഥാപനങ്ങൾക്കും നേരെയും ആക്രമണങ്ങൾ നടന്നിരുന്നു.
Also Read:ബംഗ്ലാദേശിലെ രാഷ്ട്രീയ പ്രതിസന്ധി: കാര്യകാരണങ്ങളെക്കുറിച്ച് ഒരു അവലോകനം
