തിരുവനന്തപുരം : രോഗലക്ഷണം ആദ്യം തന്നെ തിരിച്ചറിയുക എന്നതാണ് വാത രോഗ പ്രതിരോധത്തിൽ ഏറ്റവും പ്രധാനം. വാദരോഗത്തെ കുറിച്ച് ജനങ്ങളെ ബോധവാന്മാരാക്കാൻ ലക്ഷ്യമിട്ടാണ് ഒക്ടോബർ 12 ലോക വാത ദിനമായി ആചരിച്ചു വരുന്നത്. നേരത്തെ രോഗം കണ്ടെത്തിയാൽ ഫലപ്രദമായി ഇതു നിയന്ത്രിക്കാനാകുമെന്നതാണ് വാത രോഗത്തിന്‍റെ പ്രത്യേകത.
സന്ധികൾക്കുള്ളിലെ തരുണാസ്‌തി അഥവ കാർട്ടിലേജിലെ കേടുപാടുകളാണ് വാതമെന്ന രോഗാവസ്ഥ. പ്രായമുള്ളവരിൽ തേയ്‌മാനം കാരണം വാതമുണ്ടാകാം. പ്രതിരോധ ശേഷിയുടെ കുറവു കാരണം ചെറുപ്പക്കാരിലും വാതരോഗമുണ്ടാകാമെന്ന് തിരുവനന്തപുരം പട്ടം എസ് യു ടിയിലെ ഓർത്തോപീഡിക് സർജറി സീനിയർ കൺസൾട്ടന്‍റ് ഡോ അനൂപ് എസ് പറയുന്നു.
കാലിനും കൈയ്ക്കും വിരലുകൾക്കും രാവിലെ എഴുന്നേൽക്കുമ്പോൾ മുതൽ വേദന അനുഭവപ്പെടുന്നതാണ് വാത രോഗത്തിന്‍റെ പ്രധാന ലക്ഷണം. രാവിലെ എഴുന്നേറ്റാൽ ഒരു മണിക്കൂർ വരെ ഇതു നീണ്ടു നിൽകാനുളള സാധ്യതയുണ്ട്. നേരത്തെ ഇതു തിരിച്ചറിയാനാകണം. നേരത്തെ തിരിച്ചറിഞ്ഞാൽ ഇതു പ്രതിരോധിക്കാനുള്ള മരുന്നുകൾ ഇന്നു ലഭ്യമാണ്. ദീർഘനാളത്തെ ചികിത്സ വേണ്ടി വരുമെങ്കിലും നേരത്തെ തിരിച്ചറിഞ്ഞാൽ മരുന്നുകളുടെ അളവും കുറച്ചു കൊണ്ടു വരാൻ സാധിക്കും. ജോയിന്‍റുകളുടെ കേടുപാടുകൾ ഒഴിവാക്കാൻ ഇതിലൂടെ സാധിക്കും.
കൃത്യമായ രോഗ നിർണ്ണയം രോഗത്തിന്‍റെയും രോഗിയുടെയും ഭാവിയെ തന്നെ സ്വാധീനിക്കും. തേയ്‌മാനമാണെങ്കിൽ ചികിത്സ തേടിയാൽ ഇതു മോശമാകുന്നത് നിയന്ത്രിക്കാനാകും. നല്ലൊരു അളവ് വരെ കൃത്യമായ വ്യായാമം ഈ രോഗാവസ്ഥയ്ക്ക് നല്ലതാണ്. നിലത്ത് ഇരിക്കുന്നത് പോലെയുള്ള ശീലങ്ങൾ പൂർണ്ണമായി ഒഴിവാക്കാം. സന്ധിവേദന കൊണ്ടു ബുദ്ധിമുട്ടുന്നവരുണ്ടെങ്കിൽ ഉടനെ ഡോക്‌ടറെ കാണണം.
ചിലർക്ക് എക്‌സ്റേയും രക്ത പരിശോധനയും വേണ്ടി വന്നേക്കാം. അതിന് ശേഷം ഡോക്‌ടറുടെ നിർദേശപ്രകാരമുള്ള ലഘു വ്യായാമങ്ങൾ കൊണ്ടു തന്നെ നമ്മുടെ ബുദ്ധിമുട്ടുകൾ നല്ലൊരു അളവ് വരെ നിയന്ത്രിക്കാനാകും. സന്ധിവാതമുള്ള എല്ലാവർക്കും ഓപ്പറേഷന്‍റെ ആവശ്യമില്ല. സന്ധിവാതം രൂക്ഷമായി ദൈനംദിന കാര്യങ്ങൾ ചെയ്യാൻ പോലും കഴിയാത്ത സാഹചര്യത്തിലേക്ക് പോയാൽ മാത്രമാണ് ഓപ്പറേഷന്‍റെ ആവശ്യം. അതു കൊണ്ടു തന്നെ സന്ധിവാതം വന്നാൽ ഉടൻ ഓപ്പറേഷൻ എന്ന് തെറ്റിദ്ധരിക്കേണ്ട ആവശ്യമില്ല. ചെറിയ വ്യായാമം, ഭക്ഷണക്രമം, ചികിത്സ എന്നിവയിലൂടെ സന്ധിവാതം നിയന്ത്രിക്കാനാകുമെന്നും ഡോ അനൂപ് എസ് പറഞ്ഞു.
Also Read: വില്ലനായി സന്ധിവാതം; കളിക്കളം വിടാനൊരുങ്ങി സൈന നെഹ്‌വാൾ
